ကချင်ပြည်နယ် ဗန်းမော်မြို့သိမ်းတိုက်ပွဲ ၁၀ လကျော် ကြာမြင့်လာပြီး နှစ်ဖက် အပြန်အလှန် စစ်ကြောင်းထိုးနေတာကြောင့် တိုက်ပွဲဆက်လက်ပြင်းထန်နေတယ်လို့ KIA ရှေ့တန်းသတင်းရင်းမြစ်က ပြောပါတယ်။ 

“ဗန်းမော်မှာက KIA နဲ့ စစ်ကောင်စီက လယ်ဗယ်ပဲ ဖြစ်နေတာ။ စစ်ကောင်စီက တနေရာရရင် KIA ကလည်း တနေရာရတယ်။ စစ်တပ်က ဒီဘက်လာထိုးရင် ဒီဘက်ကို ရသွား။ KIA က ဟိုဘက်ထိုးရင် ဟိုဘက်ရသွား။ ဟိုကောင်တွေ ကျနော်တို့ ရတဲ့နေရာကို ပြန်လာထိုးရင် သူတို့ထိုးသွားတဲ့နေရာ ကျနော်တို့ ပြန်ရသွား။ အဲဒီလို ပတ်ချာလည်နေတာ။ အခုတလောတော့ ကန်ပတ်လမ်းနား အ.ထ.က ၁ နားတော့ တိုက်ပွဲတအားဖြစ်နေတယ်။ သူတို့ အဲဒီဘက်ကို တအားဖိပြီး ထိုးနေတာ။ သူတို့ ကန်ပတ်လည်း အ.ထ.က ၁ ဘက်၊ အ.မ.က ၄ ဘက် ထိုးလာပြီဆိုရင် လေယာဉ်ကွင်းဘက်မှာရှိတဲ့ သူက ပြန်ထိုး အဲလိုပဲ လုပ်နေရတာ။ သူတို့က ဒီဘက်ခြမ်းထိုးရင် ကျနော်တို့က ဟိုဘက်ခြမ်းထိုး။ သူတို့ ဟိုဘက်ခြမ်းထိုးရင် ဒီဘက်ခြမ်းထိုး။ အဲဒီလိုမျိုးပဲ စစ်ကစားနေရတာပေါ့။”

ဗန်းမော်မှာ စစ်တပ်နေရာသာမက၊ မြို့တွင်း၊ မြို့ပြင် နေရာအသီးသီးမှာ စစ်မျက်နှာပြင် အများအပြားနဲ့ တိုက်ပွဲဖြစ်ပွားနေတာလို့ ဆိုပါတယ်။ 

ကချင်လွတ်လပ်‌ရေးတပ်မတော် (KIA) ပူးပေါင်းတပ်တွေ နေရာယူထားတဲ့ဘက်ကို စစ်တပ်က စစ်ကြောင်း ၃ ကြောင်းခန့်နဲ့ စစ်မျက်နှာပြင်ဖွင့် ထိုးစစ်ဆင် တိုက်ခိုက်နေတဲ့အပြင် လေကြောင်းကနေလည်း နေ့တိုင်း လာရောက်ဗုံးကြဲ တိုက်ခိုက်နေတယ်လို့ KIA ရှေ့တန်းသတင်းရင်းမြစ်က ပြောပါတယ်။ 

“ဒီဘက်မှာက အိမ်တွေ ဘာမှ မကျန်တော့ဘူး။ အဲဒီကောင်တွေ မီးရှို့လို့ ကုန်ပြီ။ ဒရုန်းနဲ့ လာချလိုက်၊ ဂျက်ဖိုက်တာနဲ့ လာချထားလိုက်နဲ့ ဘာမှ မကျန်တော့ဘူး။”

ဗန်းမော်မှာ ပြီးခဲ့တဲ့ ဇူလိုင်နဲ့ ဩဂုတ်အတွင်း စစ်တပ် စစ်ရိက္ခာတင် စစ်သင်္ဘော အစီး ၂၀ ကျော် ဝင်ရောက်သွားပြီးနောက် ဩဂုတ်လထဲမှာပဲ စစ်တပ်က ထိုးစစ်ဆင်တိုက်ပွဲဖော်ဆောင်နေနေပါ။

၂၀၂၅ နှစ်ဆန်းပိုင်းအတွင်း KIA သိမ်းပိုက်လိုက်တဲ့ တင့်ကားတပ်အမှတ် ၅၀၁၄ နဲ့ ခလရ ၂၃၆ တပ်ရင်းနှစ်ခုအပါ နေရာတချို့ကို စက်တင်ဘာလအတွင်းမှာပဲ လက်လွှတ်လိုက်ရတာပါ။

စစ်ရေးအတွက် အရေးပါတဲ့ တပ်နေရာတချို့ကို KIA က လက်လွှတ်လိုက်ရပေမဲ့ စစ်ကြောင်းဝင်လာတဲ့ လမ်းကြောင်းနေရာတွေကို ပိတ်ဆို့ပြီး ခုခံတိုက်ခိုက်တဲ့ တိုက်ပွဲတွေ ဆက်ဖြစ်နေသလို ကာကင်းတပ်စခန်းတချို့ကို ပြန်လည်သိမ်းယူနိုင်ခဲ့ပါတယ်။

စက်တင်ဘာ ၂၉ နဲ့ ၃၀ ရက်နေ့တွေမှာ စစ်တပ်ရဲ့ စစ်လက်နက်တပ်စု စ.စ.န (၆၄၁) ကာကင်းစခန်းနဲ့ သုံးမိုင်ကျေးရွာမှာရှိတဲ့ ကာကင်းစခန်းတို့ကို KIA ပူးပေါင်းတပ်တွေက ပြန်လည်ထိုးစစ်ဆင် သိမ်းပိုက်နိုင်ခဲ့ပါတယ်။ 

ကချင်လွတ်လပ်ရေးတပ်မတော် (KIA) ပူးပေါင်းတပ်ရဲ့ ဗန်းမော်ထိုးစစ်ဟာ အောက်တိုဘာ ၄ ရက်နေ့က ၁၀ လပြည့်ခဲ့ပြီ ဖြစ်ပါတယ်။ 

ကချင်ပြည်နယ်ထဲမှာ ဗန်းမော်တိုက်ပွဲအပြင် စစ်တပ်က လက်လွှတ်လိုက်ရတဲ့ နေရာတွေ ပြန်လည်ရယူဖို့ ခေါင်လန်ဖူး–လန်ဆယ်ဒေသနဲ့ ကျောက်စိမ်းထွက်ရှိတဲ့ ဖားကန့်ဒေသတွေမှာလည်း တိုက်ပွဲဖော်ဆောင်နေပါတယ်။ 

ဟန်န