စစ်တပ်က နိုင်နေပြီ။ တရုတ်အကူအညီဖြင့် ရှမ်းမြောက်က ဒေသအချို့ကို ပြန်ရထားပြီးပြီ။ ကရင်နီနှင့် ချင်းပြည်နယ်တို့တွင်လည်း စစ်ကြောင်းများ ဖြန့်ခွဲ ဝင်ရောက်ထားနိုင်ပြီ။ စစ်ကိုင်းနှင့် မကွေးမှ PDF များကို အချိန်တိုအတွင်း နှိမ်နင်းတော့မည်။ မကြာမီ ရွေးကောက်ပွဲကျင်းပကာ အရပ်သားအစိုးရဖွဲ့ပြ၍ နိုင်ငံ့အာဏာကို ဆက်လက် ချုပ်ကိုင်သွားနိုင်တော့မည်။ ဤသည်မှာ စစ်အုပ်စုနှင့် စစ်တပ်လော်ဘီများအကြား လတ်တလော ဖြစ်တည်နေသည့် ပျားရည်ဆမ်း အိပ်မက်ကြီးဖြစ်၏။ ၎င်းတို့အနေဖြင့် နိုင်ငံ့အာဏာကို စစ်တပ်က ဆက်လက်ချုပ်ကိုင်ပြီးနောက် မိမိတို့ ရသင့်ရထိုက်သည့် ငွေကြေးနှင့် လုပ်ပိုင်ခွင့်များကိုပင် စိတ်ကူးနှင့် ဝေပုံကျ ခွဲဝေထားပြီးလည်း ဖြစ်ပေလိမ့်မည်။

အိပ်မက်ကြီးကြီးမက်နေသည့် စစ်အုပ်စုနှင့် စစ်တပ်လော်ဘီများအနေဖြင့် ၎င်းတို့၏ ပျားရည်ဆမ်းအိပ်မက် မပျက်စီးစေရန် ထည့်မတွက်လိုသော်လည်း လက်တွေ့တွင်မူ ကျရောက်လာမည့် လှိုင်းသုံးလှိုင်း ရှိနေသည်မှာ ပစ္စက္ခ အမှန်တရားဖြစ်၏။ စစ်အုပ်စုနှင့် စစ်တပ်လော်ဘီတို့၏ တဖက်သတ် ပြောကြားချက်များကိုသာ ယုံစားနေသည့် စီးပွားရေး လုပ်ငန်းရှင်များ၊ ခြံစည်းရိုး ခွထိုင်ထားသူများ အနေဖြင့်မူ ထိုလှိုင်းသုံးလှိုင်းကို ဂရုပြုသင့်သည်။ သို့မှသာ ထိုလှိုင်းများအကြား စစ်အုပ်စုနှင့်အတူ မျောပါပျောက်ကွယ်မည့် အဖြစ်မှ ရှောင်လွဲနိုင်မည် ဖြစ်၏။ 

(၁) အထွေထွေထိုးစစ်လှိုင်း

နိုင်ငံတဝန်း အထွေထွေထိုးစစ် စနိုင်ရန် ပြင်ဆင်နေပြီဟု NUG ကာကွယ်ရေးဝန်ကြီး ဦးရည်မွန်က စက်တင်ဘာလအတွင်းကပင် PVTV ရုပ်သံမှတဆင့် အတိအလင်း ပြောကြားခဲ့ပြီး ဖြစ်၏။ သို့သော် အထွေထွေထိုးစစ် စမည့် ရက်၊ လတို့ကို ထည့်သွင်း ပြောဆိုသွားခြင်း မရှိပေ။ နိုဝင်ဘာလ ၁၁ ရက်တွင်မူ အထွေထွေထိုးစစ်အတွက် အထူးစစ်တိုင်းဌာနတွင် လက်နက်များ တပ်ဆင်ပြီးစီးကြောင်း သတင်းထုတ်ပြန်လာသည်။ အထွေထွေထိုးစစ် စမည့်ရက်ကို NUG ဘက်က ကြိုတင် ထုတ်ပြန် ပြောဆိုခြင်း မရှိသော်လည်း NUG သည် စစ်ကောင်စီ အဓမ္မ ကျင်းပမည့် အတုအယောင် ရွေးကောက်ပွဲအလွန် ကာလတွင် ၎င်းတို့ မည်သို့ ဆက်လက်ဆောင်ရွက်မည်ဟု စကားဦးသန်းထားခြင်း လုံးဝ မရှိပေ။ သို့ဖြစ်ရာ အထွေထွေထိုးစစ်သည် စစ်ကောင်စီ၏ အတုအယောင် ရွေးကောက်ပွဲ မတိုင်မီပင် ပေါ်ထွက်လာမည်ဟု မှန်းဆရသည်။ 

