တနိုင်ငံလုံး အပစ်ခတ်တိုက်ခိုက်မှု ရပ်စဲရေး သဘောတူစာချုပ် (NCA) လက်မှတ်ရေးထိုးခြင်း ၁၀ နှစ်ပြည့် စကားဝိုင်း နောက်ဆုံးနေ့ ဆွေးနွေးပွဲကို နေပြည်တော်မှာရှိတဲ့ အပြည်ပြည်ဆိုင်ရာကွန်ဗင်းရှင်းဗဟိုဌာန-၁ မှာ ဒီနေ့ ဆက်လက်ကျင်းပနေပြီး သဘောတူညီချက်တွေကို ထုတ်ပြန်ဖို့ရှိတယ်လို့ အဲဒီဆွေးနွေးပွဲကို တက်ရောက်နေသူထံက သိရပါတယ်။

NCA ၁၀ နှစ်ပြည့် စကားဝိုင်းဒုတိယနေ့မှာ ရွေးကောက်ပွဲအလွန် နိုင်ငံတည်ဆောက်ရေးနဲ့ စီးပွားရေး ပြန်လည်ဖွံ့ဖြိုးတိုးတက်လာရေးဆိုတဲ့ ခေါင်းစဉ်တွေကို အဖွဲ့ ၂ ဖွဲ့ ခွဲဆွေးနွေးခဲ့ကြတာဖြစ်ပါတယ်။ 

ဒီကနေ့ နောက်ဆုံးနေ့မှာတော့ အဖွဲ့ ၂ ဖွဲ့စလုံးကို ပေါင်းပြီး ရရှိထားတဲ့အချက်တွေကို ပြန်ဆွေးနွေးကြမှာလို့ တိုင်းလိုင်ရှမ်းနီအမျိုးသားများ ဖွံ့ဖြိုးတိုးတက်ရေးပါတီဥက္ကဋ္ဌ စိုင်းဌေးအောင်က  ပြောပါတယ်။

အဲဒီဆွေးနွေးပွဲကို စစ်ဘက်က ကိုယ်စားလှယ်တွေ၊ NCA လက်မှတ်ရေးထိုးထားတဲ့ တိုင်းရင်းသားတော်လှန်ရေးအဖွဲ့ ၆ ဖွဲ့က ခေါင်းဆောင်တွေ၊ ရွေးကောက်ပွဲဝင်ပြိုင်ကြမယ့် နိုင်ငံရေးပါတီတွေက ခေါင်းဆောင်တွေနဲ့ အရပ်ဖက်အဖွဲ့အစည်းတွေအပြင် နိုင်ငံတကာကတတ်သိပညာရှင်တချို့လည်း ပါဝင်ဆွေးနွေးခဲ့တယ်လို့ ဆိုပါတယ်။ 

အာဏာသိမ်းစစ်ခေါင်းဆောင်ကတော့ NCA ၁၀ နှစ်ပြည့် အခမ်းအနား မိန့်ခွန်းမှာ အခြေခံဥပ‌ဒေပြင်ဆင်ဖို့အတွက် တချို့အချက်တွေကို သဘောတူညီပြီးဖြစ်လို့  တိုင်းရင်းသားတွေ အနေနဲ့ ဖြစ်နိုင်တာကိုပဲ တောင်းဆိုပြီး မဖြစ်နိုင်တာတွေကို မလုပ်ကြဖို့  ပြောဆိုခဲ့ပါတယ်။

အောင်သူ