စပိန်နိုင်ငံ မက်ဒရစ်မြို့တော်မှာ နှစ်စဉ်ကျင်းပလေ့ရှိတဲ့ စားကျက်ပြောင်းရွှေ့မှုအထိမ်းအမှတ်  ရိုးရာ ပွဲတော်ကြောင့် အောက်တိုဘာ ၁၉ ရက်က မြို့ရဲ့ လမ်းတွေပေါ်မှာ ထောင်နဲ့ချီတဲ့ သိုးတွေ ပြည့်နှက်နေပါတယ်။

ရိုးရာဝတ်စုံဝတ်ထားတဲ့ သိုးထိန်းတွေ ဦးဆောင်တဲ့ သိုးတွေဟာ မြောက်ဘက် စားကျက်တွေကနေ တောင်ပိုင်း စားကျက်မြေတွေဆီကို တိရစ္ဆာန်တွေကို ရွှေ့ပြောင်းဖို့ တချိန်က သုံးခဲ့တဲ့ ရှေးဟောင်း ထိန်းကျောင်းလမ်းကြောင်းတွေကို ပြန်အမှတ်ရဖို့ မြို့တော်ရဲ့ သမိုင်းဝင်နေရာကို ဖြတ်သန်းချီတက်ခဲ့ကြပါတယ်။ 

ဒီပွဲတော်ကို ၁၉၉၄ ခုနှစ်မှာ စပြီး စပိန်ရဲ့ ရာစုနှစ်များစွာ သက်တမ်းရှိတဲ့ စားကျက်ပြောင်းတဲ့ ဓလေ့ကို ဂုဏ်ပြုရင်း ဒေသခံတွေနဲ့ ခရီးသွားတွေကို ဆွဲဆောင်နိုင်ခဲ့ပါတယ်။

ဒါပေမဲ့ လျှာပြာရောဂါ ကူးစက်မှုအတွက် စိုးရိမ်ချက်ကြောင့် ပွဲတော်ကို တနှစ်ကြာ ရပ်နားထားရပြီးတဲ့နောက် ဒီနှစ်မှာ ပြန်ကျင်းပတာ ဖြစ်ပါတယ်။

စားမြုံ့ပြန်တတ်တဲ့သတ္တဝါတွေကို ထိခိုက်စေတဲ့ ရောဂါတမျိုးဖြစ်တဲ့ လျှာပြာရောဂါ ကူးစက်မှုကို ကြိုတင်ကာကွယ်တဲ့အနေနဲ့ မနှစ်က ပွဲတော်ကို ဒေသန္တရ အာဏာပိုင်တွေက ဖျက်သိမ်းခဲ့တာပါ။

ဧည့်ပရိသတ်များစွာအတွက်၊ မက်ဒရစ်မြို့တော်ရဲ့ လူစည်ကားတဲ့ လမ်းတွေပေါ်မှာ ကားတွေအစား သိုးတွေကို မြင်တွေ့ရတာဟာ ကျေးလက်ဒေသရဲ့ အံ့သြစရာ အခမ်းအနားတခုလည်း ဖြစ်ခဲ့ပါတယ်။

Source: Reuters