ချင်းပြည်နယ်၊ တီးတိန်မြို့နယ်က တီးတိန်-ကလေး လမ်းပိုင်းမှာရှိတဲ့ ကနေဒီတောင်တပ်စခန်း နေရာကို နိုဝင်ဘာ ၁၈ ရက် မနေ့က ချင်းတော်လှန်ရေးတပ်က ပြန်လည်သိမ်းယူလိုက်တယ်လို့ စစ်ရေးသတင်းရင်းမြစ်တွေက ပြောပါတယ်။

ပြီးခဲ့တဲ့ အောက်တိုဘာလကုန်ပိုင်းကစပြီး တီးတိန်းမြို့ကနေ စစ်ကြောင်းတကြောင်း၊ စစ်ကိုင်းတိုင်း ကလေးမြို့ကနေ တကြောင်း စုစုပေါင်း စစ်ကြောင်းနှစ်ကြောင်းနဲ့ တီးတိန်-ကလေး လမ်းပိုင်းကို နှစ်ဖက်ညှပ်ပြီး စစ်ကြောင်းထိုးလာပြီးနောက် တော်လှန်ရေးတပ်တွေ ထိန်းချုပ်ထားတဲ့ ကနေဒီတောင်နဲ့ သိုင်းငင်းစခန်းတွေကို လက်လွှတ်ခဲ့ရတာပါ။

ဒါပေမဲ့ ကနေဒီတောင်စခန်းကို မနေ့ကပဲ ချင်းတော်လှန်ရေးတပ်တွေက ပြန်လည် တိုက်ခိုက်သိမ်းယူခဲ့ပြီး လက်နက်ခဲယမ်းတွေကိုပါ သိမ်းဆည်းရမိခဲ့တယ်လို့ PDF Zoland က နိုဝင်ဘာ ၁၈ ရက်မှာ ထုတ်ပြန်ခဲ့ပါတယ်။

အမြင့်ပေ ၈,၀၀၀ ကျော်ရှိတဲ့ ကနေဒီတောင်ကုန်းဟာ စစ်ရေးအရသာမက စီးပွားရေး၊ ကူးသန်းသွားလာရေး စတဲ့ ဘက်ပေါင်းစုံအတွက် ဗျူဟာမြောက် အရေးပါပြီး တီးတိန်-ကလေး လမ်းတလျှောက်ကို အပေါ်စီးကနေ မြင်နေရသလို ဖလမ်းမြို့ကိုပါ လှမ်းမြင်ရလောက်တဲ့အထိ အမြင့်မှာ တည်ရှိနေတဲ့ ပထထဝီမြေ အနေအထားက အဓိကထူးခြားချက် ဖြစ်တယ်လို့ ဆိုပါတယ်။

ကနေဒီတောင်ကို တော်လှန်ရေးတပ်တွေ သိမ်းယူပြီးနောက် ဒီနေ့မှာလည်း သိုင်းငင်းရွာ တဝိုက်မှာလည်း ကလေးဘက်ကနေ စစ်ကြောင်းထိုးလာတဲ့ စစ်ကောင်စီတပ်နဲ့ ချင်းတော်လှန်ရေးတပ်တွေကြား တိုက်ပွဲပြင်းထန်နေတယ်လို့ စစ်ရေးသတင်းရင်းမြစ်က ပြောပါတယ်။

ချင်းပြည်နယ် မြောက်ပိုင်းက လက်လွှတ်ခဲ့တဲ့နယ်မြေတွေ ပြန်ထိန်းချုပ်နိုင်ဖို့ စစ်ကောင်စီက အပြင်းအထန် စစ်ရေးလှုပ်ရှားလာတယ်လို့ SOW လက်နက်ထုတ်လုပ်ရေးတာဝန်ခံ ဗိုလ်လရောင်က DVB ကို ပြောပါတယ်။

“ချင်းမြောက်ပိုင်းကို နည်းလမ်းပေါင်းစုံနဲ့ကို စစ်ကြောင်းထိုးနေတာပဲ။ နေရာပေါင်းစုံက စစ်ကြောင်းတွေခွဲပြီး ထိုးနေတာ။ ဒီနေ့မှာလည်း သိုင်းငင်းတဝိုက်မှာ တိုက်ပွဲပြင်းထန်နေတယ်။ ကလေးဘက်ကနေ စစ်ကြောင်းထိုးလာနဲ့ စစ်ကြောင်းကို ဟန့်တားတိုက်ခိုက်နေတယ်။ သူတို့ စစ်ကြောင်းထိုးတဲ့ပုံစံက ချင်းမြောက်တခုလုံးက လက်လွှတ်ခဲ့တဲ့ နယ်မြေတွေကို ပြန်သိမ်းပိုက်ပြီး ရွေးကောက်ပွဲ လုပ်နိုင်အောင်ပါ။”

နိုဝင်ဘာ ၁၇ ရက်ကလည်း ဖလမ်းမြို့ကို စစ်ကြောင်းထိုးဖို့ ပြင်ဆင်နေတဲ့ စစ်ကောင်စီတပ်ကို ချင်းတော်လှန်ရေးတပ်‌တွေက ကြားဖြတ်တိုက်ခိုက်ခဲ့ရာ လက်နက်ခဲယမ်း အများအပြားနဲ့ စစ်သုံ့ပန်းတချို့ ဖမ်းမိခဲ့တယ်လို့ ဆိုပါတယ်။

ချင်းပြည်နယ် ဟားခါး၊ တီးတိန်နဲ့ စစ်ကိုင်းတိုင်း ကလေးကို ဆက်သွယ်ထားတဲ့ လမ်းပိုင်းနဲ့ ဖလမ်းမြို့ကို တော်လှန်ရေးတပ်တွေ ထိန်းချုပ်လိုက်ပြီးနောက် စစ်ကောင်စီအတွက် ထောက်ပို့လမ်းကြောင်းတွေ ဖြတ်တောက်ခံလိုက်ရတာပါ။

စစ်ကောင်စီက ဖလမ်းမြို့ အပါအဝင် အချက်အချာကျတဲ့ လမ်းပိုင်းတွေကို ပြန်ထိန်းချုပ်ဖို့ စစ်အင်အား အလုံးအရင်းကို အသုံးပြုပြီး စစ်ကြောင်းထိုးနေကာ လေကြောင်းတိုက်ခိုက်မှုလည်း ခပ်စိပ်စိပ် လုပ်ဆောင်နေတယ်လို့ တော်လှန်ရေးတပ်တွေက ပြောပါတယ်။