နေပြည်တော်ကောင်စီနယ်မြေ၊ ပျဥ်းမနားမြို့၊ ချင်းစုရပ်ကွက်၊ ဗိုလ်တောက်ထိန်လမ်းမပေါ်က ရောင်နီဦးရွှေဆိုင် နိုဝင်ဘာ ၁၀ ရက် မနက်က ဓားပြတိုက်ခံရပြီး ဓားပြတိုက်သူထဲက ၂ ယောက်ကို ရပ်ကွက်နေသူတွေက ဖမ်းမိခဲ့တယ်လို့ မြို့ခံတွေဆီက သိရပါတယ်။
မနေ့မနက် ၉ နာရီခွဲက ရောင်နီဦးရွှေဆိုင်မှာ ဆိုင်ရှင်အမျိုးသမီးတယောက်တည်း ရှိနေချိန် Mask တပ်ထားသူ ၃ ယောက် ဆိုင်ကယ်နဲ့ရောက်လာပြီး ဆိုင်ရှင်အမျိုးသမီးကို သေနတ်နဲ့ချိန်ကာ ရွှေထည်ပစ္စည်းတချို့ လုယူသွားတာလို့ မြို့ခံတယောက်က ပြောပါတယ်။
“ဆိုင်ဖွင့်ချိန် လူ ၃ ယောက် ဆိုင်ကယ်နဲ့ရောက်လာပြီး ဆိုင်ရှင်ကို သေနတ်နဲ့ချိန်ပြီး ဝင်လုတာပါ။ ရွှေ ဘယ်လောက်ပါသွားလဲတော့ မသိဘူး။ လုတဲ့သူ ၃ ယောက်ထဲက ၂ ယောက်ကို ကျော်ညီနောင်ဘက်မှာ ရပ်ကွက်နေ ပြည်သူတွေက ဖမ်းမိသွားတယ်။”
ဓားပြတိုက် လုယက်ခံရပြီးနောက် ဆိုင်ရှင်အမျိုးသမီးက အော်ဟစ် အကူအညီတောင်းတဲ့အတွက် ရပ်ကွက်နေသူတွေက လိုက်လံဖမ်းဆီးရာ ကျော်ညီနောင်ရပ်ကွက်မှာ အမျိုးသားတယောက်နဲ့ အမျိုးသမီးတယောက်ကို ဖမ်းမိခဲ့တယ်လို့ အုပ်ချုပ်ရေးနဲ့ နီးစပ်သူတယောက်က ပြောပါတယ်။
“ဆိုင်ရှင်အမျိုးသမီး အော်တော့ ရပ်ကွက်ထဲကလူတွေ အကုန်ဝိုင်းလိုက်တာ၊ ကျော်ညီနောင် ရှေ့လမ်းမှာ ၂ ယောက်မိသွားတယ်။ သေနတ်တော့ပါတယ်၊ အတုကြီးဆိုတော့ ပစ်လို့မရဘူး။ အဲဒါကြောင့် ဖမ်းမိတာ။ ရပ်ကွက်ကမိမှ ရဲတွေရော စစ်တပ်ရော ရောက်လာတာ။”
လတ်တလောမှာ ဖမ်းဆီးရမိသူ ၂ ယောက်ကို ပျဥ်းမနားမြို့မရဲစခန်းက စစ်ဆေးနေတယ်လို့ သူက ရှင်းပြပါတယ်။
နေပြည်တော်ကောင်စီနယ်မြေကို စစ်တပ်က အုပ်ချုပ်နေတယ်ဆိုပေမဲ့ ပျဥ်းမနားမြို့၊ ဥတ္တရသီရိ၊ ပုဗ္ဗသီရိနဲ့ ဇေယျာသီရိမြို့နယ်တွေမှာ အမြဲတစေ ခိုးမှုနဲ့ လုယက်သတ်ဖြတ်မှုတွေနဲ့ ကြုံနေရတာ ဖြစ်ပါတယ်။
