မန္တလေး-မိုးကုတ် လမ်းပိုင်းကို စစ်ကောင်စီတပ်က စစ်ကြောင်းထိုးနေတာကြောင့် မန္တလေး-မိုးကုတ် လမ်းပိုင်းကို ဖြတ်သန်းသွားလာခွင့် ယာယီပိတ်ပြီးနောက် မိုးကုတ်မြို့မှာ ဓာတ်ဆီတဂါလန်ကို ၃၆,၀၀၀ ကျပ်အထိ မြင့်တက်သွားခဲ့တယ်လို့ မြို့ခံတွေက ပြောပါတယ်။
လမ်းမပိတ်ခင်က ဓာတ်ဆီတလီတာ ကျပ် ၅,၀၀၀ ဝန်းကျင်နဲ့ တဂါလန်ကို ကျပ် ၂၅,၀၀၀ ဝန်းကျင်သာ ပေးရပြီး လမ်းပိတ်ပြီးနောက် ဈေးတက်သွားခဲ့တာလို့ မြို့ခံတယောက်က ပြောပါတယ်။
“လမ်းပိတ်ပြီးတော့ ဓာတ်ဆီဈေးတွေ တက်လာတယ်။ ပုံမှန်ထက် ၁၀,၀၀၀ ကျော်လောက် ပိုပေးဝယ်ရတယ်။ ဓာတ်ဆီတွေတော့ ဝယ်လို့ရနေသေးတယ်၊ ဈေးပဲတက်သွားတာ။”
မန္တလေး-မိုးကုတ် လမ်းပိုင်းကို စစ်ကောင်စီတပ်က စစ်ကြောင်းထိုးလာပြီး မြေပြင်မှာ နှစ်ဖက် ထိတွေ့တိုက်ပွဲတွေကြောင့် မိုးကုတ်-မန္တလေး လမ်းပိုင်းကို အောက်တိုဘာ ၁၁ ရက်ကစပြီး ယာယီ ဖြတ်သန်းခွင့် ပိတ်ထားတာ ဖြစ်ပါတယ်။
မိုးကုတ်မြို့မှာ ဓာတ်ဆီဈေးတွေ တက်လာတာကြောင့် ခရီးသည်တွေ ကားခဈေးနှုန်းတွေ တက်လာတဲ့အပြင် ဓာတ်ဆီအသုံးပြုပြီး လုပ်ကိုင်ရတဲ့ ကျောက်မျက်တွင်းတွေလည်း အခက်အခဲ ရှိလာနိုင်တယ်လို့ မြို့ခံတွေက ပြောပါတယ်။
