မန္တလေးတိုင်း၊ နွားထိုးကြီးမြို့နယ်၊ မကျီးကုန်းကျေးရွာဘုန်းကြီးကျောင်း ဗုံးကြဲခံရမှုအတွင်း အပြင်းအထန် ဒဏ်ရာရခဲ့တဲ့ ၅ နှစ်အရွယ် ကလေးငယ်တယောက် ထပ်သေဆုံးခဲ့သလို အောက်တိုဘာ ၁၀ ရက်နေ့မှာလည်း နွားထိုးကြီးမြို့နယ်ထဲကိုစစ်တပ်က လေကြောင်းကနေထပ်ပြီး တိုက်ခိုက်နေလို့ တော်လှန်ရေးတပ်ဖွဲ့ဝင် ၁ ယောက် ကျဆုံးခဲ့တယ်လို့ ဒေသခံတွေဆီကနေ သိရပါတယ်။
နွားထိုးကြီးမြို့နယ် လူ့အခွင့်အရေးတာဝန်ခံ ကိုရန်ကုန် က “ထပ်ပြီးသေဆုံးသွားတာက ဗုံးစထိမှန်ပြီးတော့ အပြင်းအထန်ဒဏ်ရာရလို့ မန္တလေးဆေးရုံကြီးမှာတက်ပြီး ဆေးကုနေတဲ့ ၅ နှစ်အရွယ် သမီးလေးပါ။ သူ့နာမည်ကတော့ မမိုးသူဇာ တဲ့။ ဆုံးသွားတာကတော့ ၉ ရက်နေ့ ညနေပိုင်းလောက်မှာဆုံးသွားတာလို့ သိရတယ်။ ကျန်တဲ့ဒဏ်ရာရသူတွေကတော့ မစိုးရိမ်ရတော့ဘူးလို့ သိရတာပဲဗျ” လို့ ပြောပါတယ်။
စစ်ဘေးရှောင်တွေယာယီနေထိုင်နေကြတဲ့ မကျီးကုန်းကျေးရွာဘုန်းကြီးကျောင်းကို အောက်တိုဘာ ၈ ရက်နေ့ မနက်ပိုင်းမှာ စစ်တပ်က ဗုံးကြဲတိုက်ခိုက်ခဲ့တာကြောင့် အသက် ၄၅ နှစ်အရွယ် ဒေါ်ကြင် နေရာမှာတင်သေဆုံးခဲ့ရပြီး ကလေးတွေအပါအဝင် ၁၀ ယောက်ကျော် ဒဏ်ရာရခဲ့ပါတယ်။
စစ်ကောင်စီတပ်ဟာ နွားထိုးကြီးမြို့နယ်ထဲကို အောက်တိုဘာ ၉ ရက်နဲ့ ၁၀ ရက်နေ့မှာလည်း ဂျက်ဖိုက်တာတွေနဲ့ လေကြောင်းကနေတိုက်ခိုက်ခဲ့တယ်လို့လည်း သိရပါတယ်။
နွားထိုးကြီးမြို့နယ်အခြေစိုက် တော်လှန်ရေးတပ်ဖွဲ့ဝင်တယောက်က “မကျီးကုန်းရွာနဲ့ ပတ်ဝန်းကျင်ကို ၉ ရက်နဲ့ ၁၀ ရက်နေ့တွေမှာ ဂျက်ဖိုက်တာတွေနဲ့ တနေ့ကိုအနည်းဆုံး ၃ စီးလောက် ဗုံးလာကြဲနေတာတွေရှိတယ်။ ဗုံးကြဲခံရတဲ့နေရာတွေဘက်ကို ဆက်သွယ်လို့မရသေးဘူး။ သိရသလောက်တော့ ၁၀ ရက်နေ့မနက် ၇ နာရီလောက်ကလည်း ဂျက်ဖိုက်တာနဲ့ ဗုံးကြဲတာမှာ ထိသွားလို့ ကျနော်တို့ဘက်က ရဲဘော် ၁ ယောက်ကျတယ်။ ၁ ယောက် ဒဏ်ရာရတယ်လို့ပဲ ပြောလို့ရဦးမယ်ဗျ” လို့ DVB ကို ပြောပါတယ်။
စစ်ကောင်စီတပ်ဟာ နွားကြီးမြို့နယ်တောင်ဘက်ခြမ်းကကျေးရွာတွေကို မြေပြင်ကလည်း စစ်ကြောင်းထိုးနေတာတွေရှိသလို လေကြောင်းတိုက်ခိုက်မှုတွေကြောင့် မကျီးကုန်းကျေးရွာ အပါအဝင် အနီးအနားကျေးရွာတွေက ဒေသခံပြည်သူ ၂,၀၀၀ ဝန်းကျင်ဟာ နေရပ်စွန့်ခွာ ထွက်ပြေးနေကြရတယ်လို့လည်း ကူညီဆောင်ရွက်ပေးနေသူတွေဆီကနေ သိရပါတယ်။
