ရှမ်းပြည်နယ်တောင်ပိုင်း၊ တောင်ကြီးမြို့မှာ လူသေအလောင်း စွန့်ပစ်သွားသူလို့ သံသယရှိတဲ့ အမျိုးသားတယောက်ကို  အောက်တိုဘာ ၁၇ ရက်နေ့မှာ ရဲက ဖမ်းထားတယ်လို့ ဒေသခံတွေက ပြောပါတယ်။

အသက်အရွယ် ၃၀ ကျော်အရွယ် အမျိုးသားအလောင်းကို အောက်တိုဘာ ၁၆ ရက် ည ၁၁ နာရီကျော်လောက်မှာ မြို့မရပ်ကွက်၊ စဝ်စံထွန်းလမ်းထဲမှာ ကားတစီးက စွန့်ပစ်ခဲ့တာဖြစ်ပြီး အလောင်းမှာ ထိုးသွင်းဒဏ်ရာတွေ၊ မီးလောင်ဒဏ်ရာတွေ၊ ပြတ်ရှဒဏ်ရာတွေ တွေ့ရတယ်လို့ မြို့ခံတွေက ပြောပါတယ်။

Honda Fit အဖြူရောင်ကားကိုမောင်းနှင်သူ အမျိုးသားဟာ ဗိုလ်ချုပ်လမ်းပေါ်မှာ လူတယောက်ကိုတိုက်မိခဲ့ပြီး ကားနဲ့ တရွတ်တိုက်ပါလာခဲ့တာကြောင့် မြို့မရပ်ကွက်ထဲမှာ ပစ်ခဲ့တယ်လို့ ရဲစခန်းမှာ ထွက်ဆိုထားတယ်လို့ ဒေသခံတွေဆီက တဆင့်သိရပါတယ်။

ဒေသခံတယောက်က “ည ၁၁ နာရီပြန်လာချိန် Slow down လို့ ထင်ရတာကို မောင်းပြီး ဂလုန်း ဆိုကြားတယ်။ မြည်ပြီး သူဆက်မောင်းလာတဲ့အချိန် လူချိတ်ပါလာတယ်ဆိုပြီး ဖြုတ်ပြီး လွှင့်ခဲ့တယ်ဆိုပြီး ပြောတယ်။ ရဲတွေကတော့ မသင်္ကာဘူး။ သေသူမှာက ဓားခုတ်ဒဏ်ရာရော မီးလောင်ဒဏ်ရာရော ပါတာဆိုတော့။ ခုတော့ ဆက်မေးနေတယ်လို့ ကြားတယ်” လို့ ပြောပါတယ်။

ကားမောင်းလာသူဟာ ကားကို ကံကြီးရပ်ကွက်က အသိမိတ်ဆွေအိမ်မှာထားခဲ့တာကို CCTV မှတ်တမ်းတွေကနေ ကားနံပတ်နဲ့ လမ်းကြောင်းတွေစစ်ဆေးရင်း ဖမ်းဆီးရမိတယ်လို့ သိရပါတယ်။

CCTV မှတ်တမ်းအရ ကားကလူကိုကြိတ်မိပြီး ခြေထောက်တဖက်ထွက် တရွတ်တိုက်ပါသွားတာကို တွေ့ရပါတယ်။

ဒေသခံတယောက်က “ဒါက ကြိုတင်ကြံစည်ပြီး သတ်ဖြတ်ထားတဲ့ပုံစံပဲ။ ကြိုးတုပ်ထားတယ်။ မီးလောင်ဒဏ်ရာလည်းရှိတယ်။ ခုတ်ထစ်ထားသလို ဒဏ်ရာလည်းရှိတယ်။ ဒါပေမဲ့ သွေးလည်းထွက်မနေဘူးလို့ ကြားတာပဲ။ ပြီးတော့ဘောပါမရှိတော့ဘူးဆိုတော့ သေပြီးမှ သေချာစီစဉ်ပြီး လာပစ်ထားသလား မှတ်ရတယ်။ ပြီးတော့ ငါသာလူသတ်သမားဆိုရင် အဝေးကိုသွားပစ်မှာပေါ့။ ဘာလို့ကိုယ်နေတဲ့ရပ်ကွက်က လမ်းပေါ်ပစ်မလဲနော်” လို့ ပြောပါတယ်။

ယာဉ်မတော်ဆမှုလား ဒါမှမဟုတ် အလောင်းစွန့်ပစ်ထားတာလားဆိုတာတော့ မသိရသေးဘဲ ဖမ်းဆီးရမိသူကို ရဲစခန်းက ဆက်လက်စုံစမ်းနေတယ်လို့ သိရပါတယ်။