အမျိုးသားညီညွတ်ရေးအစိုးရအဖွဲ့ (NUG) အုပ်ချုပ်နေတဲ့ စစ်ကိုင်းတိုင်း၊ အင်းတော်မြို့နယ်မှာ အရပ်သားတယောက်ကို ဖမ်းဆီးထားချိန် အသက်သေဆုံးစေခဲ့တဲ့အတွက် ပြည်သူ့ကာကွယ်ရေးအဖွဲ့ (ပကဖ) ဒုတိယ တာဝန်ခံကို အရေးယူသွားမယ်လို့ NUG က ပြောပါတယ်။
မော်တိတ်ရွာက အသက် ၃၀ ကျော်အရွယ် ကိုဇော်ထွေးကို အောက်တိုဘာ ၁၁ ရက်နေ့မှာ ဆိုင်ကယ်ခိုးတယ်ဆိုတဲ့စွပ်စွဲချက်နဲ့ ပကဖ က လာရောက်ဖမ်းဆီးသွားပြီးနောက် နာရီပိုင်းအကြာမှာပဲ ကိုဇော်ထွေးရုပ်အလောင်းကိုလာယူဖို့ မိသားစုဝင်တွေဆီကို အကြောင်းကြားလာတာလို့ ဒေသခံတွေက ပြောပါတယ်။
ရုပ်အလောင်းမှာ အပြင်းအထန် နှိပ်စက်ခံထားရတဲ့ဒဏ်ရာ အညိုအမဲတွေကိုတွေ့ရသလို ဦးခေါင်းမှာလည်း ဒဏ်ရာအပြင်းအထန်ရထားတာတွေ့ရတယ်လို့ ဒေသခံတွေက ဆိုပါတယ်။
အရပ်သားသေဆုံးမှုအတွက် တာဝန်ရှိသူကိုဖမ်းဆီးထားပြီး ဥပဒေတိုင်း ဆက်အရေးယူသွားမယ် လို့ အမျိုးသားညီညွတ်ရေးအစိုးရအဖွဲ့ (NUG) ပြည်ထောင်စုဝန်ကြီးချုပ်ရုံး ပြောရေးဆိုခွင့်ရှိသူ ဦးနေဘုန်းလတ်က DVB ကို ပြောပါတယ်။
“တာဝန်ရှိသူ ပကဖ ဒုတာဝန်ခံကို ထိန်းသိမ်းထားပြီးဖြစ်။ ဥပဒေနဲ့အညီ ဆက်လက်ဆောင်ရွက်သွားပါမယ်။ တယောက်ယောက်က တစုံတရာ ကျူးလွန်တယ်ဆိုရင်လည်း အဲဒါက ဥပဒေနဲ့ အညီသွားလို့ပဲရမှာ။ ပကဖ အနေနဲ့ ဒီလို လုပ်ပိုင်ခွင့်မရှိဘူး”
NUG ထိန်းချုပ်စိုးမိုးထားတဲ့ မြို့၊ ရွာတွေမှာ အုပ်ချုပ်ရေးယန္တရားကို ပြည်သူ့ကာကွယ်ရေးအဖွဲ့ (ပကဖ)၊ ပြည်သူ့အုပ်ချုပ်ရေးအဖွဲ့ (ပအဖ) နဲ့ ပြည်သူ့လုံခြုံရေးအဖွဲ့ (ပလဖ) ဆိုတဲ့ ပသုံးလုံးအဖွဲ့က အဓိက ဆောင်ရွက်နေတာဖြစ်ပါတယ်။
အာဏာပါဝါအလွဲသုံးစားလုပ်တဲ့ ပသုံးလုံး အဖွဲ့ဝင်တွေကို ဖြစ်စဉ်အပေါ်မူတည်ပြီး အရေးယူဆောင်ရွက်တာတွေ ဆက်တိုက်လုပ်နေတယ်လို့လည်း ဦးနေဘုန်းလတ်က ပြောပါတယ်။
အင်းတော်မြို့ကို ပြီးခဲ့တဲ့ဧပြီလအစောပိုင်းမှာ တော်လှန်ရေးပူးပေါင်းတပ်တွေက တိုက်ခိုက်သိမ်းယူထားပြီး NUG ရဲ့ အုပ်ချုပ်ရေးယန္တရားကို ဖော်ဆောင်နေတာပါ။
ဒါ့အပြင် စစ်ကိုင်းတိုင်းထဲက ပင်လည်ဘူး၊ ခမ်းပတ်၊ ရွှေပြည်အေး၊ မြို့သစ်မြို့တို့ကိုလည်း NUG ပူးပေါင်းတပ်ဖွဲ့တွေက တိုက်ခိုက်သိမ်းယူထားပါတယ်။
