ကချင်ပြည်နယ်ထဲက ဗန်းမော်နဲ့ ဝိုင်းမော်မြို့နယ်တွေမှာ တိုက်ပွဲတွေဖြစ်ပွားနေပြီး အရင် ကချင်လွတ်လပ်ရေးတပ်မတော် (KIA) ဘက်က လက်လွှတ်ခဲ့ရတဲ့ ရှေ့တန်းကာကင်း ၅ ခုထက်မနည်းကို ပြန်ရထားတယ်လို့  KIA သတင်းပြန်ကြားရေးတာဝန်ခံ ဗိုလ်မှူးကြီးနော်ဘူက ပြောပါတယ်။

ဗန်းမော်ဘက်မှာတော့ စက်တင်ဘာ ၂၉ ရက်က ကာကင်းတခု၊ အောက်တိုဘာ ၈ ရက်မှာ ခလရ ၄၇ ရဲ့ ကာကင်းတခုနဲ့ အောက်တိုဘာ ၉ ရက် မနက် ၅ နာရီလောက်မှာတော့ မိုးမောက်ဘက်အထွက် ၂ မိုင်နဲ့ ၃ မိုင်အကြား ကာကင်း ၂ ခုထက်မနည်းကို ပြန်လည် ထိန်းချုပ်လိုက်တာပါ။

KIO/KIA သတင်းပြန်ကြားရေးတာဝန်ခံ ဗိုလ်မှူးကြီးနော်ဘူက “မနေ့ကတော့ ၄၇ နဲ့ မြို့အကြားမှာ သူတို့ လုံခြုံရေးချထားတဲ့ ကာကင်းသဘောဖြစ်မှာပေါ့။ တပ်ရင်းတခုမှာ အယောက် ၁၀ လောက်ရှိတဲ့ နေရာတခုကို ကျနော်တို့ သိမ်းတာရှိပါတယ်။ အဲဒီနေရာမှာ ဗိုလ်မှူးအဆင့်ရှိတဲ့ သူတို့ခေါင်းဆောင်တယောက်လည်း အဲဒီမှာကျသွားတာ။ နောက်အရာရှိတချို့လည်း ကျသွားတယ်။ အဲဒါရှိပါတယ်” လို့ ပြောပါတယ်။

ဗန်းမော်ဘက်မှာ ခလရ-၄၇ ရဲ့ ကာကင်းတခုကိုသာ သိမ်းပိုက်နိုင်တာဖြစ်ပြီး ကျန်စခန်းငယ်တွေကတော့ လက်လွှတ်ခဲ့ရတဲ့နေရာတွေ ဖြစ်တဲ့အကြောင်း သိရပါတယ်။

ဒါ့အပြင် မိုးမောက်ဘက်အထွက် ၂ မိုင်၊ ၃ မိုင် ဝန်းကျင်တွေမှာ တိုက်ပွဲဆက်ဖြစ်နေကြောင်း KIA ဘက်က ပြောပါတယ်။

ဝိုင်းမော်ဘက်မှာလည်း အောက်တိုဘာ ၈ ရက်က လမြန်ရွာဝန်းကျင်မှာရှိတဲ့ စခန်း ၂ ခုထက် မနည်းကို KIA က ပြန်လည်ရရှိခဲ့ကြောင်း စစ်ရေးရင်းမြစ်တွေက ပြောပါတယ်။

ဒီအချက်ကို ဗိုလ်မှူးကြီးနော်ဘူက မငြင်းဆိုပေမဲ့ စစ်မြေပြင်ဖြစ်တဲ့အလျောက် အတိုး၊ အဆုတ်တွေ ရှိနေတယ်လို့ ပြောပါတယ်။

“သူတို့လည်း ကျနော်တို့ဆီကို ထိုးလာတယ်၊ မြေပြင်ကနေ ထိုးတယ်။ အဲဒါကို ခုခံရင်းနဲ့ ကျနော်တို့လည်း ရသလောက် ယူတာပေါ့ကွာ။ ရသလောက်သိမ်းတဲ့ ပုံစံမျိုးတွေပေါ့။ တကယ့်စစ်ဆင်ရေးအကြီးတွေ ဗျူဟာမြောက်တဲ့ စစ်ဆင်ရေးတွေ လုပ်တာတော့ မဟုတ်ပါဘူး။ ကာကင်းစခန်းတွေ သိမ်းတာတွေ သိမ်း၊ အဲလိုပုံစံပါပဲ။ အဓိကတော့ ခံစစ်ပုံစံနဲ့နေတာ ဖြစ်ပါတယ်။”

ဝိုင်းမော်ဘက်မှာတော့ ပြည်သူ့စစ်တွေပါဝင်တဲ့ စစ်ကောင်စီစစ်ကြောင်းတွေဟာ ၂ ရက်၊ ၃ ရက် တကြိမ် မြေပြင်ကနေ ဆက်တိုက်ထိုးစစ်ဆင်နေပြီး ဘယ်ဘက်ကမှ နယ်မြေတွေ လက်လွှတ်ရတာ မရှိသေးဘူးလို့ ဆိုပါတယ်။

ဝိုင်းမော်-ကန်ပိုင်တီ တရုတ်နယ်စပ် ကုန်သွယ်ရေးလမ်းပိုင်းကို ပြန်ထိန်းချုပ်ဖို့ လနဲ့ချီကြိုးပမ်းနေတဲ့ စစ်တပ်ဟာ လမြန်ရွာကနေ ရှေ့ဆက်မတိုးနိုင်ဖြစ်နေပြီး ပန်ဝါဘက်ကိုလည်း ပြည်သူ့စစ်အင်အားနဲ့ စစ်ကြောင်းထိုးနေတာ ဖြစ်ပါတယ်။

ဖားကန့်ဘက်မှာတော့ စစ်ကောင်စီတပ်တွေ မြို့ထဲအထိ ထိုးဖောက်ဝင်ရောက်ပြီး ရွာတချို့ကို ထိန်းချုပ်နိုင်ခဲ့ပေမဲ့ စစ်ရေးတင်းမာနေပြီး နှစ်ဖက်လုံးက တပ်သားသစ် စုဆောင်း ပေါ်တာဆွဲနေလို့ ဒေသခံတွေ စိုးရိမ်နေကြရပါတယ်။

စိုးသူအောင်