အာဏာသိမ်း စစ်အုပ်က ပြုလုပ်မယ့် ရွေးကောက်ပွဲ ရလဒ်တွေကို ပြတ်ပြတ်သားသား ငြင်းပယ်ပေးဖို့ အာဆီယံ၊ ကုလသမဂ္ဂနဲ့ နိုင်ငံတကာအသိုက်အဝန်းကို ပြည်ထောင်စု လွှတ်တော်ကိုယ်စားပြုကော်မတီ (CRPH) က ဒီကနေ့ နိုဝင်ဘာ ၈ ရက်မှာ ထပ်မံ တောင်းဆိုလိုက်ပါတယ်။

ဒီနေ့မှာ ကျရောက်တဲ့ ၂၀၂၀ ပြည့်နှစ်၊ ပါတီစုံဒီမိုကရေစီအထွေထွေရွေးကောက်ပွဲ ၅ နှစ်ပြည့် အထိမ်းအမှတ် ထုတ်ပြန်ချက်မှာ CRPH က အခုလို ထည့်သွင်းတောင်းဆိုခဲ့တာလည်း ဖြစ်ပါတယ်။

လွတ်လပ်ပြီး တရားမျှတတဲ့ ဒီမိုကရေစီနည်းကျပြုလုပ်တဲ့ ရွေးကောက်ပွဲကတဆင့် လွှတ်တော်တရပ် မပေါ်ပေါက်မချင်း တရားဝင်ဆဲဖြစ်တဲ့ ၂၀၂၀ ရွေးကောက်ပွဲရလဒ်ကို ကိုင်စွဲကာ ဖက်ဒရယ်ဒီမိုကရေစီ နိုင်ငံတော်သစ်တည်ဆောက်ရေးအတွက် တော်လှန်ရေးအင်အားစုတွေ အားလုံးနဲ့ လက်တွဲပြီး ဆက်လက် ကြိုးပမ်းသွားမယ်လို့လည်း CRPH က ကတိပြုကြောင်း ဆိုပါတယ်။

စစ်အုပ်စုရဲ့ ရွေးကောက်ပွဲဟာ မြန်မာနိုင်ငံရဲ့ ငြိမ်းချမ်းရေးကို ဦးတည်မှာ မဟုတ်ဘဲ စစ်ဗိုလ်ချုပ်တွေရဲ့ အာဏာကို ဆက်လက်ဆုပ်ကိုင်နိုင်ဖို့ ကြိုတင်ကြံစည်ထားတဲ့ တရားမဝင် ရွေးကောက်ပွဲသာ ဖြစ်တယ်လို့လည်း ထုတ်ပြန်ချက်မှာ ဖော်ပြထားပါတယ်။

စစ်အုပ်စုဟာ နိုင်ငံရဲ့ နယ်မြေ ၃ ပုံ ၁ ပုံခန့်ကိုသာ ထိန်းချုပ်ထားနိုင်ပြီး၊ စစ်ရာဇဝတ်မှုများစွာနဲ့ ဥပဒေနဲ့ လုပ်ရပ်တွေကို ကျူးလွန်နေသလို အဓိကနိုင်ငံရေး အင်အားစုတွေကို ဖယ်ကြဉ်ထားပြီး လွတ်လပ်စွာ ထုတ်ဖော်ပြောဆိုခွင့်ကို ပိတ်ပင်ထားတာကြောင့် သူတို့ပြုလုပ်မယ့် ရွေးကောက်ပွဲဟာ ပွင့်လင်းမြင်သာ လွတ်လပ်ပြီး တရားမျှတတဲ့ ရွေးကောက်ပွဲ ဖြစ်နိုင်မှာ မဟုတ်သလို ဟန်ပြ ဒီမိုကရေစီ ပြုပြင်ပြောင်းလဲရေးသာ ဖြစ်တယ်လို့လည်း CRPH က ဆိုပါတယ်။