ပဲခူးတိုင်း၊ နတ်တလင်းမြို့နယ်မှာ စစ်ကောင်စီတပ်က အောက်တိုဘာ ၁၆ နေ့ကစပြီး စက်တပ်လေထီးတွေနဲ့ ၂ ရက်ဆက်တိုက် ဗုံးကြဲချခဲ့လို့ ပြည်သူ ၄ ယောက်ထက်မနည်း သေဆုံးခဲ့တယ်လို့ ဒေသခံတွေဆီကနေ သိရပါတယ်။

ဒေသခံတယောက်က “နတ်တလင်းမြို့နယ်ထဲက တောင်ညိုဆည်လို့ခေါ်တဲ့ အရပ်အခေါ် မကျီးပင်ဆည်ဝန်းကျင်မှာ စစ်တပ်ဘက်က စက်တပ်လေထီးတွေနဲ့ ၂ ရက်ဆက်တိုက်ဗုံးကြဲလို့ ဆရာတော် ၁ ပါး အပါအဝင် ထိခိုက်တဲ့သူတွေများတယ်။ သေဆုံးတာကတော့ ၄ ယောက်လောက်ရှိတယ်ဗျ” လို့ ပြောပါတယ်။

စစ်ကောင်စီတပ်ဟာ အဲဒီဆည်ဝန်းကျင်ကို တိုက်ပွဲဖြစ်တာမရှိဘဲ အောက်တိုဘာ ၁၆ ရက်နဲ့ ၁၇ ရက်နေ့မှာ လေထီးတွေအသုံးပြုပြီး ၂ ရက်ဆက်တိုက်ဗုံးကြဲတိုက်ခိုက်ခဲ့တာလို့ ဆိုပါတယ်။

သာယာဝတီခရိုင်၊ နတ်တလင်းမြို့နယ် ၃၈၀၁ တပ်ရင်း၊ တပ်ခွဲ ၄ တပ်ခွဲမှူး ကိုလက်ယျာ က “၁၇ ရက်နေ့ နေ့လယ်ပိုင်းလောက်မှာ မကျီးပင်ဆည်ဘောင်ပေါ်မှာရှိတဲ့ ရှင်းလင်းဆောင်ကို ၁ လုံး ကြဲပြီးတော့မှ အောင်သုခစက်လှေဆိပ်နဲ့ သင်္ဘောချည်တိုင် ဘုန်းကြီးကျောင်းကို ဗုံးတွေ ထပ်ကြဲတာဗျ။ ကျောင်းထိုင်ဆရာတော်ရယ် အဲဒီကျောင်းမှာ စစ်ဘေးရှောင်နေတဲ့ ပြည်သူတွေရယ် ၄၊ ၅ ယောက်လောက် ဒဏ်ရာရကြတယ်။ မကျီးပင်ဆည်မှာဗုံးတော့ အဲဒီဆည်နားက မကျီးပင်ရွာက ပြည်သူတွေလည်း ထွက်ပြေးကြရင်း ဗုံးထပ်ကြဲတာခံရလို့ အမေက အသက် ၅၀ ဝန်းကျင်၊ သမီးဖြစ်သူက အသက် ၂၀ ဝန်းကျင်ရှိကြတဲ့ သားအမိ ၂ ယောက် နေရာမှာတင်ဆုံးသွားကြတယ်။ အဲဒီနားက မယင်းရွာစာသင်ကျောင်းကိုလည်း ဗုံး ၂ လုံးထပ်ကြဲတော့ စစ်ရှောင်အမျိုးသား ၁ ယောက်ထပ်ဆုံးတယ်။ သူ့ရဲ့ အသက်အရွယ်ကိုတော့မသိရသေးလို့ စုံစမ်းနေပါတယ်။ စာသင်ဆောင်လည်း လုံးဝပျက်စီးသွားတယ်” လို့ DVB ကို ပြောပါတယ်။

စစ်ကောင်စီတပ်ဟာ အောက်တိုဘာ ၁၆ ရက်နေ့ကလည်း နတ်တလင်းမြို့နယ်ထဲက မကျီးပင်ဆည်နဲ့ ဘုရားတောင်ကျေးရွာကို စက်တပ်လေထီး ၃ စီးနဲ့ ဗုံးကြဲချခဲ့သေးလို့ အသက် ၇၀ အရွယ် အမျိုးသား ၁ ယောက်သေဆုံးပြီး အမျိုးသား ၁ ယောက်ကတော့ ခြေထောက်မှာ ဗုံးစထိမှန်ခဲ့တာကြောင့် ခြေထောက်ဖြတ်ရမယ့် အနေအထားရှိနေတယ်လို့လည်း သူက ဆက်​ပြောပါတယ်။

အောက်တိုဘာ ၁၇ ရက်နေ့မှာလည်း စက်တပ်လေထီးတွေနဲ့ နတ်တလင်းမြို့နယ်ထဲက ထန်းတောကျေးရွာနဲ့ ကြပ်ညိုကျေးရွာတို့ကို ဗုံးတွေထပ်ကြဲချသွားသေးတဲ့အတွက် ထိခိုက်ပျက်စီးတဲ့ မြေပြင်အခြေအနေကို ဆက်လက်စုံစမ်းနေတယ်လို့လည်း ဆိုပါတယ်။

နတ်တလင်းမြို့နယ်ထဲကပြည်သူတွေအနေနဲ့ စစ်တပ်ရဲ့ လေကြောင်းတိုက်ခိုက်​တာတွေကို ခံနိုင်မယ့် ဗုံးခိုကျင်းတွေ မဖြစ်မနေပြုလုပ်ထားကြဖို့နဲ့ လေယာဉ်သံကြားရင် အပြင်ထွက်ပြီး ပြေးလွှားတာတွေမပြုလုပ်ကြဖို့ တော်လှန်ရေးတပ်ဖွဲ့တွေဘက်က သတိပေးထားတယ်လို့ သိရပါတယ်။

ပြီးခဲ့တဲ့ စက်တင်ဘာ ၅ ရက်နေ့က မကျီးပင်ဆည်အနီး မကျီးပင်ဂိတ်မှာ အင်အား ၂၀ ကျော်နဲ့ တပ်စွဲနေတဲ့ စစ်ကောင်စီတပ်သားတွေ စခန်းစွန့်ခွာထွက်ပြေးသွားကြလို့ ကျန်ခဲ့တဲ့ ခဲယမ်းတွေနဲ့ ရိက္ခာပစ္စည်း​တွေကို တော်လှန်ရေးတပ်ဖွဲ့တွေဘက်က သိမ်းဆည်းရရှိခဲ့ကြပါသေးတယ်။