တောင်ကိုရီးယား ဝန်ကြီးချုပ်ဟောင်း ဟန်ဒက်ဆူကို ပြီးခဲ့တဲ့ ဒီဇင်ဘာလက သမ္မတဟောင်း ယွန်းဆွတ်ယောလ်ရဲ့ စစ်အုပ်ချုပ်ရေးဆိုင်ရာ မအောင်မြင်တဲ့ ကြိုးပမ်းချက်ကို အားပေးအားမြှောက်ပြုတယ်ဆိုတဲ့ စွပ်စွဲချက်တွေအတွက် ထောင်ဒဏ် ၁၅ နှစ် ချမှတ်ဖို့ တောင်ကိုရီးယား အထူးအစိုးရရှေ့နေက နိုဝင်ဘာ ၂၆ ရက်မှာ တောင်းဆိုခဲ့ပါတယ်။
ဟန်ဟာ စစ်အုပ်ချုပ်ရေးနဲ့ ဆက်စပ်တဲ့ ရာဇ၀တ်မှုဆိုင်ရာ စွဲချက်တွေအတွက် အောက်တရားရုံးကနေ ဆုံးဖြတ်ချက်ချခံရတဲ့ ပထမဆုံး အစိုးရအဖွဲ့ဝင်ဟောင်း ဖြစ်လာမယ်လို့ မျှော်လင့်နေကြပါတယ်။
ဒါဟာ အမှုသည် ယွန်းရဲ့ လက်ရှိတရားခွင်နဲ့ နောက်ဆက်တွဲ စီရင်ချက်တွေအတွက် အခြေအနေကို သတ်မှတ်ပေးနိုင်ပါတယ်။
လာမယ့်နှစ်အစောပိုင်းမှာ ဟန်ရဲ့အမှုအတွက် ဆုံးဖြတ်ချက်တရပ် ပေါ်ပေါက်လာနိုင်တယ်လို့လည်း မီဒီယာတွေက ထင်ကြေးပေးနေကြပါတယ်။
ဟန်က တရားမဝင် အရေးပေါ်စစ်အုပ်ချုပ်ရေးကို ကြေညာတဲ့ “ပုန်ကန်မှုရဲ့ ခေါင်းဆောင်” အဖြစ် ယွန်းရဲ့ အခန်းကဏ္ဍကို ကူညီပံ့ပိုးပေးမှုအတွက် တရားစွဲဆိုခံထားရပါတယ်။
စွဲချက်အရ ဟန်က ဝန်ကြီးချုပ်အဖြစ် “နိုင်ငံတော်ရေးရာတွေမှာ ဒုတိယအကြီးအကဲ” အနေနဲ့ သမ္မတရဲ့ အာဏာအလွဲသုံးစားပြုမှုတွေကို ထိန်းချုပ်ဖို့ တာဝန်ရှိနေပါတယ်။
ဟန်က မမှန်သက်သေခံတာက လွဲလို့ စွပ်စွဲချက်တွေကို ငြင်းဆိုခဲ့ပါတယ်။ သူဟာ စစ်အုပ်ချုပ်ရေးဆိုင်ရာ အလုံးစုံ အစီအစဉ်ကို မသိရှိဘဲ စီးပွားရေးနဲ့ ပြင်ပယုံကြည်မှုအပေါ် သိသာထင်ရှားတဲ့ ပြဿနာတွေ ဖြစ်စေနိုင်လို့ သမ္မတရုံးမှာ ကန့်ကွက်ခဲ့တယ်လို့ ပြောခဲ့ပါတယ်။
Source: Reuters
