ရခိုင်ပြည်နယ်၊ ပုဏ္ဏားကျွန်းမြို့အခြေစိုက် ဖြူစင်ရင်ခွင်ဖောင်းဒေးရှင်းက ၁၄ နှစ်အရွယ် ပရဟိတ လူငယ်လေးတယောက် လူနာသွားသယ်စဥ်မှာ စစ်ကောင်စီတပ်က ဒရုန်းနဲ့ တိုက်ခိုက်တဲ့အတွက် အောက်တိုဘာ ၂၆ ရက်မှာ သေဆုံးခဲ့တယ်လို့ သိရပါတယ်။
သေဆုံးသွားသူမှာ ဖြူစင်ရင်ခွင်ဖောင်းဒေးရှင်းက အသက် ၁၄ နှစ်အရွယ် မောင်ဌေးအောင်ဟိန်း ဖြစ်ပြီး ကွန်းတောင်ကျေးရွာက လူနာတယောက်ကို အကူအညီပေးဖို့ သွားစဉ်မှာ စစ်ကောင်စီတပ်ရဲ့ ဒရုန်းနဲ့ ပစ်ခတ်တိုက်ခိုက်တာခံရပြီး သေဆုံးခဲ့တာလို့ သူရဲ့ အစ်ကိုဖြစ်သူက လူမှုကွန်ရက်စာမျက်နှာမှာ ရေးသားထားပါတယ်။
ပုဏ္ဏားကျွန်းမြို့က သူနဲ့ ပရဟိတ လုပ်ဖော် လူငယ်တယောက်က “ကွန်းတောင်ရွာ လူနာတယောက်က ဆေးရုံပို့ပေးဖို့ အကူအညီတောင်းခံလာလို့ သွားပြီးယူကြတာမှာ စစ်ကောင်စီက ဒရုန်းနဲ့တိုက်ခိုက်တာကို ခံကြရတာ။ ပရဟိတကို စိတ်အားထက်သန်စွာရှိတဲ့ လူတဦးကို ဆုံးရှုံးရတာဟာ ပြည်သူတွေအတွက် ကြီးမားတဲ့ဆုံးရှုံးမှု ဖြစ်ပါတယ်။ စစ်ကောင်စီက ပရဟိတ အသင်းတွေကို တိုက်ခိုက်တာကိုလည်း လုံးဝလက်ခံနိုင်စရာမရှိဘူး” လို့ပြောပါတယ်။
အခုသေဆုံးသွားတဲ့ မောင်ဌေးအောင်ဟိန်းဟာ သူအသက် ၁၁ နှစ်အရွယ်ကတည်းက ဖြူစင်ရင်ခွင်ဖောင်ဒေးရှင်မှာ ပရဟိတအလုပ်တွေကို လုပ်ကိုင်သူဖြစ်ပါတယ်။
မောင်ဌေးအောင်ဟိန် သေဆုံးမှုနဲ့ပတ်သတ်ပြီးတော့ ဖြူစင်ရင်ခွင်ဖောင်ဒေးရှင်းကလည်း “မင်းရဲ့ ပေးဆပ် အနစ်နာခံမှုကို ငါတို့ အမြဲတမ်းဂုဏ်ယူပြီး အမြဲတမ်းအမှတ်ရနေမယ်။ အေးချမ်းပြည့်စုံတဲ့ ရခိုင်ပြည်ဖြစ်တဲ့ခါ မင်း နောက်တခေါက်ပြန်လာပြီး လူဖြစ်ပါ” ဆိုပြီး ဖော်ပြထားပါတယ်။
ကွန်းတောင်ကျေးရွာဟာ စစ်တွေမြို့နယ်နဲ့ ပုဏ္ဏားကျွန်းမြို့နယ်မှာအစပ်မှာ တည်ရှိနေတာ ဖြစ်ပြီး စစ်ကောင်စီတပ်ရဲ့ တိုက်ခိုက်မှုတွေကို မကြာခဏ ခံနေရတဲ့ကျေးရွာလည်း ဖြစ်ပါတယ်။
