ဒီနေ့မနက်အစောပိုင်းမှာ ကစားခဲ့တဲ့ ကမ္ဘာ့ဖလား ဥရောပဇုန်ခြေစစ်ပွဲမှာ ခရိုအေးရှားအသင်းက ဖာရိုးကျွန်းစုအသင်းကို ၃ ဂိုး ၁ ဂိုးနဲ့ နိုင်သွားတဲ့အတွက် ကမ္ဘာ့ဖလား ခြေစစ်ပွဲအောင်သွားပြီဖြစ်ပါတယ်။
ဒါကြောင့် ခရိုအေးရှားအသင်းရဲ့ ကွင်းလယ်ကစားသမား လူကာမိုဒရစ်ဟာ သူ့ရဲ့ ကစားသမား ဘဝသက်တမ်းမှာ ၅ ကြိမ်မြောက်အဖြစ် ကမ္ဘာ့ဖလားပြိုင်ပွဲမှာ ဝင်ကစားခွင့်ရတော့မှာဖြစ်ပါတယ်။
ခြေစွမ်းပြနေဆဲဖြစ်တဲ့ အသက် ၄၀ အရွယ် အေစီမီလန်ကွင်းလယ်လူဟာ ခရိုအေးရှား နိုင်ငံအသင်းအတွက် ၁၉၂ ပွဲကစားပြီး ၂၈ ဂိုး သွင်းယူထားပါတယ်။
သူဟာ နိုင်ငံအသင်းနဲ့အတူ ၂၀၀၆၊ ၂၀၁၄၊ ၂၀၁၈၊ ၂၀၂၂ ကမ္ဘာ့ဖလားပွဲတွေ ကစားထားပြီး လာမယ့် ၂၀၂၆မှာ သူ့ရဲ့ ၅ ကြိမ်မြောက် ကမ္ဘာ့ဖလားပွဲကို ကစားတော့မှာပါ။
သူဟာ ၂၀၁၈ ကမ္ဘာ့ဖလားပြိုင်ပွဲမှာ ရွှေဘောလုံးဆုရခဲ့သူဖြစ်ပြီး အဲဒီနှစ်မှာပဲ ကမ္ဘာ့အကောင်းဆုံး ကစားသမားဆု Ballon d’Or ဆုကိုလည်း ရရှိခဲ့သူဖြစ်ပါတယ်။
