ပဲခူးတိုင်း၊ ရွှေကျင်မြို့နယ်မှာ ကြံ့ခိုင်ရေးကိုယ်စားလှယ်လောင်း စည်းရုံးရေးပွဲကို မဖြစ်မနေလာရမယ်လို့ ဖိအားပေးခဲ့တဲ့ ပါတီအလုပ်အမှုဆောင်အမျိုးသမီးတယောက် နိုဝင်ဘာ ၁၄ ရက်က ဓားနဲ့ခုတ်ခံရတယ်လို့ မြို့ခံတွေဆီက သိရပါတယ်။

ရွှေကျင်မြို့နယ်၊ အနောက်တောင်ကျေးရွာမှာ ကြံ့ခိုင်ရေးပါတီက လွှတ်တော်ကိုယ်စားလှယ်လောင်းတွေ မဲဆွယ်စည်းရုံးရေးဆင်းခဲ့ပြီး ကျေးရွာအလုပ်အမှုဆောင် အမျိုးသမီးက တအိမ်တယောက် မဖြစ်မနေလာရမယ်လို့ ဖိအားပေးခေါ်ခဲ့တာကြောင့်  ကျေးရွာထဲက အမျိုးသားတယောက်က ဓားနဲ့လိုက်ခုတ်ခဲ့တာလို့မြိုခံတယောက်က DVB ကို ပြောပါတယ်။

“မနေ့က ရွှေကျင်မှာ ကြံ့ခိုင်ရေးကိုယ်စားလှယ်တွေ မဲဆွယ်စည်းရုံးရေးဆင်းတယ်။ အလုပ်အမှုဆောင်အမျိုးသမီးက ရွာသားတွေကို မလာမနေရပုံစံမျိုးနဲ့ဖိအားပေးခေါ်တယ်။ ဒါကို မကျေနပ်တဲ့ ရွာသားတယောက်က ဓားနဲ့လိုက်ခုတ်တာ။ အဲဒီအမျိုးသမီးလည်း ဒဏ်ရာရသွားတယ်။ ဓားနဲ့ခုတ်တဲ့သူလည်း အဖမ်းခံလိုက်ရတယ်။ ရွှေကျင်မှာ ကြံ့ခိုင်ရေးကို ဘယ်သူမှလက်မခံတာ” လို့ ပြောပါတယ်။

ဒဏ်ရာရရသူဟာ ကြံ့ခိုင်ရေးပါတီရဲ့ အလုပ်အမှုဆောင် ဒေါ်အမာစိန်ဖြစ်ပြီး ကိုယ်စားလှယ်လောင်းတွေက ဖိတ်ခိုင်းလို့ အနောက်တောင်ကျေးရွာထဲမှာ စစ်သား၊ ရဲတွေနဲ့အတူ တအိမ်တက်ဆင်း လိုက်လံခေါ်ယူခဲ့ပြီး ဒုတိယကြိမ်ခေါ်ယူရာမှာ ဓားနဲ့ခုတ်ခံရတာလို့ ဖြစ်စဉ်ကိုသိသူတယောက်က DVB ကို ပြောပါတယ်။

“တခြားနယ်ကလာတဲ့ ကိုယ်စားလှယ်လောင်းအတွက်နဲ့ကိုယ့်ရွာကို ဒုက္ခပေးတာ။ ရွာကလက်မခံရင် မခေါ်နဲ့ပေါ့။ အင်အားပြပြီး စစ်တပ်ပုံစံမျိုးချိုးတော့ ရွာထဲက လက်မခံနိုင်တဲ့သူက ဓားနဲ့လိုက်ခုတ်ရော။ သူလည်းဒဏ်ရာရ၊ ရွာကသူလည်း အဖမ်းခံရတယ်” လို့ ရှင်းပြပါတယ်။

ကြံ့ခိုင်ရေးပါတီ အလုပ်အမှုဆောင်အမျိုးသမီး ဓားနဲ့ခုတ်ခံရပြီးနောက် စစ်သားနဲ့ရဲတွေက ကျေးရွာကို ပိတ်ဆို့ပြီး ဓားနဲ့ခုတ်သူကို ဖမ်းဆီးခဲ့တယ်လို့ သူက ဆက်ပြောပါတယ်။

ဓားနဲ့ခုတ်သူ ကိုဝင်းဦး ကို ရွှေကျင်မြို့မရဲစခန်းက (ပ) ၄၄ /၂၀၂၅ ရွေးကာဥပဒေပုဒ်မ ၂၄ (က) နဲ့ အမှုဖွင့်အရေးယူထားတယ်လို့ သိရပါတယ်။

ပြီးခဲ့တဲ့ အောက်တိုဘာ ၃၁ ရက်ကလည်း ရန်ကုန်၊ ဒလမြို့နယ်၊ ရခိုင်ချောင်ကျေးရွာမှာ ကြံ့ခိုင်ရေးပါတီအတွက် မဲဆွယ်စည်းရုံးနေတဲ့ ကျေးရွာကော်မရှင်အဖွဲ့ဝင်ကို လက်သီးနဲ့ထိုးလို့ အမျိုးသားတယောက် ဖမ်းဆီးခံခဲ့ရပါသေးတယ်။