စစ်ရေး၊ နိုင်ငံရေး အနှစ်သာရ အရလည်း နိုင်ငံတဝန်း အထွေထွေထိုးစစ်ကို အတုအယောင် ရွေးကောက်ပွဲကာလမကျော်မီ စတင်မှသာ အဓိပ္ပာယ် ရှိပါလိမ့်မည်။ "မိုးလွန်မှ ထွန်ချ"၊  "သူခိုးပြေးမှ ထိုးကွင်းထ" နေ၍ မဖြစ်ပေ။ ပလ္လင်ပေါ် ခွေးတက်ပြီးမှ မောင်းချရ ခက်သည့် အဖြစ်မျိုး မကြုံလိုပါက အထွေထွေထိုးစစ်ကို အတုအယောင် ရွေးကောက်ပွဲ မတိုင်မီ စရပေမည်။ လတ်တလောတွင် စစ်ကောင်စီသည် နေရာအချို့တွင် စစ်ရေးအသာစီး ရနေသယောင် ရှိသော်လည်း ၎င်းတို့၏ သန္ဓေစစ်သားများ၏ စွမ်းဆောင်ရည်သက်သက်ကြောင့် မဟုတ်သည်မှာ သေချာလှပေ၏။ ရှမ်းမြောက်ရှိဒေသတချို့ကို တရုတ်၏ အကူအညီဖြင့်သာ ပြန်ရထားခြင်း ဖြစ်သကဲ့သို့ ကရင်နီနှင့် ချင်းပြည်နယ်တို့တွင် ပစ (ခေါ်) ပြည်သူ့စစ်မှုထမ်းဥပဒေဖြင့် အဓမ္မစုဆောင်းထားသည့် တပ်သားသစ်များ၏ အသက်ကို စတေး၍ ထိုးတက်၊ ထိုးတိုက် လုပ်နေခြင်းသာ ဖြစ်သည်။ 

နိုင်ငံတဝန်း အထွေထွေထိုးစစ်သာ စလိုက်ပါက အဓမ္မသွပ်သွင်းခံထားရသော ပြည်သူ့စစ်များသည် လက်နက်ချအညံ့ခံခြင်း၊ ထွက်ပြေးခြင်း၊ နောက်မှ သန္ဓေစစ်သားများက အဓမ္မဖိအားပေး တိုက်ခိုင်းပါက သေနတ်ပြောင်း ပြန်လှည့်သွားခြင်း စသည့် ကစဉ့်ကလျား ဖြစ်စဉ်များ ပေါ်ထွက်လာပေလိမ့်မည်။ စစ်တပ်၏ အသိုက်အဝန်းအတွင်း ရောက်ရှိသွားပြီးနောက် လက်နက်ကိုင်ကြရသည်မှာ တူသော်လည်း ပစ (ခေါ်) ပြည်သူ့စစ်များသည် ပျူစောထီးများနှင့် စိတ်အခြေခံ မတူကြသည်မှာ သေချာလှပေ၏။ ပျူစောထီးများသည် မိမိတို့၏ အကျိုးစီးပွားအတွက် စစ်တပ်၏ နောက်မြီးဆွဲများအဖြစ် လိုလိုလားလား လုပ်ကိုင်ကြခြင်း ဖြစ်သော်လည်း ပြည်သူ့စစ်မှုထမ်းအဖြစ် စုဆောင်းခံထားရသူတို့တွင် ထိုစိတ်အခြေခံ ရှိသူများမှာ နည်းပါး လှပေမည်။ ရပ်ကွက်အုပ်ချုပ်ရေးအဖွဲ့က အတင်းအဓမ္မသွပ်သွင်း၍သော်လည်းကောင်း၊ လမ်းခရီးတနေရာတွင် ပေါ်တာဆွဲခံရ၍သော်လည်းကောင်း စစ်တပ်ထဲ ရောက်သွားကြရသူများ၏။ 

