ထိုင်းနိုင်ငံ၊ တာ့ခ်ခရိုင် မဲ့​ထော်ဂိတ်မှာ  အောက်တိုဘာလ ၂၅ ရက်​က မြန်မာနိုင်ငံနယ်စပ်ဘက်ကနေ သယ်ဆောင်လာတဲ့ Starlink စက် အလုံး ၆၀ ကို ဖမ်းဆီးရမိခဲ့ကြောင်း ဒေသတွင်း သတင်းတွေမှာ ဖော်ပြပါတယ်။

အွန်လိုင်းငွေလိမ် ကျားဖြန့်ဂိုဏ်းတွေ မြန်မာဘက်ခြမ်းကနေ ထိုင်းဘက်ကို ရွှေ့ပြောင်းဖို့ ကြံစည်နေတာဖြစ်ပြီး Truck ကားနဲ့ မဲဆောက်နယ်စပ်ဘက်ကို  သယ်လာစဉ် စစ်ဆေးရေးဂိတ်မှာ ဖမ်းမိခဲ့တာပါ။ ကားမောင်းသမားနဲ့ ကားကိုတော့ မဲ့ထော်ရဲစခန်းမှာ ဖမ်းဆီး ထိန်းသိမ်း အရေးယူထားပါတယ်။

ထိုင်း-မြန်မာ နယ်စပ် ကရင်ပြည်နယ် မြဝတီမြို့နယ်၊ KK Park  ဝင်းထဲရှိ ကျားဖြန့်လုပ်ငန်းတချို့ကို  စစ်ကောင်စီတပ်က ပြီးခဲ့တဲ့သီတင်းပတ်မှာ ဝင်ရောက်စီးနင်းတဲ့ သတင်းကြောင့် ထောင်နဲ့ချီတဲ့ ကျားဖြန့် လုပ်သားတွေ ထိုင်းဘက်ကို ထွက်ပြေးနေကြတာဖြစ်ပါတယ်။ 

အောက်တိုဘာ ၂၅ ရက်က အွန်လိုင်းငွေလိမ်စင်တာတခုကို စစ်တပ်က ဒရုန်းနဲ့ ဗုံးကြဲတိုက်ခိုက်ခဲ့လို့ ထိုင်းနိုင်ငံအစပ်ဘက်ကိုလည်း ကျရောက်ပေါက်ကွဲခဲ့သေးတယ်လို့ သတင်းတွေမှာ ဖော်ပြပါတယ်။ 

ဖိုးစီ