ရခိုင်ပြည်နယ်၊ ပဲခူးတိုင်း၊ မကွေးတိုင်း၊ ဧရာဝတီတိုင်းတို့မှာ ဖြစ်ပွားတဲ့ တိုက်ပွဲတွေအတွင်း စစ်ကောင်စီတပ်ဖွဲ့ဝင်တွေ အလံဖြူထောင်တာ၊ လက်နက်ချတာနဲ့ တပ်ပြေးအပါအဝင် ဖမ်းဆီးရမိသူ အယောက် ၇၀ ကျော်ရှိတယ်လို့ အာရက္ခတပ်တော် (AA)က နိုဝင်ဘာ ၁၁ ရက်မှာ ထုတ်ပြန်ပါတယ်။
နိုဝင်ဘာ ၈၊ ၉၊ ၁၀ ရက်တွေမှာ ကပစ ၁၆ အနီး တိုက်ပွဲတွေအတွင်းမှာ စကခ ၁၀ လက်အောက်ခံ ခမရ ၃၆၁ နဲ့ ခမရ ၃၆၃ တပ်ရင်းတွေက တပ်သား ၁၆ ယောက်၊ ပဲခူးတိုင်း ပန်းတောင်းမြို့နယ် ညောင်ကျိုးကျေးရွာအနီးက တိုက်ပွဲတွေမှာ အလံဖြူထောင်၊ တပ်ပြေး၊ လက်ရဖမ်းဆီးရမိသူ ၁၀ ယောက် ရှိခဲ့ပါတယ်။
နိုဝင်ဘာ ၉ ရက်မှာလည်း ပဲခူးတိုင်း၊ ပန်းတောင်းမြိုနယ် ကပစ ၁၆ အနီး ရင်ဆိုင်တိုက်ပွဲတွေအတွင်း ခမရ ၃၆၃ တပ်ရင်းက စကစ တပ်ဖွဲ့ဝင် ၄ ယောက်ကို လက်ရ ဖမ်းဆီးရမိခဲ့သလို နတ်ရေကန်ဗျူဟာကုန်း တိုက်ပွဲမှာလည်း ဒု-တပ်ကြပ် မျိုးမင်းထွန်း ဆိုသူ AA ထံ အလင်းဝင်ရောက်ခဲ့ပါတယ်။
အောက်တိုဘာ ၃ ရက်ကနေ နိုဝင်ဘာ ၇ ရက်အတွင်း ဧရာဝတီတိုင်း၊ သာပေါင်းမြို့နယ်နဲ့ လေးမျက်နှာမြို့နယ်တို့မှာ ဖြစ်ပွားတဲ့ တိုက်ပွဲတွေအတွင်း စစ်ကောင်စီတပ်က ထွက်ပြေးလာပြီး အာရက္ခတပ်တော်ထံ ဖမ်းဆီးခံရသူ ၂၀ ကျော်နဲ့ လက်နက်ချ အလင်းဝင်ရောက်သူ ၂၀ ကျော်အထိ ရှိခဲ့တယ်လို့ ထုတ်ပြန်ချက်ထဲမှာ ပါရှိပါတယ်။
အလင်းဝင်ရောက်လာသူတွေနဲ့ ဖမ်းဆီးရမိတဲ့ စစ်ကောင်စီ တပ်ဖွဲ့ဝင်တွေ အားလုံးနီးပါးဟာ ၂၀၂၅ ခုနှစ်အတွင်း စစ်ကောင်စီရဲ့ အတင်းအဓမ္မ စစ်မှုထမ်း ပေါ်တာဆွဲခံရတဲ့ စစ်သင်တန်းဆင်းတွေ ဖြစ်ကြပြီး တချို့မှာ ၁၈ နှစ် မပြည့်သေးသူတွေနဲ့ အထက်တန်း တက်နေကြတဲ့ ကျောင်းသားတွေ ဖြစ်တယ်လို့ သိရပါတယ်။
အာရက္ခတပ်တော် (AA) အနေနဲ့လည်း လက်နက်ချ အလင်းဝင်ရောက်လာသူတွေကို စစ်သုံ့ပန်းဥပဒေနဲ့အညီ ကောင်းမွန်စွာ ပြုစုစောင့်ရှောက်ပေးထားသလို AA နဲ့ ရင်ဆိုင်တိုက်နေရတဲ့ ဘယ်နေရာ၊ ဘယ်စစ်မျက်နှာပြင်မှာမဆို AA တပ်ဖွဲ့ဝင်တွေဆီ နီးစပ်ရာကတဆင့် ဆက်သွယ်ပြီး အလင်းဝင်ရောက်နိုင်တယ်လို့ ကမ်းလှမ်းထားပါတယ်။