သို့ဖြစ်ရာ ပြည်သူ့စစ်များသည် အထွေထွေထိုးစစ်ကြီးဟူသော လှိုင်းတံပိုးကြီးကို ကြံ့ကြံ့ခံ ရင်ဆိုင်ကြမည် မဟုတ်ပေ။ ထိုအခါ ပြည်သူ့စစ်အင်အားဖြင့် လူတွင်ကျယ် ပြန်လုပ်ခွင့်သာလာသော စစ်တပ်သည် မျက်ဖြူတခါ ပြန်လန်ပေလိမ့်မည်။ စစ်အုပ်စု၏ တခုတည်းသော အားထားရာဖြစ်သည့် တရုတ်နိုင်ငံသည်လည်း NUG အား ညီနောင်သုံးဖော်ကဲ့သို့ အပစ်ရပ်စေ၊ ဆွေးနွေးစေ လုပ်၍ ရမည်မဟုတ်ပေ။ စစ်တပ်လော်ဘီများက လေကြောင်းတိုက်ခိုက်မှု ပိုလုပ်မည်ဟု ကြုံးဝါးနိုင်သော်လည်း ရှမ်းမြောက်ဒေသ ကွက်ကွက်ကလေးတွင် ဖြစ်ခဲ့သည့် တိုက်ပွဲများတွင်ပင် လေကြောင်းတိုက်ခိုက်မှုများကြားမှ မြို့များစွာ သိမ်းပိုက်ခံလိုက်ရသည်ကို မမေ့သင့်ပေ။ နိုင်ငံတဝန်းသာ စစ်မျက်နှာဖွင့်လိုက်ပါက လေကြောင်းတိုက်နိုင်မှုသည် မည်မျှ သက်ရောက်နိုင်မည်နည်း။  

(၂) ကျားဖြန့်နှိမ်နင်းရေးလှိုင်း

ကျားဖြန့်နှိမ်နင်းရေးဟူသော ခေါင်းစဉ်မှာ ကြီးမားကျယ်ပြန့်သည်။ ထို့ပြင် နှိမ်နင်းရေး လက်တံသည် ပြည်ပမှ လာတတ်သည်ကို ၁၀၂၇ စစ်ဆင်ရေးပထမလှိုင်းကာလကို ပြန်ကြည့်လျှင် တွေ့နိုင်ပေမည်။ နွေဦးတော်လှန်ရေးနှင့် မည်သို့မျှ မဆက်စပ်ခဲ့သော ညီနောင်သုံးဖော်သည်  ၁၀၂၇ စစ်ဆင်ရေးကို ကျားဖြန့်နှိမ်နင်းရေး ခေါင်းစဉ်ဖြင့် ၂၀၂၃ ခုနှစ်၊ အောက်တိုဘာ ၂၇  ရက်နေ့တွင် စတင်ခဲ့သည်။ ကျားဖြန့်နှိမ်နင်းရေး ခေါင်းစဉ်တပ်ထားသော ၁၀၂၇ စစ်ဆင်ရေး၏ လက်တံသည် မည်သည့်အရပ်က လာသနည်းဟု စစ်တပ်လော်ဘီများကို မေးကြည့်စေချင်သည်။ စစ်တပ်ကိုယ်တိုင်ကပင် ၎င်းတို့၏ ဒေါက်တိုင် နယ်ခြားစောင့်တပ်မှူးကြီး ပယ်စောက်ချိန်နှင့် ၎င်း၏သား ပယ်ရင်ချန်တို့အုပ်စုကို ပြန်လည်ဖမ်းဆီးကာ တရုတ်အစိုးရထံ ဝကွက်အပ်ခဲ့ရသည်မှာ ထင်ရှား၍ ဖုံးကွယ်မရသော အဖြေပင်။ 

