မြန်မာနယ်စပ်ဘက်မှာ ကျားဖြန့်အဆောက်အအုံ ဖောက်ခွဲဖျက်ဆီးမှုကြောင့် ထိုင်းမြေပိုင်နက်ထဲကို ဗုံးစတွေကျရောက်လာလို့ ​အောက်တိုဘာ ၂၇ ရက်​မှာ မြဝတီ-မဲ​ဆောက် မြို့နယ်အဆင့်  ထိုင်းနယ်ခြားကော်မတီ (TBC) က မြဝတီမြို့ရှိ မြန်မာအာဏာပိုင်တွေကို ကန့်ကွက်စာ ပို့ထား​တယ်လို့ သိရပါတယ်။

ကရင်ပြည်နယ်၊ မြဝတီမြို့​တောင်ဘက် KK Park ဝင်းအတွင်းရှိ အွန်လိုင်းငွေလိမ် ကျားဖြန့်လုပ်ငန်း အ​ဆောက်အအုံတချို့ကို ကရင်နယ်ခြား​စောင့်တပ်နဲ့ စစ်​ကောင်စီတပ်က ဖောက်ခွဲ​ဖျက်ဆီးပြတာမှာ မြန်မာ-ထိုင်းနယ်စပ် ​သောင်ရင်းမြစ်နဲ့ ကိုက် ၅၀၀ သာ ဝေးတဲ့ ထိုင်းပြည်သူအိမ်​တွေရဲ့ နေအိမ်တွေကို ဗုံးဆန် ထိမှန်တာ​ကြောင့် ထိုင်းဘက်က ကန့်ကွက်စာပို့ခဲ့တာပါ။

ထိုင်းဘက်မှ ကန့်ကွက်စာကို မြန်မာဘက်က အ​လေးထားတဲ့အနေနဲ့ ကျားဖြန့် အ​ဆောက်အအုံတွေကို မိုင်းမ​ဖောက်ကွဲ​တော့ဘဲ မြေတူးစက်တဲ့ ဖျက်ဆီးဖို့ ပြင်ဆင်​နေ​တယ်လို့လည်း မြဝတီအာဏာပိုင်တွေနဲ့ နီးစပ်သူထံက သိရပါတယ်။ 

မြဝတီဘက်မှာ ကျားဖြန့်လုပ်ငန်းတွေကို အောက်တိုဘာ ၂၂ ရက်က စတင်ရှင်းလင်းနေတဲ့ သတင်းတွေကြောင့် တရုတ်နိုင်ငံသားအများစု အပါအဝင်  ၂၈ နိုင်ငံက လူပေါင်း  ၁၅၃၇ ယောက်  ထိုင်းနိုင်ငံဘက်ကို ထွက်​ပြေးလာကြပြီး နယ်ခြား ​သောင်ရင်းမြစ်ထဲ  ရေနစ်သေဆုံးသူတွေလည်း ရှိပါတယ်။