နေပြည်တော်မှာ စစ်ကောင်စီတပ်နဲ့ အုပ်ချုပ်ရေးအဖွဲ့တွေက စစ်မှုထမ်းတပ်သားသစ်တွေ ရရှိရေးအတွက် လူငယ်တွေကို ပေါ်တာဆွဲ ဖမ်းဆီးမှုတွေ ဆက်တိုက်လုပ်နေတာကြောင့် အိမ်ထဲက အိမ်အပြင် မထွက်ရဲအောင် ဖြစ်နေတယ်လို့ မြို့ခံတွေဆီက သိရပါတယ်။
ဇမ္ဗူသီရိမြို့နယ်၊ ဂုံမင်းအင်းကျေးရွာအနီးမှာ နိုဝင်ဘာ ၁၈ ရက်က မိန်းမဖြစ်သူဆီလာတဲ့ လူငယ်တယောက်ကို စစ်ကောင်စီတပ်နဲ့ အုပ်ချုပ်ရေးအဖွဲ့တွေက လက်ထိပ်ခတ် ဖမ်းဆီးခေါ်ဆောင်သွားတယ်လို့ မြို့ခံတယောက်က ပြောပါတယ်။
“ကောင်လေးက ကုန်းပေါ်ရွာမှာနေတာ၊ ဇမ္ဗူသီရိမှာနေတဲ့ သူ့မိန်းမဆီလာတာ၊ အုပ်ချုပ်ရေးနဲ့ စစ်တပ်က ဧည့်စာရင်းနဲ့ဖမ်းပြီး သင်တန်းကျောင်းပို့လိုက်တယ်။ သူ့မိန်းမလေး ငိုလိုက်တာ၊ မင်္ဂလာဆောင်ထားတာ ၃ ရက်ပဲ ရှိသေးတယ်။ ဘယ်သူ့ကိုမှ တိုင်လို့မရဘူး။”
လယ်ဝေးမြို့နယ်မှာလည်း စစ်မှုထမ်းအတွက် ပေါ်တာဆွဲ ဖမ်းဆီးမှုတွေ အရင်ကထက် ပိုဆိုးလာပြီး လူငယ်တွေဟာ မနက်စောစောနဲ့ ညဘက် အပြင်မထွက်ရဲဘူးလို့ မြို့ခံတယောက်က ပြောပါတယ်။
“လယ်ဝေးမှာဆို ပိုဆိုးတယ်၊ ညဘက်နဲ့ မနက်စောစော အပြင်မထွက်ရဲဘူး။ စစ်တပ်က ကင်းလှည့်ပြီး ပေါ်တာဆွဲတာ။ ဒီလမှာ ဖမ်းတာ ၃ ယောက်ရှိတယ်။ ရှေ့လကဆို လယ်ဝေးကနေ တသီးပုဂ္ဂလ ဝင်ပြိုင်မယ့် ဦးစိန်ဝင်းရဲ့ အောင်နိုင်ရေး ဆောင်ရွက်နေတဲ့ လူငယ်လေးကို စစ်တပ်က ပေါ်တာဆွဲသွားတယ်။ သူလိုက်ထုတ်တာတောင် မရဘူး။ လူငယ်တွေက ည ၆ နာရီကျော်တာနဲ့ အိမ်တံခါးပိတ်နေရတယ်။”
ပျဥ်းမနားမြို့နယ် ကြံ့ဖို၊ ကျွန်းဦးနဲ့ ဇီးဖြူကျေးရွာဘက်မှာလည်း စစ်ကောင်စီတပ်က ပေါ်တာဆွဲ ဖမ်းဆီးမှုတွေရှိလို့ လူငယ်အများစုမှာ ရန်ကုန်က စက်မှုဇုန်တွေမှာ အလုပ်သွားလုပ်နေရတယ်လို့ မြို့ခံတယောက်က ပြောပါတယ်။
“စစ်မှုထမ်းဆင့်ခေါ်တာက တမျိုး၊ ပေါ်တာဆွဲတာတမျိုး ဆိုတော့ ပျဥ်းမနားမှာ လူငယ်တွေ သိပ်မနေရဲဘူး။ ညဘက် အပြင်မထွက်ရဲဘူး။ အကြောင်းရှိလို့ ထွက်ရင်တောင် အုပ်စုလိုက် ထွက်ရတယ်။ တချို့ဆို ရန်ကုန်က စက်မှုဇုန်တွေမှာ အလုပ်သွားလုပ်ကြတယ်။ ပေါ်တာဆွဲတဲ့ဒဏ် မခံနိုင်လို့။”
စစ်ကောင်စီအုပ်ချုပ်ရာ နေပြည်တော်မှာ ပုဗ္ဗသီရိ၊ ဇမ္ဗူသီရိ၊ ဥတ္တရသီရိ၊ ဇေယျာသီရိ၊ ဒက္ခိဏသီရိ၊ တပ်ကုန်း၊ ပျဥ်းမနားနဲ့ လယ်ဝေးမြို့နယ် ၈ မြို့နယ်ရှိပြီး စစ်မှုထမ်းတွေအားလုံးကို အမှတ် ၂ တန်းမြင့်သင်တန်းကျောင်းကို ပို့နေတာပါ။
မြန်မာနိုင်ငံတဝန်း ဒီလို ပေါ်တာဆွဲ ဖမ်းဆီးပြီး စစ်ကောင်စီတပ်က နယ်တွေမှာ လူစားထိုးဖို့အတွက် ပြန်လည်ရောင်းစားတာတွေရှိပေမဲ့ စစ်တပ်ဘက်ကတော့ အခုချိန်ထိ ဝန်မခံဘဲ ငြင်းဆိုထားပါတယ်။
စစ်မှုထမ်းဥပဒေကို စစ်ခေါင်းဆောင်က ၂၀၂၄ ဖေဖော်ဝါရီ ၁၀ ရက်မှာ အသက်သွင်းခဲ့ပြီး မတ်လ ၂၈ ရက်က စတင်ခေါ်ယူခဲ့ရာ အခုဆို အပတ်စဥ် ၂၀ ကို ရောက်ရှိလာပြီ ဖြစ်ပါတယ်။
