အာဏာသိမ်းစစ်တပ်က ရွေးကောက်ပွဲအတွက် ဝါဒဖြန့်ဖို့ လှုံ့ဆော်ရေး စာသားတွေကို ပြည်တွင်းမှာရှိတဲ့ နာမည်ကြီး အနုပညာရှင်တွေနဲ့ ဒါရိုက်တာ ဝိုင်း၊ ဒါရိုက်တာ ဝင်းလွင်ထက်၊ ဒါရိုက်တာ ဩရသ နဲ့ မီးပွားတို့က ရိုက်ကူးပေးနေရတယ်လို့ ရုပ်ရှင်လောက အသိုက်အဝန်းဆီက သိရပါတယ်။
စစ်တပ်က ရွေးကောက်ပွဲဝါဒဖြန့်ဖို့ အနုပညာရှင် တော်တော်များများကို အဓမ္မ ဖိအားပေး ရိုက်ခိုင်းနေပြီး၊ ရုပ်ရှင်လောကက နာမည်ကြီး သရုပ်ဆောင်တွေ အပါအဝင်၊ ဇာတ်ပို့တွေ၊ အလှမယ်တွေ၊ အဆိုတော်တွေ အားလုံးနီးပါး ရိုက်ကူးပြီးသွားပြီလို့ ရုပ်ရှင်လောကနဲ့ နီးစပ်သူဆီက သိရပါတယ်။
လက်ရှိအချိန်ထိ ရိုက်ကူးပြီးတဲ့ အနုပညာရှင်တွေကတော့ ထွန်းအိန္ဒြာဗို၊ ခိုင်သင်းကြည်၊ အေးမြတ်သူ၊ ဝတ်မှုန်ရွေရည်၊ ဖွေးဖွေး၊ ဟိန်းဝေယံ၊ စိုးပြည့်သဇင်၊ ခင်လှိုင်၊ အောင်ရဲလင်း၊ အလင်းရောင်၊ တိုင်ရွန် ထူးအောင်၊ ညီနန္ဒ၊ ခင့်ဝင့်ဝါ၊ အလှမယ် သဲစုငြိမ်း၊ ရွှေမှုန်ရတီ၊ ရွှေထူး ၊ကျော်ထက်အောင် စတဲ့ အနုပညာရှင်တွေ ဖြစ်တယ်လို့ ဆိုပါတယ်။
ရုပ်ရှင်လောကနဲ့ နီးစပ်သူက “ရုပ်ရှင်လောကက လူတွေ ကုန်သလောက်ပေါ့။ အများကြီးပဲ။ ရိုက်ကူးတဲ့ပုံစံက နောက်မှာ Backdrop ထောင်ပြီး သရုပ်ဆောင်တွေက Backdrop ရှေ့မှာ ရိုက်ကူးရေးလုပ်၊ ဘာတွေ လုပ်ရလဲဆိုတော့ ရွေးကောက်ပွဲ စာသားတွေ ရွတ်ရ၊ အဲဒီမှာ Backdrop က အဖြူရောင် အောက်ခံမှာ လိုဂိုတွေ စားသားတွေက အစိမ်းတွေချည်းပဲ။ ကြည့်လိုက်တာနဲ့ ထင်းခနဲဆို ကြံ့ဖွံ့ဆိုတာ တန်းမြင် တန်းသိအောင် လုပ်ထားတဲ့အတိုင်း။ တကယ့် အစိမ်းပဲ”လို့ ပြောပါတယ်။
ရွေးကောက်ပွဲ ဝါဒဖြန့်မှု ရိုက်ကူးရေးတွေမှာ မပါဝင်လို့ နိုဝင်ဘာ ၅ ရက်က ဖမ်းဆီးခံခဲ့ရတဲ့ နာမည်ကြီးသရုပ်ဆောင် ဖွေးဖွေးဟာ လက်ရှိမှာတော့ ပြန်လည်လွတ်မြောက်လာခဲ့ပြီလို့ သိရပါတယ်။
အဆိုတော်တွေနဲ့ သဘင်လောကက အနုပညာရှင်တွေကိုတော့ မြန်မာ့အသံက တာဝန်ယူ ရိုက်ကူးပေးနေတယ်လို့ သိရပြီး၊ အရင်က နိုင်ငံရေးနဲ့ အနုပညာရှင် မပက်သက်ဘူးဆိုပြီး နိုင်ငံရေးနဲ့ အဝေးဆုံးမှာ နေခဲ့တဲ့ အဆိုတော် ဝေလလည်း ရိုက်ကူးရေး လုပ်ပေးနေရပါတယ်။
နောက်ထပ် စစ်တပ် ဝါဒဖြန့် ရုပ်ရှင်ကားတွေလည်း ဒါရိုက်တာ တင်အောင်စိုး (ပန်းမြို့တော်)၊ ဒါရိုက်တာ ဝိုင်း၊ ဝင်းလွင်ထက် ၊ မီးပွား ၊ သြရသတို့က ရိုက်ကူးပေးရဖွယ်ရှိနေပါတယ်။
စစ်ကောင်စီရဲ့ ဝါဒဖြန့်ရုပ်သံတွေမှာ မပါဝင်လိုဘဲ အဓမ္မ အကျပ်ကိုင် ခိုင်းစေလို့ ပါဝင်ခဲ့ရတဲ့ အနုပညာရှင်တွေရှိသလို မိမိဆန္ဒအလျောက် စစ်တပ်ကို ထောက်ခံပြီး ပါဝင်ဆောင်ရွက်နေကြတဲ့ အနုပညာရှင်တွေလည်းရှိပါတယ်။
တဖက်မှာလည်း စစ်တပ်ရဲ့ ရွေးကောက်ပွဲဝါဒဖြန့်ရုပ်သံတွေမှာ ပါဝင်သရုပ်ဆောင်ထားကြတဲ့ သရုပ်ဆောင်တွေ အကုန်လုံးကို လူမှုရေးပြစ်ဒဏ်ခတ်ဖို့ တောင်းဆို လှုပ်ရှားမှုတွေလည်း ရှိနေပါတယ်။
