အသက် ၁၃ နှစ်အရွယ် မိန်းကလေးငယ်တယောက်ကို ကိုယ်တွင်းဒဏ်ရာရအောင် ရိုက်နှက်ခဲ့တဲ့ မှော်ဘီမြို့နယ်၊ သရက်ညိုပင်ရွာက မေအိ တိဂေဟာပိုင်ရှင် အမျိုးသမီးကို နိုဝင်ဘာ ၁၂ ရက်က စစ်ကောင်စီလက်အောက်ခံ ရဲတွေက ဖမ်းဆီးခဲ့တယ်လို့ မြို့ခံတွေဆီက သိရပါတယ်။

နိုဝင်ဘာ ၁၁ ရက် နေ့လယ်က တိဂေဟာမှာ စောင့်ရှောက်ထားတဲ့ ခွေးလေခွေးလွင့်တွေ အစာကျွေးနေတဲ့ အသက် ၁၃ နှစ်အရွယ် မိန်းကလေးငယ်ကို ဂေဟာပိုင်ရှင်ဖြစ်သူ ဒေါ်မေအိလွင်က စိတ်တိုင်းမကျလို့ တနေကုန် ရိုက်နှက်ခဲ့ရာ ညပိုင်းမှာ ကလေးငယ်က ထွက်ပြေးခဲ့ပြီး ရေသိုးကျေးရွာထိပ်မှာ ဒဏ်ရာတွေနဲ့ သတိလစ် လဲကျနေတာကြောင့် ကျေးရွာအုပ်ချုပ်ရေးမှူးနဲ့ ကယ်ရီသမားတွေက ကူညီပေးခဲ့တယ်လို့ မြို့ခံတယောက်က ပြောပါတယ်။

“အရမ်းရိုက်လို့ ညဘက် ကလေးက ဂေဟာကနေ ထွက်ပြေးတာ၊ ရေသိုးရွာထိပ်မှာ ဒဏ်ရာတွေနဲ့ မေ့လဲနေတယ်။ ကယ်ရီဆွဲတဲ့သူ တွေ့ပြီး ကျေးရွာအုပ်ချုပ်ရေးမှူးကို အကြောင်းကြားပြီး မှော်ဘီဆေးရုံကို ပို့တာ၊ ဆေးရုံကမနိုင်ဘူး၊ ဘာလို့လဲဆိုတော့ ရိုက်နှက်ထားတာ အတွင်းကလီစာတွေပါ ထိနေလို့၊ အဲဒါနဲ့ မှော်ဘီဆေးရုံက လွှဲစာယူပြီး ရန်ကုန်ဆေးရုံကြီးကို ပို့လိုက်တယ်။ ကလေးမလေးက အခြေအနေမကောင်းဘူး။ ဂေဟာပိုင်ရှင်ကိုတော့ မနေ့မနက်ကပဲ ရဲတွေက ဖမ်းလိုက်တယ်။”

မေအိ & Kids Animals Lover ဂေဟာမှာ မှော်ဘီမြို့နယ်၊ ဘိုးဒေါနကုန်ကျေးရွာအုပ်စု သရက်ပင်ညိုကျေးရွာရဲ့ အရှေ့ပိုင်းမှာ တည်ရှိပြီး ခွေးလေခွေးလွင့် အပါအဝင် တခြား တိရစ္ဆာန် ၂၀၀ ကျော်ကို လူမှုကွန်ရက်မှာ အလှူခံပြီး ကျွေးမွေးစောင့်ရှောက်နေတာလို့ ပြောပါတယ်။

“ပင်မအလုပ်မရှိဘူး။ လမ်းဘေး ခွေးလေတွေ ခေါ်မွေး၊ တခြားတိရစ္ဆာန်တွေ ခေါ်မွေးပြီး လိုင်းပေါ်ကနေ အလှူခံပြီး စောင့်ရှောက်တာ။ အခုဖြစ်စဥ်မှာဆို ကိုယ့်သမီးလောက်ရှိတဲ့ အရွယ်လေးကို ရိုက်ထားတာ တိရစ္ဆာန်နဲ့ မခြားဘူး။ လူဆိုတာ မိမိကိုယ်ကိုယ် ကယ်တင်နိုင်မှ တခြားသတ္တဝါတွေကို ကယ်လို့ရတာ။ အဲဒီလိုပြောရင် တိချစ်သူတွေက ကျနော်တို့ကို အပြစ်တင်ဦးမယ်။”

အဆိုပါ ဂေဟာပိုင်ရှင် အမျိုးသမီး ဖမ်းဆီးခံရပြီးနောက် ဂေဟာအတွင်းမှာရှိတဲ့ တိရစ္ဆာန်အကောင် ၂၀၀ ကျော် စောင့်ရှောက်ပေးရမယ့် ကိစ္စမှာလည်း ကျေးရွာအတွက် အခက်အခဲဖြစ်နေတယ်လို့ သူက ရှင်းပြပါတယ်။

လတ်တလောမှာ မေအိ & Kids Animals Lover ပိုင်ရှင် ဒေါ်မေအိ(ခ)မေအိလွင်ကို မှော်ဘီမြို့မရဲစခန်းက ကလေးသူငယ် အခွင့်အရေးများဆိုင်ရာ ဥပဒေနဲ့ အမှုဖွင့်လှစ် စစ်ဆေးနေတယ်လို့ သိရပါတယ်။