ပွဲချိန်အတွင်းမှာ ဒဏ်ရာရရှိသလိုဟန်ဆောင်ပြီး အချိန်ဆွဲကာ ပွဲကိုရပ်နားစေခဲ့တဲ့ မန်စီးတီးဂိုးသမား ဒွန်နာရမ်မာရဲ့ လုပ်ရပ်အပေါ် လိဒ်ယူနိုက်တက်နည်းပြ ဒမ်နီရယ်ဖာ့ခ်က ဝေဖန်သွားပါတယ်။
မန်စီးတီး ဂိုးသမားဟာ အသင်းက ၂ ဂိုး ၁ ဂိုးနဲ့ ဦးဆောင်နေချိန်မှာ ဒဏ်ရာရရှိဟန်ဆောင်ပြီး မြက်ခင်းပေါ် လှဲချခဲ့သလို အဲဒီလို လုပ်ဆောင်ဖို့ နောက်ခံလူ ရူဘင်ဒီယက်ဇ်က အတင်းအကျပ် ညွှန်ကြားခဲ့တာကိုလည်း ရုပ်သံပြကွက်တွေမှာ မြင်တွေ့ရပါတယ်။
မန်စီးတီးအသင်းတွေဟာ ဂိုးသမားလဲကျနေချိန်မှာ နည်းပြ ဂွါဒီယိုလာဆီသွားရောက်ပြီး အသင်းရဲ့ နည်းဗျူဟာအပိုင်းကို ဆွေးနွေးခဲ့ကြတာပါ။
အဲဒီဖြစ်ရပ်ကို မြင်တွေ့ခဲ့ရတဲ့ လိဒ်နည်းပြဖာ့ခ်ကတော့ တာဝန်ရှိသူတွေအနေနဲ့ ရည်ရွယ်ချက်ရှိရှိနဲ့ ဒဏ်ရာရရှိသလို ဟန်ဆောင်ပြီး အသင်းနဲ့ နည်းဗျူဟာပိုင်း ဆွေးနွေးချိန်ရှိအောင် လုပ်ဆောင်ခဲ့တဲ့အပေါ် စည်းမျဉ်းချမှတ်ဖို့လိုအပ်ပြီး တရားမျှတမှုနဲ့ အားကစားစိတ်ဓာတ်မရှိတဲ့ လုပ်ရပ်ဖြစ်ကြောင်း ဝေဖန်ပါတယ်။
လိဒ်ယူနိုက်တက်ဟာ အဲဒီဖြစ်ရပ်နောက်ပိုင်း မိနစ်အနည်းငယ်အကြာမှ ပင်နယ်တီကနေတဆင့် ချေပဂိုးရခဲ့ပေမဲ့ ပွဲပြီးခါနီးမှာ မန်စီးတီးကအနိုင်ဂိုးသွင်းခဲ့လို ၂ ဂိုး ၃ ဂိုးနဲ့ အရေးနိမ့်ခဲ့ရပါတယ်။