ယခုလည်း စစ်အုပ်စု၏ ပျားရည်အိပ်မက်ကို တိုက်စားပစ်နိုင်သည့် ကျားဖြန့်နှိမ်နင်းရေး ဒုတိယလှိုင်း လာတော့မည်။ ယခုအကြိမ်ကမူ ထိုင်းနယ်စပ်မှ လှိုင်း စမည်ဖြစ်၏။ ထိုင်းနိုင်ငံ၊ ဘန်ကောက်မြို့ရှိ လူဝင်မှုကြီးကြပ်ရေးရုံးချုပ်၌  နိုဝင်ဘာ ၁၀ ရက်က ကျင်းပခဲ့သော သတင်းစာရှင်းလင်းပွဲတွင် ဝန်ကြီးချုပ် အနုတင်က ကျားဖြန့်နှိမ်နင်းရေးနှင့် ပတ်သက်၍ ပြောဆိုသွားသည်။ အကျဉ်းချုပ် ပြန်ပြောရလျှင် ထိုင်းအစိုးရအနေဖြင့် ကျားဖြန့်နှိမ်နင်းရေးစစ်ပွဲ ဆင်နွှဲမည်ဟူ၏။ ထိုင်းဝန်ကြီးချုပ် အနုတင်ထံမှ ထိုင်းအစိုးရ၏ အာဘော် ပေါ်ထွက်လာအပြီး ၂ ရက်အကြာ နိုဝင်ဘာ ၁၂ ရက်နေ့တွင်  အမေရိကန်နိုင်ငံခြားရေးဌာနက အမေရိကန်နိုင်ငံသားများကို ပစ်မှတ်ထားသည့် မြန်မာနိုင်ငံအတွင်း အခြေပြု ဆိုက်ဘာလိမ်လည်မှုလုပ်ငန်းများ( ကျားဖြန့်) နှိမ်နင်းရန်  အထူးတပ်ဖွဲ့ဖြစ်သော (Scam Center Strike Force)ကို ဖွဲ့စည်းလိုက်ကြောင်း ကြေညာလိုက်ပေပြီ။ 

ထိုအထူးတပ်ဖွဲ့တွင် အမေရိကန် ရှေ့နေရုံး တရားရေးဌာန၏ ရာဇဝတ်မှုဌာနခွဲ၊ ဖက်ဒရယ်စုံစမ်းစစ်ဆေးရေးဗျူရို (FBI) နှင့် အမေရိကန်လျှို့ဝှက်အေဂျင်စီ (USSS) တို့ ပါဝင်သည်။ Scam Center Strike Force သည် အမေရိကန် ဘဏ္ဍာရေးဝန်ကြီးဌာန၏ နိုင်ငံခြားပိုင်ဆိုင်မှုထိန်းချုပ်ရေးရုံး (OFAC)၊ နိုင်ငံခြားရေးဌာနနှင့် အခြားအေဂျင်စီများနှင့် ပူးပေါင်း၍ အစိုးရအတွက် ရရှိနိုင်သော နည်းလမ်းအားလုံးကို အသုံးပြု၍ လိမ်လည်မှုစင်တာများကို ပိတ်ဆို့ခြင်း၊ သိမ်းဆည်းခြင်းနှင့် လူပုဂ္ဂိုလ်များကို ရာဇဝတ်မှုဖြင့် တရားစွဲဆိုခြင်း၊ လိမ်လည်သူများ အသုံးမပြုနိုင်ရန် အမေရိကန်အခြေခံအဆောက်အအုံများကို လုံခြုံအောင်ပြုလုပ်ခြင်းတို့ကိုလည်း လုပ်ဆောင်သွားမည်ဟု ဆိုသည်။ လက်တွေ့တွင်လည်း ယခင်က ဒဏ်ခတ်ပိတ်ဆို့အရေးယူပြီးသော စောချစ်သူအပြင် DKBA ၏ ထိပ်ပိုင်းခေါင်းဆောင်များဖြစ်သည့် စိုင်းကျော်လှ၊ စောစတီး၊ စောစိန်ဝင်းနှင့် စောဆန်းအောင်တို့အပြင် ထိုင်းစီးပွားရေးသမား ချာမူဆဝမ်ကိုလည်း အရေးယူမည့် စာရင်းတွင် ထည့်သွင်းလိုက်သည်။ 

ထိုင်းနယ်စပ်မှ စတင်မည့် ကျားဖြန့်နှိမ်နင်းရေး ဒုတိယလှိုင်းတွင် တရုတ်နယ်စပ်၌ ဖြစ်ပျက်ခဲ့သော ‘ဝ’ မှ တဆင့် ညီနောင်သုံးဖော်က တိုက်ကွက်ဖော်သကဲ့သို့ ထိုင်းမှတဆင့် KNU နှင့် တော်လှန်ရေးအင်အားစုများက တိုက်ကွက်ဖော်ကာ နှိမ်နင်းရေး အစပြုမည်လား၊ မြန်မာစစ်တပ်ကရော ပယ်စောက်ချိန်မိသားစုကို ထိုးကျွေးသကဲ့သို့ BGF နှင့် DKBA တို့ကို ထိုးကျွေးကာ လွတ်မြောက်ကြောင်း ရှာခွင့်ရသွားမည်လား ဆိုသည်ကိုမူ စောင့်ကြည့်ရပေမည်။ မည်သို့ပင် ဆိုစေကာမူ ကျားဖြန့်နှိမ်နင်းရေးလှိုင်းကြီးသည်လည်း နောက်ကွယ်မှ နှီးနွှယ်ပတ်သက်ထားသည့်  စစ်ခေါင်းဆောင်များကို အကျပ်ရိုက်စေမည်မှာ အသေအချာပင်။ 

