မွန်ပြည်နယ်၊ ရေးမြို့နယ်၊ နှင်းစုံကျေးရွာမှာရှိတဲ့ စစ်ကောင်စီ၊ ပျူစောထီးနဲ့ DKBA တပ် ပူးပေါင်း စစ်ဆေးရေးဂိတ်ကို အောက်တိုဘာ ၂၇ ရက် မနက်က ဝင်ရောက်တိုက်ခိုက်ခဲ့တယ်လို့ တော်လှန်ရေး တပ်ဖွဲ့ဝင်တွေဆီက သိရပါတယ်။
နှင်းစုံကျေးရွာမှာ ဂိတ်ချ ဆက်ကြေးကောက်နေတဲ့ အဖွဲ့စုံထိုင်နေတဲ့ ဂိတ်ဖြစ်ပြီး ဝင်ရောက်တိုက်ခိုက်ခဲ့ရာမှာ ထိခိုက်သေဆုံးမှု ရှိခဲ့တယ်လို့ ရေးဘီလူးတပ်ဖွဲ့ တာဝန်ရှိသူက ပြောပါတယ်။
“စစ်ကောင်စီ၊ DKBA နဲ့ ပျူစောထီးခေါင်းဆောင် သိန်းတန် ဦးဆောင်တဲ့အဖွဲ့ ဂိတ်ချ စစ်ဆေးရေးလုပ် ဆက်ကြေးကောက်နေတာ။ လျှပ်တပြက် ဝင်တိုက်ခိုက်ခဲ့တာ အထိနာသွားတယ်။”
စစ်ဆေးရေးဂိတ် တိုက်ခိုက်ခံရပြီး လူနာတင်ကားတွေ ဆူညံနေကာ ထိခိုက်မှုတွေ ရှိနိုင်ပေမဲ့ စစ်ကောင်စီက ရမ်းသန်းပစ်ခတ်နေတာကြောင့် ထိခိုက်မှုတွေကို မသိရသေးဘူးလို့ ဆိုပါတယ်။
နှင်းစုံဂိတ်က စစ်သားတွေ၊ DKBA တပ်ဖွဲ့တွေနဲ့ ပြည်သူ့စစ်တွေက ခရီးသွားပြည်သူတွေကို ရှာဖွေစစ်ဆေးဖမ်းဆီးတာ၊ ငွေကြေးတောင်းယူတဲ့ နေရာတွေမှာ ရေးမြို့နယ်အတွင်း အဆိုးဆုံးပဲလို့ ဒေသခံတွေဆီက သိရပါတယ်။
