ရှမ်းပြည်နယ်မြောက်ပိုင်း၊ မိုးမိတ်မြို့နယ်၊ ဝဲပေါင်းကျေးရွာကို စစ်တပ်က အောက်တိုဘာ ၉ ရက် ည ၇ နာရီခန့်မှာ လေကြောင်း ဗုံးကြဲခဲ့တာကြောင့် ပြည်သူ ၇ ယောက် သေဆုံးခဲ့ပြီး ၈ ယောက် ထိခိုက်ဒဏ်ရာရခဲ့ပါတယ်။
မိုးမိတ်မြို့ခံတယောက်က “ဝဲပေါင်းရွာကို ကြဲသွားတယ်။ ရွာထဲက လူနေအိမ်တွေနား ကျတာ၊ အထိအခိုက်တော့ များတယ်။ ဖုန်းလိုင်းကော အင်တာနက်လိုင်းကော ပြတ်နေတာ၊ ဆက်သွယ်လို့မရဘူး” လို့ ပြောပါတယ်။
ဝဲပေါင်းကျေးရွာကို စစ်တပ်က ပေါင် ၂၅၀ ဗုံး ၃ လုံး ကြဲချတိုက်ခိုက်ခဲ့တာကြောင့် အမျိုးသမီး ၃ ယောက်၊ အမျိုးသား ၄ ယောက် ထိခိုက်သေဆုံးခဲ့တယ်လို့ တအာင်းအမျိုးသားလွတ်မြောက်ရေးတပ်မတော် (TNLA) က သတင်းထုတ်ပြန်ပါတယ်။
ဗုံးကြဲတိုက်ခိုက်ခံရမှုကြောင့် နေအိမ် ၁၀ လုံး ထိမှန်ပျက်စီးခဲ့တယ်လို့ သိရပါတယ်။ စစ်တပ်က မိုင်းလုံမြို့နယ်၊ မန်ဟုန်းရွာကိုလည်း အောက်တိုဘာ ၇ ရက်က ပေါင် ၂၅၀ ဗုံး နှစ်လုံး ကြဲချခဲ့တာကြောင့် ကလေးငယ်တယောက် အပါအဝင် ပြည်သူ ၁၀ ယောက် သေဆုံးခဲ့ပါတယ်။
