မန္တလေးတိုင်း ဝမ်းတွင်းမြို့နယ်မှာ ကြံ့ခိုင်ရေးပါတီ လွှတ်တော်ကိုယ်စားလှယ်လောင်း ရွာကို လာမှာဖြစ်တဲ့အတွက် ချက်ပြုတ်ကျွေးမွေးဖို့ ဈေးသွားဝယ်တဲ့ ရပ်ကျေးပါတီဥက္ကဋ္ဌတယောက် နိုဝင်ဘာ ၂၂ ရက် မနက်က ဓားနဲ့ထိုးခံရပြီး သေဆုံးသွားတယ်လို့ မြို့ခံတွေဆီက သိရပါတယ်။

မနေ့ မနက်အစောပိုင်းက နေအိမ်ကနေ ဈေးဝယ်ထွက်လာတဲ ကျေးရွာ ကြံ့ခိုင်ရေးပါတီဥက္ကဋ္ဌ တယောက်ဟာ ကျွတ်ကန်ကျေးရွာအဝင်မှာ စကားများ ရန်ဖြစ်ပြီး ဓားနဲ့အထိုးခံရကာ သေဆုံးသွားတယ်လို့ မြို့ခံတယောက်က DVB ကို ပြောပါတယ်။

“ကြံ့ခိုင်ရေးက ပြည်သူ့လွှတ်တော်ကိုယ်စားလှယ် မျိုးမြင့်သိန်း လာမယ်ဆိုလို့ ချက်ပြုတ်ကျွေးမွေးဖို့ ရွှေတောင်ရွာမှာ ဈေးသွားဝယ်တာ၊ ကျွတ်ကန်ရွာအဝင်မှာ လူငယ်တွေနဲ့ စကားများပြီး ဓားနဲ့ထိုးခံရတာ။ ဈေးတောင် မရောက်ဘူး၊ ပွဲချင်းပြီး သေသွားတယ်။” 

သေဆုံးသူမှာ ဝမ်းတွင်းမြို့နယ် သနပ်ခါးတောကျေးရွာအုပ်စုက ကြံ့ခိုင်ရေးပါတီဥက္ကဋ္ဌ ဦးညွန့်ဦး ဖြစ်တယ်လို့ ကြံ့ခိုင်ရေးပါတီဝင်တယောက်က ပြောပါတယ်။

“ရန်ဖြစ် စကားများပြီး ဓာနဲ့ထိုးခံရပြီး သေတာကို သူ့မိသားစုဘက်ကတော့ ဆိုင်ကယ်တွေ၊ ဖုန်းတွေ အလုခံရတယ်ဆိုပြီး လုယက်မှုနဲ့ စခန်းမှာ တိုင်ချက်ဖွင့်ထားတယ်။ အလုခံရတာ ဟုတ်။ မဟုတ်တော့ မသိဘူး။” 

စစ်အုပ်စုက ပြုလုပ်မယ့် ရွေးကောက်ပွဲမှာ ဝမ်းတွင်းမြို့နယ်က ကြံ့ခိုင်ရေးပါတီ ကိုယ်စားပြုပြီး ပြည်သူ့လွှတ်တော်ကိုယ်စားလှယ် ဦးမျိုးမြင့်သိန်း၊ တိုင်းဒသကြီးလွှတ်တော်ကိုယ်စားလှယ် နေရာမှာ ဦးထွန်းထွန်းဦး (FPTP) နဲ့ ဦးမြဆန်း (PR) တို့ ဝင်ပြိုင်မှာဖြစ်ပါတယ်။

လတ်တလောမှာ စစ်ကောင်စီတပ်က ဝမ်းတွင်းမြို့ပေါ်မှာ လုံခြုံရေးချထားပြီး ကြံ့ခိုင်ရေးအမတ်လောင်း စည်းရုံးဆင်းမယ့် ရပ်ကွက်နဲ့ကျေးရွာတွေကို စစ်ကောင်စီလက်အောက်ခံ ရဲတွေကို ထည့်ပေးတယ်လို့ ဒေသခံတွေဆီက သိရပါတယ်။