ရန်ကုန်တိုင်း၊ မှော်ဘီမြို့နယ်မှာ မဲစာရင်းတွေမှားနေလို့ နိုဝင်ဘာ ၂၈ ရက်ကစလို့ လဝက နဲ့ ရပ်ကျေးအုပ်ချုပ်ရေးအဖွဲ့တွေက တအိမ်တက်ဆင်း ပြန်လည်ကောက်ယူနေတယ်လို့ မြို့ခံတွေဆီက သိရပါတယ်။
မနေ့က မှော်ဘီ၊ ရွှေမြယာကျေးရွာမှာ လဝက နဲ့ ကျေးရွာအုပ်ချုပ်ရေးအဖွဲ့တွေက မှားယွင်းနေတဲ့ မဲစာရင်းတွေကို အိမ်တိုင်ရာရောက်လာပြီး ပြင်ပေးခဲ့တယ်လို့ ဒေသခံတယောက်က ပြောပါတယ်။
“မဲစာရင်းမှာ နာမည်တမျိုးကို ၃ ကြိမ်ပါတဲ့သူနဲ့၊ ၄ ကြိမ်ပါတဲ့သူနဲ့။ ပါတဲ့သူတွေကလည်း ကြံ့ခိုင်ရေးပါတီဝင်တွေချည်းပဲ။ ရွာကလူတွေ မပြောဘူး၊ အခြားပါတီတွေ ကန့်ကွက်တာနဲ့တူတယ်။ မနေ့က လဝက နဲ့ အုပ်ချုပ်ရေးက အိမ်တိုင်ရာရောက် လာပြင်ပေးတာ။”
မှော်ဘီမြို့နယ်၊ ပသီကုန်းကျေးရွာ နဲ့ ညောင်ကုန်းကျေးရွာမှာလည်း သေဆုံးသူနဲ့ ပြောင်းရွှေ့ မဲစာရင်းတွေ အများအပြားပါဝင်နေပြီး လက်ရှိနေထိုင်သူတွေ မပါတာကြောင့် ပြန်လည်စာရင်း ကောက်တာလို့ မြို့ခံတယောက်က ပြောပါတယ်။
“တကယ်နေတဲ့သူက မပါဘဲ ၂၀၂၀ က မဲစာရင်းမှာ ပါတဲ့သူတွေ ပြန်ပါလာတာ။ အဲလူတွေထဲမှာ တချို့က သေသွားပြီ၊ အချို့က ပြောင်းသွားပြီ မရှိတော့ဘူး။ သေပြီးသားသူတောင် မဲစာရင်းမှာ ၆ ခါလောက် ထည့်ထားတယ်။ လဝကရုံးက ဒီဇငဘာ ၄ ရက်အထိ ပြင်ပေးမယ်လို့ ပြောသွားတယ်။”
မဲစာရင်းမှားယွင်းမှုကြောင့် မနေ့က လဝက အဖွဲ့နဲ့ ကျေးရွာအုပ်ချုပ်ရေးအဖွဲ့တွေဟာ ရွှေမြယာကျေးရွာအုပ်စု၊ ပသီကျေးရွာအုပ်စု၊ ဆတ်သွားတောကျေးရွာအုပ်စု၊ မြောင်းတကာကျေးရွာအုပ်စုနဲ့ ညောင်ကုန်းကျေးရွာအုပ်စုမှာ စာရင်းအသစ် ပြန်လည်ကောက်ခံခဲ့ကြတာလို့ မြို့ခံတွေဆီက သိရပါတယ်။
ဒီဇင်ဘာ ၂၈ ရက် စစ်အုပ်စုပြုလုပ်မယ့် ရွေးကောက်ပွဲမှာ မှော်ဘီမြို့နယ်က ကြံ့ခိုင်ရေးအပါအဝင် ပါတီ ၈ ပါတီနဲ့ တသီးပုဂ္ဂလကိုယ်စားလှယ်တွေ ဝင်ပြိုင်မှာဖြစ်ပါတယ်။
စစ်အုပ်စုက ကျင်းပမယ့် ရွေးကောက်ပွဲမှာ ကြံ့ခိုင်ရေးပါတီအပါအဝင် ပါတီပေါင်း ၅၇ ပါတီက ကိုယ်စားလှယ်ပေါင်း ၅,၀၀၀ ကျော်ဝင်ပြိုင်မှာဖြစ်ပါတယ်။
အာဏာသိမ်းစစ်တပ်လုပ်မယ့် ရွေးကောက်ပွဲဟာ တရားမဝင်တဲ့ အတုအယောင် ရွေးကောက်ပွဲဖြစ်လို့ ပြည်သူတွေ ဝိုင်းဝန်းကန့်ကွက်ရှုတ်ချကြဖို့ အမျိုးသားညီညွတ်ရေးအစိုးရ (NUG) နဲ့ တော်လှန်ရေး အင်အားစုတွေက ထုတ်ပြန်ထားပါတယ်။
