ရှမ်းပြည်နယ်မြောက်ပိုင်းက မိုင်းလုံမြို့နယ် မာန်စန်းကျေးရွာကို ဒီနေ့ အောက်တိုဘာ ၂၂ ရက် မနက်အစောပိုင်းမှာ စစ်ကောင်စီတပ် ဗုံးကြဲတာကြောင့် ကလေးတယောက်အပါအဝင် ၂ ယောက် ဒဏ်ရာရတယ်လို့ တအာင်းအမျိုးသားလွတ်မြောက်ရေးတပ်မတော် (TNLA) ဆီက သိရပါတယ်။
မနက်အစောပိုင်း ၁၂ နာရီ ၂၀ မိနစ်အချိန်မှာ တော့ဆန်အုပ်စု မာန်စန်းကျေးရွာကို ပေါင် ၂၅၀ ဗုံး ၂ လုံးကြဲချတာကြောင့် နေအိမ် ၄ လုံးပျက်စီးပြီး ၂ ယောက် ဒဏ်ရာရခဲ့တာလို့ ဆိုပါတယ်။
မိုင်းလုံမြို့နယ် TNLA အရာရှိတေယာက်က “မာန်စန်းရွာကို ဗုံး ၂ လုံးကြဲတာမှာ ကလေးတဦးနဲ့ အမျိုးသမီးတဦးဒဏ်ရာရတယ်” လို့ DVB ကို ပြောပါတယ်။
ဒဏ်ရာရသူတွေဟာ အသက် ၉ နှစ်အရွယ် မိုင်းရွှေစံနဲ့ အသက် ၃၅ နှစ်အရွယ် မလွေးထွေးဟန်တို့ ဖြစ်တယ်လို့လည်း သူကဆိုပါတယ်။
မနေ့ကလည်း မိုးကုတ်မြို့က ဖူဆယ်ဘောလုံးကွင်းကို စစ်ကောင်စီတပ်က ဗုံးကြဲချတာကြောင့် ကလေး ၃ ယောက် သေဆုံးပြီး ၁၂ ယောက် ဒဏ်ရာရတယ်လို့ TNLA က ဆိုပါတယ်။
စစ်ကောင်စီရဲ့ လေကြောင်းတိုက်ခိုက်မှုတွေကြောင့် အောက်တိုဘာ ၁ ရက်ကနေ ၂၂ ရက်အထိ ကလေး ၁၃ ယောက်အပါအဝင် သေဆုံးသူ ၄၁ ယောက်ရှိပြီး ၆၇ ယောက် ဒဏ်ရာရတယ်လို့ တအာင်းအမျိုးသမီးအဖွဲ့အစည်းက ထုတ်ပြန်ထားပါတယ်။
