မကွေးတိုင်း၊ မြိုင်မြို့နယ် အနောက်ပိုင်းက ကံကြီးရွာကို စစ်ကောင်စီလေတပ်က ဒီနေ့ နိုဝင်ဘာ ၂၀ ရက် မနက် ၁ နာရီခွဲမှာ ဗုံးကြဲတိုက်ခိုက်တာကြောင့် အရပ်သား ၇ ယောက် သေဆုံးပြီး အယောက် ၂၀ ဝန်းကျင် ဒဏ်ရာရသွားတယ်လို့ ဒေသခံတွေဆီက သိရပါတယ်။

စစ်ကောင်စီလေတပ်ရဲ့ ဗုံးကြဲတိုက်ခိုက်တာကြောင့် ကံကြီးရွာက နေအိမ် ၁၀ လုံးမှာ ၇ လုံးက ပျက်စီးမှုများပြီး ဒေသခံ အရပ်သား ကလေး ၃ ယောက်နဲ့ လူကြီး ၂ ယောက် ပွဲချင်းပြီး သေဆုံးသလို အယောက် ၂၀ ကျော်လည်း အပြင်းအထန် ဒဏ်ရာရတယ်လို့ ဆိုပါတယ်။

ဒေသခံတယောက်က “ပြင်းထန်ဒဏ်ရာရတာက ၂၀ ဦးကျော်လောက် ရှိတယ်။ ဆေးရုံပို့ထားရတယ်။ ဒီမနက်မှာပဲ ၂ ယောက် ထပ်သေဆုံးတယ်။ အမည်တွေနဲ့ အသက်တွေကိုတော့ မသိရသေးဘူး” လို့ DVB ကို ပြောပါတယ်။

စစ်ကောင်စီဟာ မြိုင်မြို့နယ်ဘက်ကို စစ်ကြောင်းထိုးနေတာတွေရှိပြီး ကံကြီးရွာကို ဒီနှစ်ထဲ ၄ ကြိမ် ဗုံးကြဲတိုက်ခိုက်ခဲ့သလို လက်ရှိမှာလည်း ပါရာမော်တာအန္တရာယ်ကို ထပ်ပြီး စိုးရိမ်နေကြရတယ်လို့ ဆိုပါတယ်။

ဒေသခံတယောက်ကလည်း “စစ်ကြောင်းထိုးနေတာတွေလည်း ရှိပါတယ်။ လတ်တလောကတော့ ၇ ဦး သေဆုံးတယ်။ ၂၀ ဦးကျော်လောက် ဒဏ်ရာရတာ မှန်ပါတယ်။ အသေးစိတ်ကိုတော့ ပြောပြလို့ မရသေးဘူး” လို့ ပြောပါတယ်။

နိုဝင်ဘာလဆန်းကစလို့ မြိုင်နယ်၊ ပေါက်နယ်တို့ကို စစ်ကောင်စီတပ်တွေ အင်အားအလုံးအရင်းနဲ့ စစ်ကြောင်းထိုးလာနေလို့ ဒေသခံထောင်ချီ စစ်ဘေးရှောင်နေကြရသလို စစ်ကောင်စီတပ်တွေ ဗုံးကြဲတိုက်ခိုက်တာ၊ ဖမ်းဆီးသတ်ဖြတ်တာတွေ ရှိနေတယ်လို့လည်း သိရပါတယ်။