ရွေးကောက်ပွဲနီးလာတာနဲ့အမျှ အရာရှိ၊ စစ်သည်တွေသာမက မိသားစုဝင်တွေပါ လုံခြုံရေးအထူး ဂရုစိုက်ပြီး နေထိုင်ကြဖို့ အောက်တိုဘာ ၁၈ ရက်က ကိုကိုးကျွန်းတပ်နယ်မှာ စစ်ခေါင်းဆောင်က တိုက်တွန်းပြောပါတယ်။

ကိုကိုးကျွန်းဟာ နိုင်ငံအတွက် ပထဝီအနေအထားအရ အရေးပါတဲ့ နေရာဖြစ်သလို ရွေးကောက်ပွဲ ကျင်းပမယ့် မြို့နယ်လည်းဖြစ်လို့  အရာရှိ၊ စစ်သည်တွေနဲ့ တပ်မိသားစုဝင်တွေပါ လုံခြုံရေး အထူးဂရုစိုက်ပြီး နေထိုင်ကြဖို့  စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်က ပြောဆိုခဲ့တာ ဖြစ်ပါတယ်။

“မဖြစ်မနေ နိုင်ငံတော်ရဲ့အာဏာကို ရယူခဲ့ရပေမဲ့ ပြည်သူလူထု တောင့်တတဲ့ ရွေးကောက်ပွဲကို တပ်က ဦးဆောင်ပြုလုပ်ပေးသွားမှာဖြစ်ပြီး ဆန္ဒမဲပေးရာမှာလည်း နိုင်ငံ၏ အကျိုးကို အမှန်တကယ် သယ်ပိုးသူ ဒို့တာဝန်အရေးသုံးပါးကို လိုက်နာစောင့်ထိန်းလိုက်နာသူ၊ နိုင်ငံရေး၊ စီးပွားရေးအပြင် ကာကွယ်ရေးအမြင်ရှိသူကို ရွေးချယ်မဲပေးဖို့ လိုတယ်။” 

စစ်ခေါင်းဆောင်အနေနဲ့ စစ်တပ်ကနေ ရွေးကောက်ပွဲ ဝင်ရောက်ယှဥ်ပြိုင်မယ့် ဗိုလ်ချုပ်ကြီး၊ ဒုဗိုလ်ချုပ်ကြီးတွေနဲ့ မိသားစုဝင်တွေရဲ့ လုံခြုံရေးစိုးရိမ်နေပုံရှိပြီး တပ်ကလွှတ်လိုက်တဲ့ ကိုယ်စားလှယ်တွေ ရွေးချယ်မခံရမှာလည်း စိတ်ပူနေဟန်ရှိတယ်လို့ နိုင်ငံရေး လေ့လာသုံးသပ်သူ တယောက်က ပြောပါတယ်။

“အရင်က ဆန္ဒမဲပေးရင် ဒို့တာဝန်အရေး ၃ ပါးကို လေးစားလိုက်နာသူကို မဲပေးရမယ်ဆိုပြီး ပြောတယ်။ အခုနောက်ပိုင်း ကာကွယ်ရေးအမြင်ရှိသူ ဆိုပြီး ဖြစ်သွားတယ်။ အဲဒီစကားက ပြင်ဦးလွင်တပ်နယ်မှာ စပြောတာ။ ဘာလို့လဲဆိုတော့ ပြင်ဦးလွင်မှာ ဗိုလ်ချုပ်ကြီးမြထွန်းဦး ဝင်ပြိုင်မှာလေ။ တခြားပါတီတွေ နိုင်သွားမှာ စိုးရိမ်နေတယ်။ ကိုကိုးကျွန်းမှာက ဗိုလ်ချုပ်ကြီးညိုစော ဝင်ပြိုင်မှာ၊ တပ်က ကိုယ်စားလှယ်တွေပြိုင်မယ့် မြို့နယ်တွေမှာ တခြားပါတီတွေကို မနိုင်စေချင်တဲ့ သဘော။” 

ဒါ့အပြင် ကိုကိုးကျွန်းတပ်နယ်က အရာရှိ၊ စစ်သည်တွေကိုလည်း ရွေးကောက်ပွဲနဲ့ ပတ်သက်လို့ လုပ်စရာရှိတာတွေကို  ပြတ်ပြတ်သားသားလုပ်ဖို့ စစ်ခေါင်းဆောင်က အမိန့်ပေးခဲ့ပါတယ်။

ဒီဇင်ဘာ ၂၈ ရက် ကျင်းပမယ့်  ရွေးကောက်ပွဲကို ပါတီပေါင်း ၅၇ ပါတီက ကိုယ်စားလှယ်လောင်းပေါင်း  ၅, ၀၀၀ ကျော်ဝင်ပြိုင်သွားမှာဖြစ်ပြီး အဲဒီထဲမှာ ကြံ့ခိုင်ရေးပါတီက အများဆုံးဖြစ်ပါတယ်။

ဒီရွေးကောက်ပွဲမှာ ဝင်ပြိုင်ဖို့ စစ်တပ်က အရာရှိ ၄၀၀ ကျော်ကို အငြိမ်းစားပေးကာ ကြံ့ခိုင်ရေးပါတီကနေ  ဝင်ပြိုင်ခိုင်းတယ်လို့လည်း သတင်းတွေထွက်ပေါ်နေတာပါ။

အာဏာသိမ်းစစ်တပ်က လုပ်မယ့် ရွေးကောက်ပွဲဟာ တရားမဝင်တဲ့ အတုအယောင် ရွေးကောက်ပွဲ ဖြစ်တယ်လို့ အမျိုးသားညီညွတ်ရေးအစိုးရ (NUG) နဲ့ တော်လှန်ရေးအင်အားစုတွေက ထုတ်ပြန်ထားပါတယ်။