မကွေးတိုင်း၊ ပခုက္ကူမြို့နယ်မှာ အောက်တိုဘာ ၁၅ ရက် နေ့လယ်ပိုင်းက စစ်ကောင်စီတပ်  ကြားဖြတ်တိုက်ခိုက်ခံရလို့ စစ်သား ၃ ယောက်နဲ့ ရဲတပ်ဖွဲ့ဝင် ၂ ယောက်တို့ သေဆုံးကာ လက်နက်ခဲယမ်းတွေ သိမ်းဆည်းရရှိခဲ့တယ်လို့ တော်လှန်ရေးတပ်ဖွဲ့တွေဆီကနေ သိရပါတယ်။

ဒေါင်းညီနောင် PKU ရဲ့ ပြန်ကြားရေးတာဝန်ခံက “ပခုက္ကူလေယာဥ်ကွင်းကနေ ရိက္ခာထုတ်ပြီး ပြန်လာကြတဲ့ ရန်သူ့အင်အား ၁၅ ယောက်ကို ကြိုတင်သတင်းရတဲ့အတွက် မြောက်လူးကန်ရွာနဲ့ ပခုက္ကူလေယာဥ်ကွင်းကြားကနေ စောင့်ပြီးတိုက်ခိုက်ခဲ့တာပါ။ ကျနော်တို့ ထုတ်ပြန်ထားတဲ့ ရုပ်သံမှတ်တမ်းထဲက အတိုင်း စစ်သား ၃ ယောက်နဲ့ ရဲတပ်ဖွဲ့ဝင် ၂ ယောက်တို့ နေရာမှာတင် သေတယ်။ ကျန်တဲ့ကောင်တွေကတော့ ထွက်ပြေးသွားကြတယ်” လို့ ပြောပါတယ်။

အဆိုပါတိုက်ခိုက်မှုအတွင်းကနေ စစ်ကောင်စီလက်အောက်ခံတပ်တွေထံက  UZI သေနတ် တလက်၊ MA1 သေနတ် တလက်၊ ကျည်ဘောက် ၅ ခု၊ ကျည် ၁၀၀ နီးပါး၊ စစ်အသုံးအဆောင် ၂ ထည်၊ ကျည်ကာဦးထုပ် ၂ လုံးနဲ့ ဖုန်း ၂ လုံးတို့ သိမ်းဆည်းရရှိခဲ့တယ်လို့လည်း ဆိုပါတယ်။

ဒေါင်းညီနောင် PKU ရဲ့ ဒုတာဝန်ခံ ကိုအေကြီးက “အခုကောင်တွေက ပခုက္ကူ အနောက်မြောက်ဘက်မှာရှိတဲ့ မြောက်လူးကန်ရွာမှာ အထိုင်ချနေကြတာ ၂ နှစ်ကျော်နေပြီ။ သူတို့ ရိက္ခာပြတ်တိုင်း ပခုက္ကူလေယာဥ်ကွင်းဆီသွားသယ်ကြတာ။ အဲ့ဒိနေ့က နေ့ခင်း ၁ နာရီခွဲလောက်မှာ သူတို့ရိက္ခာသယ်ပြီးပြန်လာတော့ လေယာဥ်ကွင်းနဲ့ မီတာ ၄၅၀ အကွာလောက်ကနေ စောင့်ပြီး တိုက်ခိုက်ခဲ့တာ ဖြစ်ပါတယ်။ တိုက်ပွဲထဲမှာနှစ်ဘက်ပစ်ခတ်မှုကတော့ ၁၅ မိနစ်လောက်ပဲ ကြာခဲ့ပြီး သူတို့ရဲ့ လက်နက်ခဲယမ်းတွေသိမ်းပြီး ပြန်ဆုတ်လာခဲ့ကြတာပါ။ လေယာဥ်ကွင်းမှာရှိတဲ့ သူတို့စစ်ကူတွေကတော့ လက်နက်ကြီးတွေနဲ့ဆက်တိုက်ပစ်ခတ်နေတာ ၄၅ မိနစ်လောက်ရှိခဲ့တယ်” လို့ ပြောပါတယ်။

တိုက်ပွဲအတွင်း တော်လှန်ရေးတပ်ဖွဲ့တွေဘက်က ရဲဘော် တယောက်ကတော့ လက်ပြင်နံရိုးကြား ကိုကျည်ဆန်ဖောက်ဝင်တဲ့ ဒဏ်ရာရရှိခဲ့ပေမဲ့ အသက်အန္တရာယ်မစိုးရိမ်ရဘူးလို့လည်း သူကဆက်ပြောပါတယ်။

တိုက်ပွဲအတွင်းသေဆုံးကြတဲ့ စစ်ကောင်စီလက်အောက်ခံတွေရဲ့ ရုပ်အလောင်းတွေကိုတော့ မြောက်လူးကန်ကျေးရွာမှာ အထိုင်ချနေကြတဲ့ စစ်ကောင်စီလက်အောက်ခံတွေထဲက အင်အား ၁၀၀ လောက်က လာရောက်ရှင်းလင်းသွားကြတယ်လို့လည်း ဆိုပါတယ်။

အဆိုပါ တိုက်ခိုက်မှုကိုတော့ ဒေါင်းညီနောင် PKU၊ Southern YSO တပ်ပေါင်းစု၊ Southern YSO PDF၊ ပြည်သူ့အားမာန် YSO၊ Yesagyo Revolution GROUP (YRG)၊ King cobra PKU နဲ့ ဒေါင်းစစ်သည်အဖွဲ့တို့ ပူးပေါင်းလုပ်ဆောင်ခဲ့ကြတလို့  သိရပါတယ်။