အာဏာသိမ်းစစ်တပ်က ကျင်းပမယ့် ရွေးကောက်ပွဲမှာ ဝင်ပြိုင်မယ့် တိုင်းရင်းသားစည်းလုံးညီညွတ်ရေးပါတီ လွှတ်တော်ကိုယ်စားလှယ်လောင်းကို ရိုက်နှက်ခဲ့တဲ့ ခင်ပွန်းဖြစ်သူကို တိုက်ကြီးမြို့နယ် ဥက္ကံနယ်မြေရဲစခန်းက ရွေးကောက်ပွဲဥပဒေနဲ့ အမှုဖွင့်ထားတယ်လို့ ဒေသခံတွေထံက သိရပါတယ်။

တိုက်ကြီးမြို့နယ်၊ အုန်းပင်စုကျေးရွာမှာ တစညပါတီ လွှတ်တော်ကိုယ်စားလှယ်လောင်း  ဒေါ်လေးလေးမြင့်ကို ခင်ပွန်းဖြစ်သူ ကိုကျော်လင်းထွန်းက ရိုက်နှက်ခဲ့ပြီး ရွေးကောက်ပွဲကနေ နုတ်ထွက်ခြင်း မပြုပါက သတ်ပစ်မယ်လို့ ခြိမ်းခြောက်လာတာကြောင့် ရဲတွေက ဖမ်းဆီးခဲ့တာ ဖြစ်ပါတယ်။

ဒေသခံတယောက်က “သူ့ယောကျ်ားကို အရပ်ထဲက ဂဏန်းလို့ခေါ်တယ်။ လက်စလက်နရှိတယ်။ သူ့မိန်းမကို ရွေးကောက်ပွဲမဝင်ဖို့ အကြိမ်ကြိမ်သတိပေးတယ်။ မရဘူး၊ နာမည်စာရင်းပါလာတော့ အိမ်မှာ ရိုက်နှက်တယ်။ ရွေးကောက်ပွဲကနေ ထွက်ဖို့ပြောတယ်။ မထွက်ရင် သတ်ပစ်မယ်ပြောလို့ မိန်းမက ရဲစခန်းတိုင်လိုက်တာ အဖမ်းခံရတယ်” လို့ ပြောပါတယ်။

အောက်တိုဘာ ၁၇ ရက်က ဇနီးဖြစ်သူရဲ့ တိုင်ကြားချက်ကြောင့် ကိုကျော်လင်းထွန်း (ခ) ဂဏန်းကို ဥက္ကံနယ်မြေရဲစခန်းက (ပ) အမှတ် ၄၉ /၂၀၂၅ / ရွေးကာဥပဒေပုဒ်မ ၂၄ /က နဲ့ အမှုဖွင့်ထားတယ်လို့ အုပ်ချုပ်ရေးနဲ့ နီးစပ်သူတယောက်က ပြောပါတယ်။

“ရွေးကောက်ပွဲနီးလာတာနဲ့အမျှ ဒီလိုပြဿနာတွေ ဖြစ်နေမှာပဲ။ တချို့ဆို မိဘက ရွေးကောက်ပွဲဝင်လို့ သားသမီးက အိမ်ပေါ်ကဆင်းသွားတာ၊ မိသားစုက စကားမပြောတာ၊ ဆွေမျိုးတွေက ပစ်ပယ်တာတွေ ရှိတယ်။ လူတိုင်း သူ့ခံစားချက်နဲ့သူ၊ တချို့ကလည်း အာဏာသိမ်းစစ်အုပ်စုက လုပ်တဲ့ ရွေးကောက်ပွဲမှာ ဝင်ပြိုင်တော့ ရှက်တာလည်းပါတာပေါ့။”

စစ်ကောင်စီက အောက်တိုဘာ ၃ ရက်အထိ ထုတ်ပြန်ချက်အရ ရွေးကောက်ပွဲဥပဒေနဲ့ အမှုဖွင့်ခံထားသူ  ၆၄ ယောက် ရှိပါတယ်။

ပထမဦးဆုံး ရွေးကောက်ပွဲဥပဒေပုဒ်မ ၃၂(က) နဲ့ အမှုဖွင့်ခံရတဲ့ တောင်ကြီးမြို့က ကိုနေသွေးကို စက်တင်ဘာ ၉ ရက်မှာ စစ်ကောင်စီက ထောင်ဒဏ် ၇ နှစ် ချမှတ်ခဲ့ပါတယ်။

အာဏာသိမ်းစစ်တပ်က လုပ်မယ့် ရွေးကောက်ပွဲဟာ တရားမဝင်တဲ့ အတုအယောင် ရွေးကောက်ပွဲဖြစ်တယ်လို့ အမျိုးသားညီညွတ်ရေးအစိုးရ (NUG) နဲ့ တော်လှန်ရေး အင်အားစုတွေက ထုတ်ပြန်ထားပါတယ်။