ရှမ်းပြည်မြောက်ပိုင်း၊ ကျောက်မဲမြို့နယ်ထဲမှာ ပြီးခဲ့တဲ့ စက်တင်ဘာလအတွင်း စစ်ကောင်စီတပ်က တအာင်းအမျိုးသားလွတ်မြောက်ရေးတပ်မတော် (TNLA) သိမ်းထားတဲ့ နယ်မြေတွေကို ပြန်လည်သိမ်းပိုက်ဖို့ ထိုးစစ်ဆင်ရာမှာ အရပ်သားပြည်သူတွေအပေါ် တရားလက်လွတ်သတ်ဖြတ်၊ အဓမ္မပြုကျင့်မှုတွေ ရှိတယ်လို့ ရှမ်းလူ့အခွင့်အရေးမဏ္ဍိုင် (SHRF)က အောက်တိုဘာ ၆ ရက်မှာ ထုတ်ပြန်ပါတယ်။

လေကြောင်းကနေ ဗုံးကြဲတာ၊ လက်နက်ကြီးနဲ့ ပစ်တာတွေကြောင့် ရွာသားတွေ သေဆုံး ဒဏ်ရာရခဲ့သလို ဘုန်းကြီးကျောင်းနဲ့ အိမ်ခြေ အနည်းဆုံး ၁၀၀ ကျော် ပျက်စီးခဲ့ရတယ်လို့ ဆိုပါတယ်။ 

စက်တင်ဘာ ၂၄ ရက် မနက်က စစ်ကောင်စီတပ်ဖွဲ့ဝင်တွေ ကျောက်မဲမြို့နယ်၊ နားအိုက်ခန့်ရွာကနေ စခန်းသာဘက် ရောက်လာစဉ် လမ်းမှာတွေ့တဲ့ ရွာသားတယောက်ကို စစ်ဆေးရိုက်နှက်ခဲ့တယ်၊ ရွာသားက လယ်ထဲ ထွက်ပြေးတာကြောင့် စစ်သား ၂ ယောက် နောက်က လိုက်ဖမ်းတယ်၊ လယ်စောင့်တဲတခုမှာ စစ်ရှောင်နေတဲ့ ဦးပဥ္စင်းတပါးဟာ စစ်သားကို မြင်တော့ ထိတ်လန့်ထွက်ပြေးစဉ် အဆိုပါစစ်သားက သေနတ်နဲ့ပစ်လို့ ပျံလွန်သွားတယ်လို့ မျက်မြင်သက်သေက ပြောပါတယ်။

စစ်သားတွေက လယ်စောင့်တဲနားရပ်ထားတဲ့ ဦးပဥ္စင်းရဲ့ဆိုင်ကယ်ကိုစီးပြီး ကျေးရွာခေါင်းဆောင်ပါ ခေါ်ကာ နောက်ထပ် နားအိုက်ခန့်ရွာက လယ်ထဲမှာပုန်းနေတဲ့ ရွာသားတွေကို စစ်ဆေးမေးမြန်းဖို့ လိုက်ရှာတယ်၊ သူတို့နဲ့လိုက်သွားတဲ့ ရွာခေါင်းဆောင်ရော လယ်ထဲက ရွာသား ၃ ယောက်ပါ ထွက်ပြေးလွတ်မြောက်သွားပြီး လယ်စောင့်တဲတခုမှာ ၁၆ နှစ်အရွယ် မိန်းကလေးနဲ့ ၁၂ နှစ်အရွယ် သူ့မောင်လေး၊ သူ့မိခင်တို့ ၃ ယောက် ကျန်ရစ်တယ်၊ နောက်တနေ့မှာ ထွက်ပြေးသွားတဲ့ သူတို့အဖေက တဲနားပြန်လာတော့ သူ့မိန်းမနဲ့ ကလေးတွေရဲ့ အလောင်းတွေ တွေ့တယ်၊ သမီးဖြစ်သူ အလောင်းမှာ ကိုယ်လုံးတီးနဲ့ နဖူးနဲ့ ခန္ဓာကိုယ်မှာပါ သွေးတွေရွှဲနေတယ်၊ သမီးမသေဆုံးခင် အဓမ္မပြုကျင့်ခံခဲ့ရတယ်လို့ ဖခင်က ယုံကြည်တယ်၊ ဇနီးနဲ့ သားမှာ ရင်ဘတ်၊ ဦးခေါင်းနဲ့ ဝမ်းဗိုက်က သေနတ်ဒဏ်ရာတွေ တွေ့တယ်၊ တဲထဲမှာလည်း မြန်မာစစ်သားဝတ်စုံနဲ့ အသုံးအဆောင်တွေ တွေ့တယ်၊ ဒါကြောင့် ဒီပြစ်မှုကို မြန်မာစစ်သားဘက်က ကျူးလွန်တယ်လို့ မိသားစုဝင် ဆုံးရှုံးရသူ လုံးအောက ပြောပါတယ်။

သေဆုံးသွားတဲ့ ရွာသား ၃ ယောက်နဲ့ ဦးပဥ္စင်းတပါးတို့ရဲ့ အလောင်းကို စက်တင်ဘာ ၂၅ ရက်မှာ ရွာသားတွေ ဝိုင်းပြီးသင်္ဂြိုဟ်လိုက်ကြပါတယ်။

စစ်ကောင်စီတပ်ဟာ တအာင်းအမျိုးသားလွတ်မြောက်ရေးတပ်မတော် (TNLA) ကို ထိုးစစ်ဆင်နေတဲ့ ကာလအတွင်း စက်တင်ဘာ ၈ ရက်မှ ၂၉ ရက်ထိ (ရက်ပေါင်း ၂၀ ကျော်) အတွင်း လေကြောင်းကနေ ဗုံးကြဲတာ၊ လက်နက်ကြီးတွေနဲ့ နေ့စဉ်လို ပစ်ခတ်နေတာလို့ ဆိုပါတယ်။

အခုလို ပစ်ခတ်မှုကြောင့် နားအိုက်ခန့်၊ ပန်ပေါင်း၊ ပါပုတ်၊ လွယ်ခေါ်၊ တောင်ဆေးလိပ်၊ စခန်းသာ၊ ခိုက်တုန်ဟုန်း၊ ပန်ဟိုက်၊ ကုန်းကော်၊ မက်မန်ကုန်းဆာ၊ နောင်ပစ်၊ နမ့်ဟူး၊ မိုင်းတင်း၊ ပေါက်အင်းလေး၊ ငြိမ်းချမ်းရေးကုန်း၊ လုံဝယ်၊ ပန်ကွမ်၊ ပန်သပြေ၊ ခိုမုန်း စတဲ့ ကျေးရွာက ဘုန်းကြီးကျောင်းနဲ့ လူနေအိမ်ခြေ စုစုပေါင်း ၁၃၀ ကျော် ပျက်စီးခဲ့ရတယ်လို့ ဆိုပါတယ်။

ဒါ့အပြင် ပန်ပေါင်းနဲ့ ပါပုတ်ရွာက ရွာသား ၂ ယောက် သေဆုံးပြီး ရွာသူ ၂ ယောက် ထိခိုက်ဒဏ်ရာ ရခဲ့တယ်လို့ SHRF ရှမ်းလူ့အခွင့်အရေးမဏ္ဍိုင်ရဲ့ ထုတ်ပြန်ချက်မှာ ဖော်ပြပါတယ်။

Source: SHRF