ယူဂန်ဒါနိုင်ငံအရှေ့ပိုင်းရှိ ဘုကွိုနဲ့ ကွီးန်ခရိုင်တွေမှာ မြေပြိုမှုတွေဖြစ်ပွားခဲ့ပြီးနောက် မိသားစု တစုက လူ ၆ ယောက်အပါအဝင် အနည်းဆုံး ၉ ယောက် သေဆုံးခဲ့ကြောင်း အတည်ပြုခဲ့ပါတယ်။
ဗုဒ္ဓဟူးနေ့က စေဘေး ဒေသခွဲမှာ ညလုံးပေါက် မိုးသည်းထန်စွာ ရွာသွန်းခဲ့ပြီးနောက်မှာ ဘုကွို ခရိုင်၊ ချယ်ဆိုးဝါ ခရိုင်ခွဲ၊ ညာလစ်ပါးရိရှ် နယ်မြေမှာ ရွှံ့နွံတွေအကြား နစ်မြုပ်နေတဲ့ ကလေး ၃ ယောက် လည်း သေဆုံးသူတွေထဲ ပါဝင်ခဲ့ပါတယ်။
ပထမဆုံးဖြစ်ရပ်မှာ အောက်တိုဘာ ၃၁ ရက် မနက်ပိုင်းက ဘုကွို ခရိုင်မှာ ရွှံ့မြေပြိုမှုကြောင့် အိမ် တလုံး နစ်မြုပ်ခဲ့ရပြီး မိသားစု တစုမှ ကလေး ၃ ယောက် သေဆုံးခဲ့ရတာပါ။
သီးခြားဖြစ်ရပ် တခုမှာတော့ ဗုဒ္ဓဟူးနေ့ညက အိမ်နီးချင်း ကွီးန်ခရိုင်မှာ နောက်ထပ်မြေပြိုမှု တခု ဖြစ်ပွားခဲ့ပြီး လူ ၆ ယောက် သေဆုံးခဲ့ပါတယ်။
SIT တံတားဟာ ရွှံ့နွံတွေအောက်မှာ နစ်မြုပ်နေပြီး ရေကြီးရေလျှံမှုကြောင့် အပျက်အစီးတွေ မျောပါသွားပြီးနောက်မှာ မိုးသည်းထန်စွာရွာသွန်းမှုကြောင့် ကပ်ချောရ်ဝါး–ဆွမ် ကားလမ်း တလျှောက် သယ်ယူပို့ဆောင်ရေးလည်း အနှောင့်အယှက် ဖြစ်ခဲ့ရပါတယ်။
ရဲတပ်ဖွဲ့ဟာ ဒေသခံတွေနဲ့အတူ အလောင်းတွေကို ပြန်လည်ဆယ်ယူခဲ့ပြီး ရင်ခွဲစစ်ဆေးမှုအတွက် ဘုကွို ဆေးရုံ ရင်ခွဲရုံကို ပို့ဆောင်ခဲ့ပါတယ်။
မိုးအဆက်မပြတ်ရွာသွန်းမှုနဲ့ လမ်းအခြေအနေဆိုးရွားမှုတွေကြောင့် ဘုကွိုကို ဝင်ရောက်ဖို့ ခက်ခဲနေဆဲဖြစ်ပြီး တုံ့ပြန်ရေးလုပ်ငန်းတွေကို အဟန့်အတားဖြစ်စေခဲ့ပါတယ်။
ယူဂန်ဒါ ကြက်ခြေနီအသင်းမှ ကယ်ဆယ်ရေးအဖွဲ့တွေဟာ ကယ်ဆယ်ရေးနဲ့ ပြန်လည် ထူထောင်ရေးလုပ်ငန်းတွေမှာ ဒေသဆိုင်ရာ အာဏာပိုင်တွေနဲ့ ရပ်ရွာအဖွဲ့ဝင်တွေနဲ့အတူ လုပ်ဆောင် နေကြပါတယ်။
Source:Reuters
