တနင်္သာရီတိုင်း၊ ကော့သောင်းခရိုင်၊ ခမောက်ကြီးမြို့နယ်မှာ ရပ်ရွာအုပ်ချုပ်ရေး၊ ရာအိမ်မှူးနဲ့ ပျူစောထီးခေါင်းဆောင်တို့ကို ဖမ်းဆီးခဲ့ပြီးနောက် ပြန်လည်ခုခံလို့ဆိုပြီး ပစ်ခတ်ရှင်းလင်းခဲ့တယ်လို့ ကော့သောင်းခရိုင်ပြည်သူ့ကာကွယ်ရေးအဖွဲ့က အောက်တိုဘာ ၂၀ ရက်က ထုတ်ပြန်ထားပါတယ်။

အောက်တိုဘာ ၁၄ ရက် မနက် ၈ နာရီလောက်က  ခမောက်ကြီးမြို့နယ်၊ လုံးဖောကျေးရွာမှာ အုပ်ချုပ်ရေးမှူး ဦးဝင်းမြင့်၊ ပျူစောထီးခေါင်းဆောင် ဦးအေးစိုးနဲ့ အေးချမ်းသာကျေးရွာက ပျူစောထီး ဦးသက်ဦး တို့ကို ဖမ်းဆီးခဲ့ပြီးနောက် နေ့လယ် ၁၂ နာရီ လောက်မှာ ဖမ်းဆီးထားရာကနေ ထွက်ပြေးတာကြောင့် ၃ ယောက်စလုံးကို လိုက်လံ ပစ်ခတ်ရှင်းလင်းခဲ့တယ်လို့ ကော့သောင်းမြို့နယ်ပြည်သူ့ကာကွယ်ရေးအဖွဲ့ရဲ့ တာဝန်ခံ ကိုလပြည့်က ပြောပါတယ်။

“ဒီသုံးယောက်ကို ဖမ်းဆီးမိပြီးမှ ပြန်လည်ခုခံတယ်ဆိုလို့ ရဲဘော်တွေကနေ ပစ်ခတ် ရှင်းလင်းလိုက်ကြတာပါ။ သက်ဦး ဆိုတဲ့လူမှာ သေနတ်အတို ပါတယ်၊ ပစ်ပြီး ပြန်ထွက်ပြေးတာပေါ့၊ သူတို့ ၃ ဦးက တစုတည်းပါ။ ဖမ်းလာပြီး ထမင်းစားပြီးအေးဆေးဖြစ်မှ စစ်ဆေးမယ်လုပ်တဲ့အချိန်မှာ ကင်းစောင့်နေတဲ့ တယောက်ကို ပြန်ခုခံပြီး ထွက်ပြေးတော့ သေနတ်သံ ကြားတဲ့အချိန်မှာ လိုက်ဖမ်းပြီး ဝိုင်းပစ်တာပေါ့။ သူတို့က စစ်ကောင်စီနဲ့ပေါင်းပြီးတော့ မဲကိစ္စတွေ၊‌ ဘောလုံး၊ မူးယစ်ဆေးဝါး၊ ခဲကားတွေကို လုပ်တာပါ။ သူတို့အပြစ် သူတို့သိလို့ ပြန်ပြီးတုံ့ပြန်တာပေါ့။”

လုံးဖောကျေးရွာအုပ်ချုပ်ရေးမှူး ဦးဝင်းမြင့်ကို  ရွေးကောက်ပွဲမဲစာရင်းကိစ္စရပ်တွေ အပါအဝင် စစ်မှုထမ်း လူစုဆောင်းနေတာတွေ၊ ပေါ်တာကြေးကောက်ခံတဲ့ ကိစ္စတွေမှာ ပူးပေါင်းပါဝင် ဆောင်ရွက်ပေးခဲ့တာကြောင့် သွားရောက် ဖမ်းဆီးခဲ့တာလို့ တာဝန်ခံ ကိုလပြည့်က ပြောပါတယ်။

“သက်ဦးနဲ့ အေးစိုးက ရှမ်းကိုးရွာဒေသမှာ နာမည်ဆိုးနဲ့ နေကြတာပါ၊ အုပ်ကြီးက စစ်ဆေးမေးမြန်းပြီး ပြန်လွှတ်မယ့်အနေအထား ရှိတယ်။ သူတို့အပြစ်သူတိ့သိလို့ ပြန်ပြီးတုံ့ပြန်တာပေါ့။ အုပ်ကြီးကတော့ သတိပေးစရာပဲရှိပါတယ်။ သေစေလောက်တဲ့ အပြစ်တွေ ပေးစရာမရှိပါဘူး။”

သေဆုံးသူ ၃ ယောက်ထဲက ဦးသက်ဦးနဲ့ ဦးအေးစိုးတို့ ဟာ ပျူစောထီးတွေဖြစ်တယ်ဆိုတာ ဓာတ်ပုံ မှတ်တမ်းရ သိရပြီး ၃ ယောက်လုံးအား ပစ်ခတ်ရှင်းလင်းတဲ့ဖြစ်စဥ်အတိအကျကိုတော့ DVB ဘက်က သီးခြားအတည်ပြုနိုင်ခြင်း မရှိသေးပါဘူး။

သေဆုံးသူ ၃ ယောက်ဆီက စကားပြောစက် ၄ လုံး၊ ဖုန်း ၄ လုံး၊ ကိုးလုံးကျည်ခေါက်ချိုး အရှည် ၁ လက်နဲ့ ကျည် ၃ တောင့်၊ မက်(ဂ်)နန်းပစ္စတို ၁ လက်နဲ့ ကျည် ၅ တောင့်တို့အပါအဝင် ပြည်သူ့စိစစ်ရေးကတ်ပြားနဲ့ Hilux Vigo ကား၁စီးကိုပါ သိမ်းဆည်းခဲ့တယ်လို့ ထုတ်ပြန်ချက်မှာ ဖော်ပြထားပါတယ်။

စစ်ကောင်စီရဲ့ ရွေးကောက်ပွဲဖြစ်မြောက်အောင် မဲစာရင်းပေးသွင်းတာတွေအပါအဝင် စစ်မှုထမ်း စုဆောင်းပေးတာတွေ၊ ပေါ်တာကြေးကောက်ခံရာမှာ ပါဝင်ကူညီပေးတဲ့ ရပ်ရွာအုပ်ချုပ်ရေးအဖွဲ့ တွေကို လုပ်ထုံးလုပ်နည်းနဲ့တကွ အရေးယူသွားမယ်ဆိုပြီး ရပ်တန်းက ရပ်လိုက်ကြဖို့ကိုလည်း ကော့သောင်းခရိုင်ပြည်သူ့ကာကွယ်ရေးအဖွဲ့ကနေ အသိပေး ထုတ်ပြန်ထားပါတယ်။