ထိုင်းနိုင်ငံမှာ အကြောင်းအမျိုးမျိုးနဲ့ ပြစ်ဒဏ်ကျခံရပြီးနောက် အချုပ်ထောင်ကနေ ပြန်လွတ်လာတဲ့ မြန်မာလုပ်သားတွေကို နေရပ်ပြန်ပို့တဲ့အခါ စစ်တပ်က အဓမ္မ စစ်သား စုဆောင်းနေပါတယ်။ 

ထိုင်းနိုင်ငံ၊ ရနောင်းမြို့က အချုပ်ထောင်မှာ အကြောင်းအမျိုးမျိုးနဲ့ ပြစ်ဒဏ်ကျခံရတဲ့ မြန်မာနိုင်ငံသား အယောက် ၉၀ ကို အောက်တိုဘာလ ၉ ရက်က မြန်မာဘက်အခြမ်း ကော့သောင်း လှေဆိပ်ကို လွှဲပြောင်းပို့ဆောင်ပေးခဲ့တယ်လို့ ရနောင်း လူဝင်မှုကြီးကြပ်ရေးရုံးက ထုတ်ပြန်ပါတယ်။

ပြစ်ဒဏ်ကျခံခဲ့ရတဲ့ မြန်မာအမျိုးသား ၈၁ ယောက်နဲ့ အမျိုးသမီး ၉ ယောက်ကို မြန်မာနိုင်ငံဘက်အခြမ်း ပို့ဆောင်ပြီးနောက် စစ်တပ်က အဓမ္မ စစ်သားစုဆောင်း ခေါ်ဆောင်သွားတယ်လို့ နီးစပ်သူတွေဆီက သိရပါတယ်။ အဓမ္မ စစ်သား စုဆောင်းခံရရင် ငွေကြေး တတ်နိုင်သူသာ ပြန်လွှတ်လေ့ရှိပြီး အများစုက စစ်သင်တန်းပေးခံရတယ်လို့ သိရပါတယ်။

နီးစပ်သူတယောက်က “တချို့တွေကျတော့ ရနောင်းဘက်ကို ပို့တယ်။ သတင်းတွေမှာ ရုပ်ပုံတွေ ကျနော်တို့ ပြန်လေ့လာတော့ ကျနော်တို့နဲ့ အတူတူနေခဲ့တဲ့ မြန်မာပြည်သားတွေ ပါတယ်။ အဲ့လို ပါလာတာရှိတယ်။ ဒါတွေက စစ်အုပ်စု လက်ထဲ ထည့်လိုက်တော့ စစ်အုပ်စုကပဲ အခု လက်ရှိ အနေအထားမှာ ထိုင်းကလည်း တအားဖမ်းနေတယ်ဆိုတော့ ကျနော် ထင်တာ စစ်အုပ်စု ဖိအားပေးပြီးတော့ ဖမ်းပြီးတော့ ပြန်ပြန်ပို့ခိုင်းနေတာလား။ စစ်အုပ်စုလက်ထဲ ပြန်ပြန်အပ်နေတာလားဆိုတာကို သံသယတော့ ဝင်နေတယ်။ ဒီလိုမျိုး ဖမ်းမိသူတွေကို စစ်အုပ်စုလက်ထဲ ပြန်အပ်တယ်ဆိုရင် အန္တရာယ်ရှိတယ်ဆိုတာကို ထိုင်းနိုင်ငံက အာဏာပိုင်တွေကို သိစေချင်တယ်” လို့ ပြောပါတယ်။

စက်တင်ဘာ ၂၃ ရက်ကလည်း ရနောင်း အချုပ်ထောင်ကနေ လွတ်ရက်စေ့တဲ့ မြန်မာနိုင်ငံသား စုစုပေါင်း ၁၄၅ ယောက်ကို  ကော့သောင်းကနေ မြန်မာဘက်အခြမ်း လွှဲပြောင်းပို့ဆောင်ခဲ့တယ်လို့ ရနောင်းလူဝင်မှုကြီးကြပ်ရေးရုံးက ထုတ်ပြန်ပါတယ်။

ထိုင်းက‌ ဖမ်းဆီးပြစ်ဒဏ်ကျခံပြီး နေရပ်ပြန်ပို့သူတွေထဲ အသက်အရွယ်အလိုက် စစ်မှုထမ်း အကျုံးဝင်တဲ့သူတွေကို စစ်တပ်က စုဆောင်းပြီး၊ တပ်သားသစ် လေ့ကျင့်ရေးကျောင်းတွေကို ပို့ဆောင်တယ်လို့ နီးစပ်သူတွေက ပြောပါတယ်။ 

ကိုရဲမင်း (အေအေစီ အလုပ်သမားအရေး လှုပ်ရှားသူ) က “အထူးသဖြင့် ကော့သောင်း-ရနောင်းကနေ ပြန်ပို့ခံရသူတွေက တန်းပြီး စစ်သားစုဆောင်းရေးတွေ တန်းရောက်သွားကြတယ်။ အဲဒီတော့ အခုလိုအချိန်မှာ ထိုင်းရောက် မြန်မာနိုင်ငံသားတွေ ဖမ်းဆီးမခံရအောင် တော်တော်လေး သတိထားကြရမှ ဖြစ်တယ်။ အထူးသဖြင့် တော်လှန်ရေး ထောက်ပို့တွေ၊ နိုင်ငံရေးနဲ့ ပတ်သက်တဲ့သူတွေ၊ တော်လှန်ရေးမှာ ပါဝင်လို့ ထွက်ပြေး တိမ်းရှောင်လာသူတွေ တော်တော်လေး သတိထားရမယ်။ ဘယ်လောက်ပဲ တောင်းဆို တောင်းဆို ထိုင်းဘက်က ပြန်ပို့နေတာပေါ့” လို့ ပြောပါတယ်။

ထိုင်းနိုင်ငံကို တရားမဝင် နယ်စပ်ဖြတ်ကျော် ဝင်ရောက်တာ၊ အထောက်အထား အပြည့်အစုံ မရှိဘဲ ကန့်သတ်အလုပ်တွေမှာ လုပ်ကိုင်တာ၊ ထိုင်းမှာ ရာဇဝတ်မှု ကျူးလွန်တာ စတဲ့ အကြောင်းအမျိုးမျိုးနဲ့ ဖမ်းဆီးခံရသူတွေကို ပြစ်ဒဏ်ကျခံပြီးနောက် စစ်တပ်လက်ထဲ ထိုင်းဘက်က အာဏာပိုင်တွေက လွှဲပြောင်းပေးတာ ဖြစ်ပါတယ်။

စစ်တပ် အာဏာသိမ်းပြီး နောက်ပိုင်း ပြည်တွင်းက လူငယ်တွေကို ပုံစံမျိုးစုံနဲ့ ဖမ်းဆီးတာ၊ ပစ်ခတ် သတ်ဖြတ်တာတွေအပြင် အဓမ္မ စစ်မှုထမ်းစေခိုင်းတာ၊ ပေါ်တာဆွဲတွေကြောင့် လူငယ် အများစုဟာ အထိတ်တလန့်နဲ့ စိုးရိမ်ပူပန်နေကြပါတယ်။ 

ဇွဲသစ်