ရန်ကုန်မှာရှိတဲ့ ဖင်လင်နိုင်ငံ သံရုံးကို ပိတ်တော့မယ်လို့ ဖင်လန် နိုင်ငံခြားရေးဝန်ကြီးဌာနက နိုဝင်ဘာ ၂၈ ရက်မှာ ထုတ်ပြန်ပါတယ်။

လာမယ့် ၂၀၂၆ ခုနှစ်မှာ ရန်ကုန်၊ ပါကစ္စတန်နိုင်ငံ အစ္စလာမာဘတ်၊ အာဖဂန်နစ္စတန်နိုင်ငံ ကာဘူးလ်မြို့တို့က သံရုံးတို့ကို ပိတ်သိမ်းဖို့ ပြင်ဆင်တာတွေစလိုက်ပြီလို့ ဆိုပါတယ်။

ဒါဟာ ဝန်ကြီးဌာနရဲ့ ပြည်ပမစ်ရှင်ကွန်ရက်ကို ပြင်ဆင်ဖွဲ့စည်းတာကနေ ဖြစ်လာခဲ့ပြီး ဖင်လန်အတွက် မဟာဗျူဟာအရ အရေးပါတဲ့ နိုင်ငံတွေမှာ အရင်းအမြစ်တွေကို စုစည်းဖို့ဖြစ်သလို သမ္မတရဲ့အမိန့်နဲ့ သံရုံးတွေ ပိတ်သိမ်းတာလို့ ထုတ်ပြန်ပါတယ်။

သံရုံးတွေ ပိတ်သိမ်းရတာဟာ လုပ်ငန်းဆောင်ရွက်မှုနဲ့ မဟာဗျူဟာမြောက် အကြောင်းရင်းတွေကြောင့် ဖြစ်ပြီး၊ နိုင်ငံတွေရဲ့ နိုင်ငံရေးအခြေအနေ ပြောင်းလဲမှုတွေ၊ ဖင်လန်နိုင်ငံနဲ့ ကူးသန်းရောင်းဝယ်ရေး၊ စီးပွားရေးဆက်ဆံမှု အကန့်အသတ်တွေနဲ့ ဆက်စပ်နေတယ်လို့လည်း ဆိုပါတယ်။

ရန်ကုန်၊ ဖင်လန်သံရုံးရဲ့ ဝက်ဘ်ဆိုက်မှာတော့ ဖင်လန်နိုင်ငံသားတွေအတွက် အရေးပေါ်အကူအညီတွေ၊ ပတ်စ်ပို့သက်တမ်းတိုးတာ စတဲ့ ကောင်စစ်ရေးရာနဲ့ မြန်မာနိုင်ငံသားတွေရဲ့ နေထိုင်ခွင့်ဆိုင်ရာ ဝန်ဆောင်မှုတွေကို ဘန်ကောက်မှာရှိတဲ့ ဖင်လန်သံရုံးကနေ ဆောင်ရွက်ပေးမယ်လို့ ဖင်လန်နိုင်ငံကို သွားဖို့ ရှန်ဂန်ဗီဇာ လျှောက်မယ် ဆိုရင်တော့ ရန်ကုန်မှာရှိတဲ့ ဂျာမနီသံရုံးမှာ လျှောက်ထားနိုင်တယ်လို့ ဆိုပါတယ်။

ဖင်လန်အနေနဲ့ ဒီနှစ်ထဲမှာပဲ အမေရိကန်နိုင်ငံ၊ ဟူစတန်မြို့မှာ ကောင်စစ်ဝန်ချုပ်ရုံး ဖွင့်လှစ်ခဲ့ပြီး Business Finland က ရုံးတွေ ဖွင့်လှစ်ခဲ့တဲ့နေရာတွေမှာလည်း ကူးသန်းရောင်းဝယ်ရေးဆိုင်ရာ ရုံးခန်းတွေ ဖွင့်လှစ်သွားမယ်လို့ ထုတ်ပြန်ပါတယ်။