ရန်ကုန်တိုင်း၊ ဒလမြို့နယ်၊ ကျန်စစ်သားရပ်ကွက်၊ ယောမင်းကြီးလမ်းမှာ အောက်တိုဘာ ၇ ရက် ည ၇ နာရီ ၁၅ မိနစ်က ဘက်ထရီအိုး ငှားရမ်းတဲ့ နေအိမ်မီးလောင်ခဲ့လို့ အိမ်ရှင်အပါအဝင် လူ ၄ ယောက် မီးလောင် ဒဏ်ရာရခဲ့တယ်လို့ မြို့ခံတွေဆီက သိရပါတယ်။
မနေ့ညက ဦးသောင်းရီရဲ့ နေအိမ်မီးလောင်ခဲ့တာမှာ အိမ်ရှင်အပါအဝင် လူ ၄ ယောက် ဒဏ်ရာရခဲ့တာလို့ မြို့ခံတယောက်က ပြောပါတယ်။
“ဘယ်ကစလောင်လဲတော့ မသိဘူး။ မီးလောင်တာ နာရီဝက်လောက် ကြာတယ်။ မီးသတ်တွေရော ရပ်ကွက်က လူတွေပါဝိုင်းပြီးသတ်တာ၊ ၈ နာရီလောက်မှ မီးငြိမ်းသွားတယ်။ ၄ ယောက် ဒဏ်ရာရတယ်။”
အဆိုပါမီးလောင်မှုမှာ အိမ်ရှင် ဦးသောင်းရီ၊ ဒေါ်စန်းကြည်၊ ကြက်ခြေနီတယောက်နဲ့ မီးငြှိမ်းသတ်ပေးတဲ့ ရပ်ကွက်နေသူ တယောက်တို့ မီးလောင်ဒဏ်ရာရခဲ့ပြီး ဒလမြို့နယ်ဆေးရုံကို ပို့ဆောင်ထားရတယ်လို့ အုပ်ချုပ်ရေးနဲ့ နီးစပ်သူက ပြောပါတယ်။
“ဘက်ထရီအိုးငှားတဲ့အိမ်ဆိုတော့ ဘက်ထရီအိုးကနေ ရှော့ဖြစ်ပြီးတော့ မီးလောင်တာ။ အိမ်ရှင် လင်မယားရယ်၊ နောက် ၂ ယောက်ရယ်။ ဒဏ်ရာရတယ်။ အရမ်းတော့ မစိုးရိမ်ရဘူး။ ဒလဆေးရုံကို ပို့ထားတယ်။”
အောက်တိုဘာ ၇ ရက်က ရန်ကုန်တိုင်းမှာ ဒဂုံဆိပ်ကမ်းမြို့နယ် ၈၅ ရပ်ကွက်နဲ့ ရွှေပြည်သာမြို့နယ် အမှတ် ၈ ရပ်ကွက်မှာ နေအိမ်မီးလောင်ခဲ့ပြီး လှိုင်သာယာ အဝေးပြေးကားဝင်းမှာ ယာဥ်တစီး မီးလောင်ခဲ့တယ်လို့ မီးသတ်ဦးစီးဌာနက ထုတ်ပြန်ထားပါတယ်။
