ရန်ကုန်တိုင်း၊ လှိုင်သာယာမြို့နယ်၊ ၅ ရပ်ကွက်၊ ဗိုလ်ချုပ်လမ်းမပေါ်မှာ ဖွင့်ထားတဲ့ စတိုးဆိုင်ပိုင်ရှင်က ဆိုင်မှာ စတီးဇလုံဝင်ခိုးတယ်ဆိုပြီး အမျိုးသမီး တယောက်နဲ့ ကလေး တယောက်ကို ဖမ်းဆီးရိုက်နှက်ပြီး လူမှုကွန်ရက်ပေါ်မှာ တင်ခဲ့တဲ့အတွက် ဆိုင်ရှင်ကို အရေးယူပေးဖို့ ရပ်ကွက်နေသူတွေက ရဲစခန်းကို တိုင်ကြားထားတယ်လို့ မြို့ခံတွေဆီက သိရပါတယ်။
အောက်တိုဘာ ၂၀ ရက်က သူ့ဆိုင်မှာ စတီးဇလုံး အလုံး ၂၀ ဝင်ခိုးတယ်ဆိုပြီး စတိုးဆိုင်ပိုင်ရှင်က အမျိုးသမီးကြီးနဲ့ ကလေးကို ဖမ်းဆီး ရိုက်နှက်ကာ ဓာတ်တိုင်မှာ ကြိုးတုပ်ထားတာကို လူမှုကွန်ရက်မှာ တင်ခဲ့တာလို့ မြို့ခံတယောက်က ပြောပါတယ်။
“သူခိုးအားပေး မဟုတ်ဘူး။ ပစ္စည်းဝင်ခိုးတယ်၊ မိတယ်၊ ရဲစခန်းကို ပို့လေ။ ကိုယ်ထိလက်ရောက် ဘာလို့ နှိပ်စက်တာလဲ၊ လူမမည်ကလေးကို ကြိုးတုပ်ပြီး ရေနွေးပူနဲ့ လောင်းဖို့အထိ လုပ်တာ မကောင်းဘူး။ အခု ရပ်ကွက်နေသူတွေ စုပြီး အဲဒီမိန်းမကို အမှုဖွင့်ဖို့ စီစဥ်နေတယ်။”
ရိုက်နှက်ခံရတဲ့ အမျိုးသမီးဟာ ခင်ပွန်းဖြစ်သူ လေဖြတ်ပြီး သားသမီး ၃ ယောက်နဲ့ ရပ်တည် နေရကာ ကလေးကို ကြည့်ပေးမယ့် သူမရှိလို့ ကြံရာ မရတဲ့အဆုံး ဝင်ခိုးခဲ့တာလို့ ရေဥက္ကံ ကျေးရွာနေသူ တဦးက ပြောပါတယ်။
အဆိုပါဖြစ်စဥ်နဲ့ ပတ်သက်ပြီး လှိုင်သာယာအရှေ့ပိုင်းမြို့နယ် ရဲစခန်းက စတိုးဆိုင်ရှင် ဒေါ်ဝါဝါလှိုင်ကို စစ်ဆေးနေတယ်လို့ သိရပေမဲ့ အတည်ပြုလို့ မရဘူးလို့ ရပ်ကွက်အုပ်ချုပ်ရေးနဲ့ နီးစပ်တဲ့ သတင်းအရင်းအမြစ်က ပြောပါတယ်။
“ကိုယ့်အကောင့်ကို လူကြည့်များချင်တာရယ်၊ ဆယ်လီဖြစ်ချင်တဲ့ရောဂါကြောင့် အခုလိုဖြစ်တာ။ သူတို့မှာ ကျင့်ဝတ်ဆိုတာတွေ ဘာတွေ မသိဘူး၊ အခု ရဲစခန်းမှာ စစ်နေတယ်လို့ ကြားတယ်။ ရဲစခန်းက ခေါ်ပြီး မစစ်လို့ ရုန်းရင်းဆန်ခတ်ဖြစ်ရင် ရပ်ကွက်က တာဝန်ယူမှာ မဟုတ်ဘူး။”
အဆိုပါရုပ်သံကို စတိုးဆိုင်က ဆိုင်ဝန်ထမ်း တယောက်ကို ရိုက်ခိုင်းပြီး ဆိုင်ရှင်ဖြစ်သူက War War Hlaing Tiktok Account ကနေ အောက်တိုဘာ ၂၀ ရက်က တင်ခဲ့တာ ဖြစ်ပါတယ်။
