ရန်ကုန်မြို့၊ လမ်းမတော်မြို့နယ်မှာ လိုက်ထရပ်ယာဥ်တစီး အရှိန်လွန်ပြီး လမ်းဘေးသွားလာနေသူ တချို့ကို ဝင်တိုက်ပြီး တိမ်းမှောက်ခဲ့တာကြောင့် အမျိုးသားတယောက် သေဆုံးခဲ့တယ်လို့ မီးသတ်တပ်ဖွဲ့က ထုတ်ပြန်ထားပါတယ်။
လမ်းမတော်မြို့နယ်၊ မော်တင်ယာယီစျေးနားမှာ နိုဝင်ဘာ ၂၀ ရက် နေ့လယ် ၂ နာရီခွဲလောက်က ဖြစ်ခဲ့တာလို့ ဆိုပါတယ်။
အဲဒီ လိုက်ထရပ်ယာဥ်က အရှိန်လွန်တိုက်မိခဲ့လို့ လမ်းဘေးမှာရှိနေသူ ၃ ယောက် ထိခိုက်ဒဏ်ရာ ရရှိခဲ့ပြီး အမျိုးသားတယောက် သေဆုံးခဲ့ကာ သေဆုံးသူကို အေးမေတ္တာ လူမှုကူညီရေးအသင်းက လူနာတင်ယာဉ်နဲ့ ရန်ကုန်ပြည်သူ့ဆေးရုံကြီးကို ပို့ဆောင်ပေးခဲ့တယ်လို့ ထုတ်ပြန်ထားပါတယ်။
လမ်းမတော်မြို့နယ်အနီး နေထိုင်သူတယောက်က “ကားက အရှိန်ပြင်းပြင်းနဲ့ ဝင်တိုက်သွားတာလို့ ပြောတယ်။ ဖြစ်တဲ့အချိန်တုန်းက အပြင်ရောက်နေလို့ ကိုယ်တိုင်တော့ မတွေ့လိုက်ဘူး။ ထိခိုက်မိတဲ့သူတွေကို အဲဒီအနီးအနားက သူတွေကပဲ ဆေးရုံပို့ပေးလိုက်ကြတယ် ပြောတယ်” လို့ ပြောပါတယ်။
ရန်ကုန်မြို့လယ်မှာ ပြီးခဲ့တဲ့လကုန်ပိုင်းကလည်း အောက်ဆိုက်ပြေးဆွဲနေတဲ့ လိုက်ထရပ်ယာဥ်တစီး အရှိန်လွန် တိမ်းမှောက်ခဲ့လို့ ယာဥ်မောင်းသေဆုံးကာ ခရီးသည်တချို့ ဒဏ်ရာအပြင်းအထန်ရရှိခဲ့ပါတယ်။
