စစ်ကိုင်းတိုင်း အထက်ပိုင်း၊ ဗန်းမောက်မြို့နယ်ရဲ့ တမိုင်အကွာမှာရှိတဲ့ နားယကားရွာအနီးမှာ ရှမ်းနီအမျိုးသားများတပ်မတော် (SNA) ပူးပေါင်းတပ်တွေနဲ့ တော်လှန်ရေးတပ်ဖွဲ့တွေကြား တိုက်ပွဲတွေ ပြင်းထန်နေတယ်လို့ မြို့ခံတွေက ပြောပါတယ်။
ဗန်းမောက်မြို့သိမ်းတိုက်ပွဲ ဖြစ်ပြီးနောက်ပိုင်း အင်အားရာချီတဲ့ စစ်ကောင်စီတပ်နဲ့ SNA ပူးပေါင်းစစ်ကြောင်းဟာ ထိုးစစ်ဆင်လာတာကြောင့် ပြီးခဲ့တဲ့ ၁၄ ရက်က ဗန်းမောက်မြို့နယ်ရဲ့ ၃ မိုင်အကျော်က ကြောင်လည်ရွာအနီးမှာ တိုက်ပွဲတွေ ဆက်ဖြစ်နေပြီး မြို့အနီးထိ ရောက်လာတာလို့ ဆိုပါတယ်။
ဗန်းမောက်မြို့ကို ပြန်ရဖို့အတွက် စစ်ကောင်စီတပ်နဲ့ SNA ပူးပေါင်းတပ်ဟာ မြေပြင်ကနေ ထိုးစစ်ဆင်တာအပြင် လေကြောင်းကနေလည်း ဗုံးကြဲတိုက်ခိုက်ကာ ထိုးစစ်အရှိန် မြှင့်လာတယ်လို့ ကာကွယ်ရေးတပ်နဲ့ နီးစပ်သူတယောက်က ပြောပါတယ်။
“တိုက်ပွဲကတော့ နေ့စဉ်ဖြစ်နေတာ၊ မဖြစ်တဲ့နေ့ကို မရှိဘူး။ မြို့သိမ်းပြီးနောက်ပိုင်း SNA ရှိနေတဲ့ မြို့အနောက်ခြမ်းအထိ ထိုးစစ်ဆင်တိုက်လို့ တိုက်ပွဲဖြစ်တယ်။ အခုက ကိုယ့်ဘက်က ထိုးစစ်ပြန်အဆင်ခံရတဲ့ သဘောပေါ့။”
ပြီးခဲ့တဲ့ အောက်တိုဘာ ၆ ရက်ကလည်း စက်တောရွာနဲ့ ခမိုးရွာကို SNA ပူးပေါင်းတပ်က ပြန်လည် သိမ်းပိုက်ခဲ့ပြီးနောက် ထိုးစစ်ဟာ ဗန်းမောက်မြို့အနားကို ကပ်လာတယ်လို့ ဆိုပါတယ်။
ဗန်းမောက်မြို့ကို တော်လှန်ရေးတပ်ဖွဲ့တွေက ပြီးခဲ့တဲ့ စက်တင်ဘာ ၂၀ ရက်က သိမ်းပိုက်ခဲ့ပြီးနောက် မြို့နယ်ဆေးရုံ၊ ရဲစခန်း၊ ထွေအုပ်ရုံး စတဲ့ ဌာနဆိုင်ရာတွေကို ထိန်းချုပ်ထားတာ ဖြစ်ပါတယ်။
ဒါ့အပြင် လတ်တလော တိုက်ပွဲအခြေအနေကြောင့် စက်တော၊ အလယ်ရွာ၊ နားယကာ၊ ကံရွာ၊ ပင်ဟင်းခါး၊ ကြောင်လည်၊ ခမိုး စတဲ့ ကျေးရွာပေါင်း ၂၀ နီးပါးက ဒေသခံ ၃,၀၀၀ ကျော်လည်း နေရပ်စွန့်ခွာ ထွက်ပြေးနေရပြီး စားနပ်ရိက္ခာတချို့လည်း လိုအပ်နေတယ်လို့ ဆိုပါတယ်။
