စစ်ကိုင်းတိုင်း၊ ဘုတလင်မြို့နယ်ထဲမှာရှိတဲ့ နှစ်ရှည်​ စစ်ဘေးရှောင်စခန်းတခုကို စစ်ကောင်စီတပ်က အောက်တိုဘာ ၄ ရက်မှာ ဝင်ရောက်မီးရှို့ဖျက်ဆီးသွားလို့ စစ်ဘေးရှောင်တွေ ထပ်မံထွက်ပြေးနေကြရတယ်လို့ ​ဒေသခံတွေဆီကနေ သိရပါတယ်။

ဒေသခံတယောက်က “ဘုတလင်မြို့နယ်ထဲမှာရှိတဲ့ ဇီးတောအနောက်ရွာနားက စစ်ဘေးရှောင်တွေ နေထိုင်ကြတဲ့ အရပ်အခေါ် တဲတိုက်စစ်ရှောင်စခန်းတွေကို စစ်တပ်စစ်ကြောင်းက လာရောက်မီးရှို့ဖျက်ဆီးသွားကြတာ” လို့ ပြောပါတယ်။

စစ်ကောင်စီစစ်ကြောင်းဟာ မုံရွာ နမခ ကနေ အောက်တိုဘာ ၃ ရက်မှာ စတင်ထွက်လာတာဖြစ်ပြီး ဇီးတောအနောက်ကျေးရွာမှာ တည တပ်စွဲနေခဲ့ကာ ကျေးရွာအနီးမှာ ရှိတဲ့ စစ်ဘေးရှောင်စခန်းကို ဝင်ရောက်စီးနင်း မီးရှို့ဖျက်ဆီးခဲ့ကြတာလို့ ဆိုပါတယ်။

ဘုတလင်မြို့နယ် လူသားစာနာတာဝန်ခံက “ဇီးတောအနောက်ရွာ ဆိုတာက မုံရွာ-ဘုတလင် ကားလမ်းပေါ်က ဘုတလင်မြို့နယ်အဆုံးမှာ ရှိတဲ့ ရွာတရွာ ဖြစ်ပါတယ်။ မုံရွာ နမခ က ထွက်လာတဲ့ စစ်ကြောင်းတိုင်းလိုလို ဇီးတောအနောက်ရွာကို စစ်ကြောင်းထိုးလေ့ရှိပြီးတော့ လူနေအိမ်တွေကို မီးရှို့ဖျက်ဆီး​တာတွေ မကြာခဏလုပ်နေလို့ အဲဒီရွာခံတွေက နီးစပ်တဲ့ တောတောင်တွေထဲမှာ တစု တစုဆီ တဲတိုက်တွေထိုးပြီး နေထိုင်နေကြရတာ ၂ နှစ်ကျော် ၃ နှစ်နီးပါး ရှိနေ​ကြပါပြီ။ လူဦးရေအားဖြင့်ကတော့ ၁,၅၀၀ ဝန်းကျင်ရှိတယ်။ အဲဒီစစ်ကြောင်းက ဇီးတောအနောက်ရွာထဲမှာ တညအိပ်ပြီး ရွာနဲ့မလှမ်းမကမ်းက စစ်ရှောင်တဲတိုက်တွေဘက်ကို စစ်ကြောင်းထပ်ထိုးတာ။ စစ်ဘေးရှောင်တွေလည်း သူတို့တဲတိုက်တွေကနေ ထပ်ပြီး ပြေးရတာပေါ့။ ကျန်နေခဲ့တဲ့ တဲတိုက်တွေထဲက ၅ လုံးလောက် မီးရှို့ခံရတယ်။ စစ်ရှောင် ၅ ယောက်ကိုလည်း ဓားစာခံအဖြစ် ဖမ်းသွားပြီးတော့ သူတို့စစ်ကြောင်း ပြန်ခေါက်တဲ့နေ့မှာ ပြန်လွှတ်ပေးခဲ့တယ်လို့ သိရတယ်ဗျ။ ပြန်လွတ်လာတဲ့သူတွေနဲ့တော့ လူချင်းမတွေ့ရသေးဘူး” လို့ DVB ကို ပြောပါတယ်။

အဲဒီ စစ်ကောင်စီစစ်ကြောင်းဟာ တော်လှန်ရေးတပ်ဖွဲ့တွေနဲ့ တိုက်ပွဲဖြစ်ပွားတာမရှိဘဲ အောက်တိုဘာ ၄ ရက် ညနေပိုင်းမှာတော့ မုံရွာ နမခ ထဲကို ပြန်လည် ဝင်ရောက်သွားတယ်လို့ သိရပါတယ်။

ဇီးတောအနောက်ကျေးရွာက နှစ်ရှည်စစ်ဘေးရှောင်တွေကိုတော့ ဘုတလင်မြို့နယ် လူသားစာနာအဖွဲ့ကပဲ လိုအပ်တဲ့ စားနပ်ရိက္ခာတွေနဲ့ ဆေးဝါးတွေ ထောက်ပံ့ကူညီပေးနေရတယ်လို့ လည်း သိရပါတယ်။