ရန်ကုန်တိုင်းက မြို့နယ်တချို့မှာ စစ်တပ်ကျောထောက်နောက်ခံ ကြံ့ခိုင်ရေးပါတီရဲ့ မဲဆွယ်ဆိုင်းဘုတ်တွေ ဖျက်ခံရတာ မဖြစ်ရအောင် ဘေးတွဲမောင်းသူနဲ့ သတင်းပေးတချို့ကို အလှည့်ကျစောင့်ကြည့်ဖို့ စေခိုင်းထားတယ်လို့ ဒေသခံတွေဆီက သိရပါတယ်။
ရွေးကောက်ပွဲ ဝင်ပြိုင်မယ့်ပါတီတွေက မဲဆွယ်ဆိုင်းဘုတ်တွေ စိုက်ထူလာကြသလို အဲဒီဆိုင်းဘုတ်တွေ ဖျက်ဆီးခံရတာတွေလည်း ရှိလာတဲ့အတွက် ဖျက်ဆီးခံရတာ အများဆုံး ကြုံတွေ့နေရတဲ့ ကြံ့ခိုင်ရေးပါတီက ရပ်ကျေးအုပ်ချုပ်ရေးမှူးရုံးတွေကတဆင့် စောင့်ကြည့်ခိုင်းတာတွေ လုပ်နေတာလို့ ဆိုပါတယ်။
သင်္ဃန်းကျွန်းမြို့နယ်မှာ အနှေးယာဉ်လုပ်သားတယောက်က “ဘေးတွဲမောင်းတဲ့သူတွေ အလှည့်ကျ ဆိုင်းဘုတ်လုံခြုံရေး စောင့်ရမယ်ဆိုလို့ ညစ်နေကြတယ်လေ။ ဒီအတိုင်း ထိုင်စောင့်ခိုင်းတာမျိုးတော့ မဟုတ်ဘူး၊ အနီးဝန်းကျင်မှာ ရှိနေရမယ်လို့ ခိုင်းထားတယ် ပြောတာပဲ” လို့ ပြောပါတယ်။
ရန်ကုန်မြို့မှာ ကြံ့ခိုင်ရေးပါတီရဲ့ မဲဆွယ်ဆိုင်းဘုတ် ဖျက်ဆီးခံနေရလို့ ရဲတပ်ဖွဲ့က လုံခြုံရေးပေး စောင့်ကြည့်ဖို့ ညွှန်ကြားမှုရှိတယ် ဆိုတဲ့သတင်း ထွက်နေပေမဲ့ နယ်မြေမှာရှိတဲ့ ရဲအင်အားနဲ့ အချိန်ပြည့် စောင့်ကြည့်ပေးနေဖို့ မဖြစ်နိုင်တဲ့အတွက် အရပ်သားထဲက ဖိအားပေးခိုင်းလို့ ရမယ့်သူတွေကို ပြန်ခိုင်းထားတဲ့သဘော ဖြစ်တယ်လို့ အုပ်ချုပ်ရေးပိုင်းနဲ့ နီးစပ်သူတယောက်က ပြောပါတယ်။
“သီးခြားညွှန်ကြားချက်နဲ့ ခိုင်းတာမျိုး မဟုတ်ဘူး။ ရပ်ကွက်ရုံးတွေက အဆင်ပြေသလို သူတို့နဲ့ မကင်းတဲ့သူတွေကို တာဝန်ပေးတဲ့သဘော။ မဟုတ်လို့ သူ့အပိုင်ထဲမှာ တခုခုဖြစ်သွားရင် အကြိတ်ခံရမှာလေ။”
စစ်ကောင်စီက ရွေးကောက်ပွဲ မဲဆွယ်ကာလ မတိုင်ခင်ကတည်းက ဘေးတွဲမောင်းသူနဲ့ ဥပဒေနဲ့ မလွတ်ကင်းတဲ့လုပ်ငန်း လုပ်နေသူတွေကို လိုအပ်တဲ့နေရာတွေမှာ အသုံးချနိုင်အောင် အောက်ခြေ အုပ်ချုပ်ရေးအဖွဲ့တွေက လက်သပ်မွေးနိုင်ဖို့ လမ်းဖွင့်ပေးထားခဲ့တာ ရှိပါတယ်။
အဲဒီနောက် ဘေးတွဲမောင်းသူတွေကို ပြည်သူ့လုံခြုံရေးအဖွဲ့ထဲဝင်မှ အဖမ်းအဆီးမခံရစေဘဲ ဆက်လုပ်ခွင့်ပေးမယ်လို့ အကျပ်ကိုင်ပြီး အဖွဲ့ဝင်နံပါတ်တွေ ထုတ်ပေးခဲ့သလို လုံခြုံရေးပိုင်းနဲ့ ညပိုင်း ကင်းလှည့်တာ၊ ဧည့်စာရင်းစစ်တာတွေမှာ အလှည့်ကျ လိုက်ခိုင်းတာမျိုး ရှိခဲ့ကာ အခု စစ်အုပ်စုရဲ့ ကျောထောက်နောက်ခံပါတီအတွက်ပါ အသုံးချလာတာ ဖြစ်ပါတယ်။
အာဏာသိမ်းစစ်တပ်က လုပ်မယ့် ရွေးကောက်ပွဲဟာ တရားမဝင်တဲ့ အတုအယောင် ရွေးကောက်ပွဲ ဖြစ်တယ်လို့ အမျိုးသားညီညွတ်ရေးအစိုးရ (NUG) နဲ့ တော်လှန်ရေးအင်အားစုတွေက ထုတ်ပြန်ထားပါတယ်။
