ရှမ်းပြည်နယ်တောင်ပိုင်း၊ ညောင်ရွှေမြို့နယ်၊ အင်းလေးဒေသ၊ ဟင်္သာတိုင်အနီးမှာ စက်လှေတစင်းနစ်မြုပ်ပြီး ကလေးတယောက်အပါအဝင် ၂ ယောက် သေဆုံးသွားတယ်လို့ ဒေသခံတွေက ပြောပါတယ်။
လူ ၅ ယောက် လိုက်ပါလာတဲ့ စက်လှေဟာ နိုဝင်ဘာ ၂၇ ရက် ညနေ ၅ နာရီလောက်က တိမ်းမှောက်ခဲ့တာဖြစ်ပြီး ၂ ယောက်ကို အနီးအနားရှိသူတွေ ပြန်လည်ကယ်တင်နိုင်ခဲ့ကာ ၅ နှစ် အရွယ် ကလေးနဲ့ ၂၂ နှစ်အရွယ် အမျိုးသားကတော့ ရေနစ်သေဆုံးသွားတယ်လို့ ပြောပါတယ်။
ဒေသခံတယောက်က “ဟွန်ဒါစက်လှေလည်း ငယ်တယ်၊ လူလည်းများတယ်။ အဲညမှာ လှိုင်းလုံးလည်းကြီးတော့ စက်လှေက မှောက်သွားတယ်။ ကလေးအလောင်းကို ၂၈ ရက်မနက်မှ ပြန်တွေ့တယ်၊ ကျန်တဲ့တယောက်တော့ ညနေပိုင်းမှ ပြန်တွေ့တယ်။ အင်းလေးမှာ လှေမှောက်တာမကြားဖူးဘူး။ ခုလိုကြားတော့ စိတ်မကောင်းပါဘူး” လို့ ပြောပါတယ်။
သေဆုံးသူတွေကို ကယ်ဆယ်ရေးအဖွဲ့က နန်းပန်ဆေးရုံဆီကို ပို့ဆောင်ခဲ့ပြီး နိုဝင်ဘာ ၂၉ ရက် ဒီနေ့ သင်္ဂြိုဟ်မယ်လို့ သိရပါတယ်။
စက်လှေမောင်းသူကိုတော့ ရဲတွေကဖမ်းဆီးသွားပြီး စက်လှေမှောက်တဲ့ကိစ္စကို အွန်လိုင်းပေါ်မတင်ဖို့လည်း ပြောကြားခဲ့တယ်လို့ ဒေသခံတွေက ပြောပါတယ်။
အင်းလေးဒေသမှာ ဆောင်းဝင်နေပြီပေမဲ့ အချိန်ခါမဟုတ်မိုးရွာသွန်းတာကြောင်း အခုထိ ရေတက်နေဆဲလို့ ဒေသခံတွေဆီက သိရပါတယ်။
