စစ်ကိုင်းတိုင်း ဒီပဲယင်းမြို့နယ်ထဲက ဆပ်ပြာကျင်းရွာကို ဒီနေ့ နိုဝင်ဘာ ၁၀ ရက်မှာ ပေါင် ၅၀၀ ဗုံးတွေ အပါအဝင် ၅ ကြိမ် ဗုံးကြဲတိုက်ခိုက်တာကြောင့် အရပ်သား ၁၅ ဦးထက်မနည်း ဒဏ်ရာရတယ်လို့ ဒီပဲယင်းမြို့ နယ် ပြည်သူ့အုပ်ချုပ်ရေးအဖွဲ့ဆီက သိရပါတယ်။
ဒီပဲယင်းမြို့နယ် ပြည်သူ့အုပ်ချုပ်ရေးအဖွဲ့ တာဝန်ရှိသူတယောက်က “သေဆုံးသူတော့ မရှိသေးဘူး။ ပြင်းထန်စိုးရိမ်ရတော့ ရှိပါတယ်။ ကျား၊ မ ခွဲတာတွေ အရေအတွက်တွေ မပြောနိုင်သေးပါဘူး” လို့ DVB ကို ပြောပါတယ်။
ပထမအကြိမ် လေကြောင်းတိုက်ခိုက်မှုတွေကြောင့် နေအိမ် ၆ လုံးပျက်စီးပြီး အရပ်သား ၁၅ ယောက်ဝန်းကျင် ဒဏ်ရာရသလို ညနေ ၆ နာရီဝန်းကျင်မှာ လေကြောင်းကနေ ထပ်ပြီးဗုံးကြဲတာကြောင့် နေအိမ်တွေ မီးလောင်နေတာလို့ ဆိုပါတယ်။
ဒေသခံတယောက်က “ညနေပိုင်း လေယာဥ်က ထပ်လာသေးတယ်။ အဲဒီအချိန် ဒဏ်ရာရသူတွေကို ဆေးခန်းတွေ ပို့နေကြတာ။ အတိအကျတော့ မသိရသေးဘူး။ ထိတဲ့သူတော့များတယ်။ ပေါင် ၅၀၀ လေးလုံးချတာ၊ မီးတွေလည်း လောင်ပါတယ်။ အသေအပျောက်နည်းပါစေ ဆုတောင်းရမှာပါ” လို့ပြောပါတယ်။
ညနေ ၆ နာရီ ၅ ကြိမ်မြောက် တိုက်ခိုက်မှုမှာ ပေါင် ၅၀၀ ဗုံး လေးလုံး ဆက်တိုက်ကြဲချသွားတာဖြစ်ပြီး နေအိမ်အချို့ မီးလောင်နေတယ်လို့ ဒီပဲယင်းမြို့နယ် ပြည်သူ့အုပ်ချုပ်ရေးအဖွဲ့က ထုတ်ပြန်ထားပါတယ်။