(၃) အကြွေးကျန် ICC လှိုင်း

ပြီးခဲ့သော ၂၀၂၄ နိုဝင်ဘာအတွင်း  ICC ၏  တရားစွဲအရာရှိက အကြမ်းဖက်စစ်တပ် ခေါင်းဆောင် မင်းအောင်လှိုင်ကို ဖမ်းဝရမ်းထုတ်ပေးရန် ICC  တရားရုံးကို လျှောက်ထားခဲ့ပြီး ICC ကလည်း လျှောက်ထားချက်ကို ကြားနာသဘောတူခဲ့ပြီး ဖြစ်သည်။ သို့သော် ICC သည် နိုင်ငံတကာအဆင့် ဖမ်းဝရမ်းထုတ်ရန် နှောင့်နှေးနေခဲ့သည်။  ယခုအခါ  မြန်မာနိုင်ငံဆိုင်ရာ ကုလသမဂ္ဂကိုယ်စားလှယ် ဦးကျော်မိုးထွန်းက နိုဝင်ဘာ ၁၁ ရက်တွင် ကျင်းပခဲ့သည့် အကြိမ် ၈၀ မြောက် ကုလသမဂ္ဂ အထွေထွေညီလာခံ၊ မျက်နှာစုံညီအစည်းအဝေး၏ ‘နိုင်ငံတကာရာဇဝတ်ခုံရုံး အစီအရင်ခံစာ’ ခေါင်းစဉ်အောက်တွင် ICC အနေဖြင့် မြန်မာစစ်ရာဇဝတ်ကောင် မင်းအောင်လှိုင်အား အလျင်အမြန် ဖမ်းဝရမ်းထုတ်သင့်ကြောင်း တိုက်တွန်းလိုက်သည်။ 

ဦးကျော်မိုးထွန်းက နိုင်ငံ့အာဏာကို စစ်ခေါင်းဆောင်က အဓမ္မသိမ်းပိုက်ပြီးနောက်  ထပ်မံကျူးလွန်ထားသည့် နိုင်ငံတဝန်း လေကြောင်းတိုက်ခိုက်မှုများကြောင့် သေဆုံးခဲ့ရသည့် အရပ်သားပြည်သူများ၊ ကျောင်းသားများ၊ အမျိုးသမီးများနှင့် ကလေးသူငယ်များအကြောင်းကို အချက်အလက် ပြည့်စုံစွာဖြင့် ထည့်သွင်းဆွေးနွေးသွား၏။ သို့ဖြစ်ရာ မင်းအောင်လှိုင်အတွက် အကြွေးကျန် ICC လှိုင်းသည်လည်း တချိန်မဟုတ် တချိန် ပေါ်ထွက်လာနိုင်သည့် လှိုင်းကြီးဖြစ်၏။ ထိုလှိုင်းသည် စစ်အုပ်စု၏ ခေါင်းဆောင်ကိုသာ ရိုက်ပုတ်မည့် လှိုင်းဖြစ်သော်လည်း ခေါင်းမြုပ်လျှင် တကိုယ်လုံးမြုပ်တတ်သည့် အာဏာရှင်စနစ် အမြစ်ပြတ်စေမည့် လှိုင်းလည်းဖြစ်၏။ 

ထိုလှိုင်းကြီး သုံးလှိုင်းသည် တဆင့်ခြင်း ပေါ်ထွက်လာမည်လား။ သို့မဟုတ် မတူညီသော အရပ်များမှ ပေါ်ထွက်လာကာ ပေါင်းစီးသွားပြီး ပိုမိုအင်အားပြင်းထန်သော လှိုင်းလုံးကြီးအဖြစ် စစ်အုပ်စု၏ အာဏာဆက်လက် ချုပ်ကိုင်ရေး ပျားရည်ဆမ်းအိပ်မက်ကို  ရိုက်ပုတ် လွှင့်စင်ထွက်သွားစေမည်လား ဆိုသည်ကိုမူ စောင့်ကြည့်ရပေမည်။ 

စိုင်းမင်းအောင်