ရန်ကုန်၊ လမ်းမတော်မြို့နယ်၊ ဗိုလ်ချုပ်လမ်းနဲ့ မော်တင်လမ်းထောင့်မှာ ဇန်နဝါရီ ၂၈ ရက် ညက ကား ၃ စီး ဆင့်တိုက်ပြီး ၁ ဦးသေဆုံး၊ ၅ ဦး ဒဏ်ရာရရှိခဲ့တယ်လို့ ရှင်သန်ရေးကူညီမှုအသင်းက ပြောပါတယ်။
ဇန်နဝါရီ ၂၈ ရက် ည ၁၁ နာရီလောက်က လမ်းမတော်မြို့ ဗိုလ်ချုပ်လမ်းပေါ်မှာ ဟိုက်ဂျက်၊ ရွှေငါးနဲ့ ပြိုင်ကားတို့ တိုက်မိပြီး ဟိုက်ဂျက်ပေါ်ပါလာတဲ့ အသက် ၅၆ နှစ်အရွယ် အမျိုးသား ၁ ဦး သေဆုံးခဲ့သလို အမျိုးသား ၄ ဦးနဲ့ အမျိုးသမီး ၁ ဦးလည်း ဒဏ်ရာရရှိခဲ့ပါတယ်။
ရှင်သန်ရေးကူညီမှုအသင်း တာဝန်ရှိသူတဦးက “ရွှေငါးက ဗဟိုစည်ဆေးရုံမရောက်ခင် တလမ်းပေါ့၊ ဘယ်ဘက်ကိုကွေ့တဲ့အချိန် ဟိုက်ဂျက်နဲ့ ပြိုင်ကားနဲ့က တိုက်တယ်လို့ အကြမ်းဖျင်း သိထားတယ်။ အားလုံး ၇ ဦးမှာ ၁ ဦးသေပြီး ၅ ဦးကတော့ နည်းနည်း ကျိုးတာတို့ ဘာတို့ရှိတယ်။ စိုးရိမ်ရတဲ့သူကတော့ ခေါင်းထိသွားတဲ့သူတယောက်တော့ ရှိတယ်။ သေသွားတဲ့သူက ဟိုက်ဂျက်ပေါ်က ယာဉ်မောင်းပါ” လို့ ပြောပါတယ်။
ယာဉ်တိုက်မှုကြောင့် သေဆုံးခဲ့တဲ့ အမျိုးသား ၁ ဦးနဲ့ ဒဏ်ရာရရှိသူ ၅ ဦးကို ဝင်းမေတ္တာအသင်း၊ ရွှေကံ့ကော်အသင်း လူနာတင်ကားတွေနဲ့ ရန်ကုန်ဆေးရုံကြီးကို ပို့ဆောင်ပေးခဲ့ပါတယ်။
ဇန်နဝါရီ ၂၅ ရက်ကလည်း ဗိုလ်တထောင်မြို့နယ် မဟာဗန္ဓုလလမ်းနဲ့ သိမ်ဖြူလမ်းထောင့်မှာ ကားနှစ်စီးတိုက်မိပြီး အမျိုးသား ၁ ဦးနဲ့ အမျိုးသမီး ၁ ဦး ဒဏ်ရာရရှိခဲ့ပါတယ်။
