ပဲခူးတိုင်း၊ ဇီးကုန်းမြို့ပေါ်က KTV ကာရာအိုကေဆိုင်မှာ နိုဝင်ဘာ ၂၂ ရက်နေ့ ည ၁၁ နာရီဝန်းကျင်က သောက်စားပျော်ပါးနေကြတဲ့ စစ်သားနဲ့ ရဲတွေကို ဝင်ရောက်ပစ်ခတ်ခဲ့လို့ စစ်သားနဲ့ရဲ ၇ ယောက် သေဆုံးပြီး လက်နက်ခဲယမ်းတွေ သိမ်းဆည်းရရှိတယ်လို့ နတ်တလင်း ၃၈၀၁ တပ်ခွဲ ၃ (နတ်စစ်သည်တပ်ဖွဲ့) ဆီကနေ သိရပါတယ်။

နတ်တလင်း ၃၈၀၁ တပ်ခွဲ ၃ ပြန်ကြားရေးတာဝန်ခံက "ဇီးကုန်းမြို့ပေါ်က KTV တခုထဲမှာ ဝင်ပြီး သောက်စားပျော်ပါးနေကြတဲ့ ရဲနဲ့စစ်သား ၇ ယောက်ကို အခန်းထဲအထိ ဝင်ရောက် ပစ်ခတ်ရှင်းလင်းခဲ့တာ ဖြစ်ပါတယ်။ သူတို့ဘက်က ဘာမှတုံ့ပြန်ချိန်မရလိုက်ဘဲ ၇ ယောက်လုံး ရှောသွားပါတယ်” လို့ ပြောပါတယ်။

အဲဒီတိုက်ခိုက်မှုကို နတ်တလင်း ၃၈၀၁ တပ်ခွဲ ၃ (နတ်စစ်သည်တပ်ဖွဲ့) နဲ့အတူ ကြို့ပင်ကောက် (BTZM တပ်ဖွဲ့) တို့ ပူးပေါင်းလုပ်ဆောင်ခဲ့ကြတာဖြစ်တယ်လို့ ဆိုပါတယ်။

နတ်တလင်း ၃၈၀၁ တပ်ခွဲ ၃ တပ်ခွဲမှူး ကိုအောင် က “အဲဒီကောင်တွေက အဲဒီ KTV ကို ညတိုင်း လာတယ်လို့ သတင်းရထား​တာကြောင့်မို့လို့ အခု မစ်ရှင်ကို ဆောင်ရွက်ခဲ့တာပါ။ ဝင်ပစ်ပြီးတဲ့ အချိန်မှာ သူတို့ဘက်ကနေ ခွေးကားတွေနဲ့ ရောက်လာကြတာနဲ့ပဲ သေတဲ့ကောင်တွေဆီကနေ G3 သေနတ် ၁ လက်၊ ကျည်ဘောက်က ၄ ခု၊ ကျည်အတောင့် ၈၀၊ အီကွေ့မန့် ၂ ခု၊ ဓား ၃ ချောင်းနဲ့ လက်ထိတ် ၁ ခုတို့ သိမ်းဆည်းပြီး ပြန်ဆုတ်လာခဲ့ကြတာပါ။ မစ်ရှင်အတွင်းမှာတော့ ရုပ်သံနဲ့ ဓာတ်ပုံတွေ မရိုက်ကူးနိုင်ခဲ့ဘူးဗျ” လို့ DVB ကို ပြောပါတယ်။

စစ်ကောင်စီတပ်ဖွဲ့ဝင်တွေ ပစ်ခတ်ခံရအပြီး နိုဝင်ဘာ ၂၃ ရက်နေ့မနက်ပိုင်းအထိ ဇီးကုန်းမြို့ပေါ်နဲ့ မြို့အ​ဝင်အထွက်ဂိတ်တွေမှာ စစ်တပ်က အင်အားတိုးမြှင့်ချထားနေသလို လမ်းသွားလမ်းလာ ပြည်သူတွေကိုလည်း စစ်ဆေးတာတွေ ပြုလုပ်နေကြပေမယ့် တိုက်ခိုက်မှုမှာ ပါဝင်ခဲ့ကြတဲ့ တော်လှန်ရေးတပ်ဖွဲ့ဝင်တွေကတော့ သူတို့ရဲ့စခန်းအသီးသီးကို ဘေးကင်းကင်းနဲ့ ပြန်လည်ရောက်ရှိနေကြပြီလို့လည်း သူက ဆက်ပြောပါတယ်။

တိုက်ခိုက်ခံရမှုအတွင်း သေဆုံးသွားကြတဲ့ စစ်ကောင်စီတပ်ဖွဲ့​ဝင်တွေရဲ့ ရုပ်အလောင်းတွေကို စစ်တပ်ဘက်က ညတွင်းချင်း လာရောက်သယ်ဆောင်သွားကြတယ်လို့လည်း ဒေသခံတွေဆီကနေ သိရပါတယ်။