၂၀၂၁ ခုနှစ် စစ်တပ်အာဏာသိမ်းပြီးနောက်ပိုင်း ကရင်ပြည်နယ်နဲ့ ထိုင်းနယ်စပ်မှာ ကျားဖြန့်ခေါ် အွန်လိုင်း ငွေလိမ်ဂိုဏ်းတွေ အခြေစိုက်တဲ့ နေရာတွေ ပိုများလာတယ်လို့ စစ်ကောင်စီရဲ့ ပြောရေးဆိုခွင့်ရှိသူ ဗိုလ်ချုပ်ဇော်မင်းထွန်းကပြောပါတယ်။

အဲဒီလို ပိုများလာတဲ့အကြောင်းကို ဒီကနေ့ထုတ် စစ်တပ်လက်အောက်ခံသတင်းစာတွေမှာ ဂြိုဟ်တု ဓာတ်ပုံနဲ့ ဖော်ပြထားပါတယ်။

ဒါအပြင် အဲဒီအဆောက်အအုံတွေ တိုချဲ့ဆောက်လုပ်နေကတည်းက သူတို့သိရှိခဲ့ကြောင်းလည်း သတင်းစာတွေမှာ ဗိုလ်ချုပ်ဇော်မင်းထွန်းက ပြောပါတယ်။

“၂၀၂၁ ခုနှစ် ဖေဖော်ဝါရီလ နောက်ပိုင်း နိုင်ငံရေးဖြစ်စဉ်တွေကြောင့် နိုင်ငံတော်ရဲ့ လုံခြုံရေးအခြေအနေတွေအပေါ် အခွင့်ကောင်းယူပြီး ဒီဒေသတွေမှာ တရားမဝင် အဆောက်အအုံတွေကို တိုးချဲ့ဆောက်လုပ်နေကြောင်း သိရှိခဲ့ရပါတယ်။”

ဒါပေမဲ့ အဲဒီအဆောက်အအုံတွေ  များလာတာဟာ ကရင်အမျိုးသားအစည်းအရုံး (KNU) မှာပဲ တာဝန်ရှိပြီး စစ်တပ်အနေနဲ့ ငွေလိမ်ဂိုဏ်းတွေ နှိမ်နင်းဖို့ပဲ လုပ်နေတယ်လို့ ဗိုလ်ချုပ်ဇော်မင်းထွန်းက ပြောပါတယ်။

ဒါပေမဲ့ နိုင်ငံတကာကတော့ ကျားဖြန့်လုပ်ငန်းတွေကနေ စစ်တပ်လက်အောက်ခံ ကရင်နယ်ခြားစောင့်တပ် (BGF) နဲ့ စစ်တပ်နဲ့ အပစ်ရပ်ထားတဲ့ ဒီမိုကရေစီအကျိုးပြုကရင်တပ်မတော် (DKBA) တို့က အကျိုးအမြတ်ရနေပြီး အရေးယူ ပိတ်ဆို့တာတွေ လုပ်ထားသလို စစ်တပ်ကလည်း ကျားဖြန့်လုပ်ငန်းကနေ အကျိုးအမြတ်တွေရနေတယ်လို့ ဆွေးနွေးပြောဆို၊ ထုတ်ပြန်တာတွေ ရှိပါတယ်။