ရုရှားရဲ့ နိုဗိုဗိုရိုညက်ရှ် နျူကလီးယား ဓာတ်အားပေးစက်ရုံကို တိုက်ခိုက်ဖို့ ယူကရိန်းတပ်တွေက ကြိုးပမ်းနေလို့ ယူကရိန်းရဲ့ ရှေ့တန်းစစ်မျက်နှာတွေ အားလုံးဆီကို အောက်တိုဘာ ၆ ရက်ကစပြီး ထိုးစစ်ဆင်ခဲ့တယ်လို့ ရုရှားက သတင်းထုတ်ပြန်ပါတယ်။

ရုရှားစစ်တပ်က ဒန်ညက်စ်နဲ့ ဇာပိုရီရှားဒေသတို့က ရွာတရွာစီကို ထိန်းချုပ်ခဲ့ပြီး တနင်္လာနေ့မှာ ဒေသ ၁၄၈ ခုမှာ စွမ်းအင်နဲ့ သယ်ယူပို့ဆောင်ရေး အဆောက်အအုံတွေ၊ လောင်စာဆီ အရောင်းဌာနတွေနဲ့ ယာယီတပ်ဖြန့်ထားရာ နေရာတွေကို တိုက်ခိုက်ခဲ့ပါတယ်။

တောင်ပံပုံသေဒရုန်း ၄၁၆ စင်းကိုလည်း ကြားဖြတ်ဟန့်တားခဲ့တယ်လို့ ရုရှားကာကွယ်ရေးဝန်ကြီးဌာနက အင်္ဂါနေ့မှာ ပြောပါတယ်။

ရုရှားတပ်တွေဟာ လမ်းကြောင်းအရပ်ရပ်ဆီ ချီတက်နေပြီး ယူကရိန်းစစ်တပ်က ရှေ့တန်းမှာ အခြေအနေကို တည်ငြိမ်အောင် ကြိုးစားရင်း ရုရှားထိုးစစ်ကို နှောင့်နှေးအောင် လုပ်နေတယ်လို့ ရုရှားစစ်ဦးစီးချုပ် ဗလေရီ ဂျေရာစိမော့ဗ်က အင်္ဂါနေ့မှာ ပြောပါတယ်။

ယူကရိန်းတိုက်ခိုက်ရေးဒရုန်းတစီးက နိုဗိုဗိုရိုညက်ရှ် နျူကလီးယားဓာတ်အားပေးစက်ရုံကို တိုက်ခိုက်ဖို့ ညလုံးပေါက် ကြိုးပမ်းခဲ့ပေမဲ့ စက်ရုံမပျက်စီးမီ ဒရုန်းပျက်စီးသွားခဲ့တယ်လို့ ရုရှား အာဏာပိုင်တွေက အင်္ဂါနေ့မှာ ပြောခဲ့ပါတယ်။

ဒရုန်းဟာ ဗိုရိုညက်ရှ်ဒေသက နည်းပညာဆိုင်ရာ ကာကွယ်ရေးဌာနအနားမှာ ပျက်ကျခဲ့ပြီး လည်ပတ်နေဆဲဖြစ်တဲ့ Unit 6 ရဲ့ အအေးခံမျှော်စင်ကို ထိမှန်ပြီး ပေါက်ကွဲသွားတယ်လို့ စက်ရုံအော်ပရေတာက ပြောပါတယ်။

ဖွဲ့စည်းပုံဆိုင်ရာ ထိခိုက်ပျက်စီးမှုရော အသေအပျောက်ပါ မရှိဘဲ စက်ရုံရဲ့ ဘေးကင်းရေးစနစ်တွေလည်း မထိခိုက်ဘူး၊ စက်ရုံ ဘေးကင်းရေးနဲ့ ပတ်ဝန်းကျင်က ဓာတ်ရောင်ခြည်သင့်မှု အဆင့်တွေလည်း ပုံမှန်ရှိနေတုန်းပဲလို့ ပြည်နယ် နျူကလီးယား စွမ်းအင်ကုမ္ပဏီက သတင်းထုတ်ပြန်ခဲ့ပါတယ်။

ယူကရိန်းကာကွယ်ရေးတပ်ဖွဲ့ဟာ ရုရှားတပ်ဖွဲ့တွေနဲ့ တနင်္လာနေ့မှာ တိုက်ပွဲပေါင်း ၁၉၃ ကြိမ် ဖြစ်ခဲ့တယ်လို့ ယူကရိန်းတပ်မတော် စစ်ဦးစီးချုပ်က အင်္ဂါနေ့မှာ ပြောပါတယ်။

ယူကရိန်းတပ်ဖွဲ့တွေဟာ ရုရှားရဲ့ လမ်းကြောင်းမျိုးစုံကနေ တိုက်ခိုက်မှုတွေကို ချေမှုန်းခဲ့ပြီး ကူပျန့်စ်ခ်၊ တိုရက်စ်ခ်နဲ့ နိုဗိုပတ်ဗ်လစ်ဗ်ခါ မြို့တွေက လမ်းကြောင်းတွေမှာ ရုရှားကို ထိုးစစ်ဆင်ခဲ့ပါတယ်။

ယူကရိန်းတပ်ဖွဲ့ဝင်တွေဟာ ရုရှားတပ်ဖွဲ့ဝင်တွေ၊ လက်နက်တွေနဲ့ လက်နက်တိုက်တွေ၊ မောင်းသူမဲ့လေယာဉ် ထိန်းချုပ်ရေးနေရာတွေနဲ့ ကွပ်ကဲရေးစခန်းတွေကို တိုက်ခိုက်ခဲ့ပြီး ရုရှားနည်းဗျူဟာသုံး ဒရုန်း ၃၃၈ စင်းကို ဖျက်ဆီးခဲ့တယ်လို့ ယူကရိန်း စစ်ဦးစီးချုပ်က ပြောခဲ့ပါတယ်။

Source: Reuters